Read Konkomba 1 Korenti 7 Bible Online

1 Korenti 7 - Konkomba bible

1 Korenti 7

¹Naah nan sɔb kugbɔŋ seim tibɔr tan bu-n, ke ni ŋan nin uja nlaa kɔɔn upii-n.

²Amaa iwanjaab toon kaah yab nbu, ni ŋan nin uja biɛn li jɔɔ u poo, le upii biɛn mu li jɔɔ u chal.

³Ni ŋan nin uja nta uba ki sei u poo, le upii mu nta uba ki sei u chal.

⁴Upii a binba kaa ye u gbanann nmɔn ni, amaa u chal mu le ye u gbanann nmɔn, uja mu a binba kaa ye u gbanann ni, amaa u poo mu le ye ti.

⁵Ni laa yiin tab a dɔɔmi, man ke ni nan chee sei tab ke ni la yin ta isaŋ iba le ki miɛ Uwonbɔr. Wee ni bɔɔn bu ke ni jir ki lagin tab wee Sintani nlaa fir bigin ni n yonn man wee ni nan walin ni ŋmag ni baa guri.

⁶N bei ni ni niɛ le, amaa naa ye nsiimi.

⁷Min bi ban ke uninfo biɛn li be ke maah be man nan le, amaa Uwonbɔr sei uninfo biɛn nin u piini le, uba a piin be iba ki jiɛn utɔyaan.

⁸N pag ki tenn ban kaa la kɔɔn bipiib, nin ban kaa la kun bijab nin ipukɔɔ nle, ke bi bi jiɛn lipiikɔɔnl bee lijakunl wee ki bi be ke maah be man nan ke, ni bi ŋan.

⁹Amaa ni ye baa li fir choo biba ke, ni ŋan nin bin kɔɔn bipiib bee bin kun bijab, nin bi li jɔɔ nmɔsanyunsɔɔm wee bi sufu gaan nŋmi.

¹⁰Bipiidam nin biniinpiib le n siig nsiim nan ki tenn ni (naa ye min le siig ni, amaa Uwonbɔr le siin): Naa ŋan nin upii nnya ki jiɛn u chali.

¹¹Amaa ni ye u nyan u chal ban ke, un la ji kun uja uba, amaa un jirim u chal nmɔn a niin. Uja mu nlaa yii u poo.

¹²Nim ban gurin mu le n bei nan, (Min le ke, naa ye Uyudaan ni): Ni ye ni ni uba kɔɔn upii wan kaa ye uwonjiɛn ni, wee ki fir be nin u chal ke, u la yii wi.

¹³Ni ye upii mu jɔɔ chal wee u chal nmɔn kaa ye uwonjiɛn ke, wee ki li fir be nin u chal ke u la yii wi.

¹⁴Uja wan kaa ye uwonjiɛn nmɔn labir Uwonbɔr a ninfou u poo nbuu, le upii wan kaa ye uwonjiɛn nmu labir Uwonbɔr a ninfou u chal nbuu. Naa bi ye man ke ni buwaab kaa bi li fir be kasi, amaa ibamɔn buu, Uwonbɔr gaa bi le ki ŋa bi kasi.

¹⁵Amaa ni ye wan kaa ye uwonjiɛn ban un yii u chal bee u poo ke ni che u li chaau. Naa ye limugil le ke u li be nin wan kaa ye uwonjiɛn nmɔn ni.

¹⁶Fin upii nan yin ŋa nii ki biɛ ke ŋaa li fir fee a chal ki jaa? Fin uja mu a yin ŋa nii ki biɛ ke ŋaa li fir fee a poo ki jaa?

¹⁷Nin ni ma biɛn ni, che uninfo biɛn li ŋmag Uyudaan kaah ban u li be man nin, ke waah pii nan be man wee Uwonbɔr yin win. Nsiim man wee n ta sei biwonjiɛm a laginn biɛn le yen.

¹⁸Uja u la ba nan jii u punl wee Uwonbɔr nin yin waa? Ni che u li ŋmag man na wee ki laa ji jiri ye wan kaa jii u punli. Uja ula kaa nan jii u punl wee Uwonbɔr yin waa? Ni che u li ŋmag man na wee ki laa ji jii.

¹⁹A jii ke ni ye yɔli le, ŋaa ti ji jii ke ni ye yɔli le. Nan kpaa talar ye ni ŋmag Uwonbɔr a siimin le.

²⁰Ni che uninfo biɛn li be ke waah nan be man wee Uwonbɔr yin win.

