Read Konkomba 2 Korenti 1 Bible Online

2 Korenti 1 - Konkomba bible

2 Korenti 1

¹Min Pɔɔl wan wee Uwonbɔr a bam bu wee n ŋa Masiya[1] a toom nan, min nin ti na a big Timoti, le sɔb kugbɔŋ nan ki tenn Uwonbɔr a ninfob ban be Korenti, nin u ninfob gannkaab ban biɛn be Akaya a tingbɔŋin biɛn.

²Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be ni bu.

³N pagir Uwonbɔr wan ye Yisa Masiya a baa-n; ti Baa wan san ti kunyunyunbaag ki jɔɔ nposɔɔn biɛn.

⁴Ti Baa wan sɔŋir ti sufu a bɔmugkaar biɛn ni, wee ti mu li fir sɔŋir ban be limugilin a sufu, lisufusɔŋil lan wee ti nan gaa Uwonbɔr ban ni.

⁵Ti fala a jim Masiya a yinl bu kaah yab man nin, man le ti sufu sɔŋil mu na yin yabig ki tan lagir u ma Masiya bu.

⁶Ti jin fala ke, ni ye ni yaa sufu sɔŋil le nin feegab; ni ye ti kan lisufusɔŋil ke, ni ye nim a sufu sɔŋil le lan li sei ni limɔril ki che ni fir ji fala ke taah ji man ni.

⁷Mambu ti jɔɔ tama ni bu ke ni pɔɔ, nan bu-n ti nyi ke naah le ji ti fala man ni, man mu le ni yin kan ti sufu sɔŋil.

⁸N nabum, maa ban ni laa nyi fala wan wee ti jin Asiya a yerin paamin ni. Ti nan kan limugil takpenl lan yab ki jon ti pɔɔm a tariga, ki che ti jaa tama ti tɔɔl a miɛfol bu.

⁹Nan bu-n, ti nan tiɛr ke nkum kaa ji fɔg nin ti, amaa ni niɛ nan tun ki wɔɔn ti ke ti laa far ti baantɔɔl a gbingbanli, amaa wee ki li far ligbingbanl Uwonbɔr wan fiin bitakpiib nkumin ni bu.

¹⁰U ma nyan ti nkum a daŋ takpeŋ n-yaan, U li nyan ti. U ma bu le ti jɔɔ tama ke U yin gbaa nyan ti le,

¹¹a li ke naah ter ti nin liwonmiɛlin man ni, ni ma yin che bininfob takpem n sei Uwonbɔr kunɔɔpoog tim bu, waah san ti kunyunyunbaag nbu le u jiin bininfob takpem a miɛm.

¹²Daandaan nan taah jɔɔ ligbingbanfaal lan sɔ: Ti potiɛl jin ti siɛra ti binbem dulinya nan a ninfobin, nin ni baantɔɔl a sisiigin, ti kasi a binbem nin ibamɔn nin nya Uwonbɔr ban le. Naa ye dulinya nan a lam le che ti tun man ni, amaa ni ye Uwonbɔr a nyunyunbasanl bu le.

¹³Taa sɔb nan wee naa li fir karin ni bee naa li fir biɛ. Amaa n jɔɔ tama ke,

¹⁴naah pii biɛ ti wama tiwann man ni, ni na li biɛ ti takpem wee ki fir fa ligbingbanl ti bu, ke ti mu kaah na li jɔɔ ligbingbanfaal ni bu man ti Yudaau Yisa a jirin daalin.

¹⁵Maah nan jɔɔ tidindann ni niɛ nan n bu, ni ma che n lol ke n chinn gɔnn ni wee ni ji tinyɔɔr nfim milee.

¹⁶N nan lol le ke, n nan chaa Masedoniya ke, n burin ki nan gɔnn ni, wee ki ji nan nyan Masedoniya ke, n jirin ni ban, wee ni terim wee n jo Judiya.

¹⁷Maah lol man nmɔn n lol jagilangbiɛ le, a li ke dulinya yaab kaah ŋaan man ni, wee n ke, “Nn, nn,” ki ji ke, “Aai, aai” kufoorug kiba a poolin naa?

¹⁸Amaa ni ye ibamɔn le ke Uwonbɔr kaah ye yada daan nin bu, tibɔr tan wee ti jɔɔ tenn ni nan kaa ye “Nn” nin “Aai” le.

¹⁹Amaa Uwonbɔr a bija Yisa Masiya wan wee min nin Silasi nin Timoti nan mɔɔn u bɔr ki sei nin, waa ye “Nn” nin “Aai,” amaa u ma bu ke iyoo biɛn u “Nn” le ye “Nn” le.

²⁰Ni ma bu ni baga kaa be nin Uwonbɔr kaah siin imɔsiin yan biɛn nni, i ye “Nn” le, Masiya bu. Le u ma Masiya bu “Ibamɔn” yan wee ti pagin, i ye kupag le ki donn Uwonbɔr.

²¹Daandaan nan Uwonbɔr le che tim nin nim si nbamɔm Masiya ni. U ma gann ti le ti jɔɔ nbɔgirim,

²²ki daag ti waah ye ti a daagim, ki ta u naaŋin ŋa ti sufu ni, le ni wɔɔn ke u li sei ti nan biɛn wee U siin limɔsiinlin.

²³Uwonbɔr le ye n siɛradaan ke nin nan ŋan nin n ŋmiɛ ni maah kaa ji nan jirin Korenti a tiŋin ni.

²⁴Taa li fir mugir ni ki wɔɔn ni naah li ŋa yada man ni, amaa ti tun nin ni le ni yaa mɔm bu, nan bu-n naah jɔɔ yada nbu le ni si kenken.