²¹A nan ye uyom le Uwonbɔr yin ŋaa? Laa che nin mugiriŋi, amaa a nyi ŋaah li ŋa man ki nya tiyomirin ke, a ŋaam.

²²Wan nan ye uyom wee Uyudaan yin u ke, waa ji ye uyom Uyudaan ban ni, man mu le wan mu nan ye uba wee Uyudaan yin u ke, u nin ye Masiya a yomu le.

²³Uwonbɔr daa ni le ki yɔn; Mambu ni laa ji ŋa bininfob a yomi yi.

²⁴N nabum, ni ma bu ni che uninfo biɛn li be nin Uwonbɔr a, ke waah nan be man wee Uwonbɔr yin win.

²⁵Daandaan nan, nim ban kaa la nyi bipiib nin ban kaa la nyi bijab nan man, Uyudaan kaa seim nsan ke n bei ni niba, amaa Uyudaan a nyunyunbasanl bu le n ji ni bɔr ke uninfobamɔn nin.

²⁶Daandaan nan a bɔr mugkaar nbu, n tiɛr ke ni ŋan nin ni li be ke naah be man nan.

²⁷A kɔɔn upii waa? Laa ji gbaar a yii wi. Ŋaa la kɔɔn upii? Laa ji ban upii a kɔɔn ni.

²⁸Amaa ni ye a kɔɔn upii ke naa ye tibiri, usapɔɔn wan kaa la nyi uja mu kun uja ke, naa ye tibiri, amaa ban jɔɔ bipiib bee chiɛb li kan tibɔmugkaar bi binbemin, le n ban nnyan bi tibɔmugkaar nmɔn yaan.

²⁹Maah ban n wɔɔn ni nan sɔ, n nabum, n-yonn kaa ji yabi, naah nyan daandaan nan ki jɔɔ chaa, ban jɔɔ bipiib li be ke ban kaa jɔɔ bipiibin;

³⁰ban mɔr, li be ke baa mɔr len, le ban jɔɔ npopeen li be ke baa jɔɔ npopeen len, le ban daag tiwann yɔɔr li be ke tiwann yɔɔr nmɔn kaa ye bi yaan len;

³¹ban jɔɔ dulinya nan a wan yɔɔr ki jɔɔ tun bi toon yin, bi li be ke bi baga kaa be niin len. Nan bu-n dulinya kaah be man daandaan nan ni, naa li yuuri ni li fɔɔr ki jo.

³²N ban ni li be ni wiib le ki laa che niba mugir ni, ujakpag a baga be u Yudaau a toon yin le, le u gbaar waah li ŋa man wee nin gbee Uyudaan a num.

³³Amaa upiidaan ma a baga be dulinya a wan yɔɔrin le, waah li ŋa man wee nin gbee u poo a num,

³⁴ni bu u potiɛl bɔgir le, upii wan kaa kun uja bee usapɔɔn wan kaa nyi uja mu a baga be Uyudaan a toon ni le, nin waah li ŋa man ki ta u gbanann nin u naaŋ ki sei Uyudaan nbamɔm. Amaa wan jɔɔ chal ma lig dulinya nan a wan yɔɔr le, nin waah li ŋa man wee nin gbee u chal a num.

³⁵N pag ni niɛ nan ni yaa ŋam bu le, naa ye n ban n mug ni le amaa naah li ŋa man wee ni laa jɔɔ nbɔgirim Uyudaan ban ni.

³⁶Ni ye uja jɔɔ kijakpeŋ wee u nan gbee upii, wee uja nmɔn jɔɔ lipotiɛl u bu kaa li fir choo uba ke, che un tun waah ban man, ni ŋan nin bin kɔɔn tab, waa tun tibiri.

³⁷Amaa uja wan mu ŋmag uba, wee naa mugir u ke un kɔɔn upii wan wee u lol u tɔɔl tɔɔl a sufu ni ke, waa yin kɔɔn upii wan wee bi ta sei u nke, u tun nan ŋan na.

³⁸Ni bu wan kɔɔn u jakpeŋ ke ni ŋan, amaa wan mu kaa kɔɔn u jakpeŋ ke, u tun nan ŋan ki jon wan kɔɔn u jakpeŋa.

³⁹Upii jɔɔ u chal wee u la be u miɛfolin ke, u chal nmɔn le ye u. Amaa ni ye u chal nmɔn kpo ke, u li fir kun uja wan wee u ban, amaa waah yin kun wan nmɔn li ye wan nɔɔ Uyudaan.

⁴⁰Amaa min ban ma ke, ni ye u be kaa ji kun uja ke, ni li mɔ u ki jon nin waah li kun ujau, Uwonbɔr a Naaŋ le che n pag man.