Read Konkomba 2 Korenti 11 Bible Online

2 Korenti 11 - Konkomba bible

2 Korenti 11

¹N tiɛr ke ni li jɔɔ limɔril n jɔr leen nan bu; amaa ni pii ŋaan man le.

²N jɔɔ lipiiponl nim bu, lipiiponl lan nyan Uwonbɔr ban. N ta ni ki sei chal uba le kpeŋileŋ, u ma ye Masiya, naah li ŋa man wee n ta ni ki sei u wee ni li ye kasi a piikalin.

³Amaa nlam yugir nim bu, nan bu-n n nyi bininfob kaah li dan ki nan lar ni ki ŋmarin ni potiɛri, ki ke ni laa ji nɔɔ Yisa nbamɔmi, a li ke uwaa kaah nan lar Iif man nin.

⁴Ni ye uba dan ni ban ki nan bei ni Yisa uba a bɔr wee naa ye Yisa wan a bɔr wee ti nan pagin ke, bee kinaaŋ kan kaa ye Kasi a Naaŋ nke, bee tibɔr tan kaa ye Yisa a bɔŋanni ke, ti ma le ni gaan nbamɔm weem.

⁵Amaa maa tiɛr ke ban ke bi ye itoon ki ye bipɔɔndamin a ni uba jomi.

⁶Nba ke maa ye wan kan ntinnim wee ki li pag tibɔri, amaa n jɔɔ nbiɛm. Ti che ni niɛ le won ni num kasi niwann biɛn ni.

⁷Ni nan ye tibir lee nin maah nan jiin nba tum ke ni kan ndom ki mɔɔn Uwonbɔr a bɔŋann nin yɔli ki tenn ni nnaa?

⁸Ni nann ke n nan su biwonjiɛm a laginn biba le ki gaan literil bi ban ke n ter ni.

⁹Maah nan be ni ban n-yonn man wee kaa jɔɔ niba-n, amaa maa nan mugir ni ke ni seim niba, ti nabum ban nyan Masedoniya nan seim maah ban nan na. N ŋmag nba le kaa ban n li mugir uba, n le ji yin ŋa man le.

¹⁰Ni ye ibamɔn le ke Masiya a bɔŋann nin a bamɔn kaah be n ban ni bu, uba kaa be Akaya a tingbɔŋ nan yaan ki che n ta n gbingbanfaalin ki jiɛn ni!

¹¹Ke babuu? Ni niɛ wɔɔn ke maa ban ni lee? Uwonbɔr ma nyi maah ban ni.

¹²N le yin tun le ke maah tun man ni, ni ma li che ban ban bin ta biba kpaag nin ti-n nlaa kan nsan nin tiwann tan wee bi far ligbingbanl n bu.

¹³Bi yaa ninfobol ye tibɔkar a tooi le, ki lar ke bi ye bitoontum le, ki ta biba kpann Masiya a tooi.

¹⁴Naa ye ligarili. Man le Sintani baantɔɔl nan ta uba kpann nween a malaka.

¹⁵Naa ye ligaril li, ni ye Sintani a toontum ta biba kpann bitoontun buchim ke. Bi joorimin le bi na li kan bi toon nmɔn kaah kpaan bi man.

¹⁶Jigin n li pag ke: Uba nlaa yim kujɔrugi. Amaa ni ye ni yim kujɔrug ke, ni gaam naah bi li gaa kujɔrug man ni, wee n fir fa ligbingbanl wama.

¹⁷Maah far ligbingbanl nan bu-n maa pag ke Uyudaan ni, amaa n pag le ke kujɔrugin.

¹⁸Bininfob takpem kaah far igbingban ke dulinya yaab kaah ŋaan man ni, n mu li fa n gbingbanl.

¹⁹Ni nunween takpen nan bu le che ni mɔ ni, le ni jɔɔ limɔril nin tijɔri!

²⁰Ni jɔɔ limɔril nin uba kaah ta ni ki ŋa u yomi, bee ki pen ni bee ki ŋalig ni, bee ki yin ni yɔli, bee ki pebir ni ntapam!

²¹Ni ye ifa le ki seim nin ti daburigi kaah kaa nan che ti tun man ni! Uninfo uba kaah jɔɔ lipoobil ki li fir fa ligbingbanlin, min pag le ke kujɔrugin-woo, le ki mu jɔɔ lipoobil ki li fir fa ligbingbanl.

²²Bi ye Hiiburu yaab lee? N mu ye Hiiburu a ninfou le. Bi ye Iziral yaab lee? N mu ye Iziral a ninfou le. Bi ye Abiraham a yaabili lee? N mu ye Abiraham a yaabil le.

²³Bi ye Masiya a toontum lee? (N nann uwaar le maah pag man nin nbu.) Min jon ba, ki kɔɔ tiloondirin ke naa jɔɔ tarigi, le bi boom inaanbaan te-n, le n kan kininbɔŋ kan mal nkum jigin.

²⁴Itaa iŋmu le Juu yaab boom inaanbaan pitaa nin iwiɛ[2].

²⁵Rom yaab nan boom ilanbɔn nfim mitaa. Bininfob nan gabirim itangbag isaŋ iba ki nyi ke n kpou. Tiŋalin nan labirim ki chigin nnyumin nfim mitaa, le n be limɔgilin liwonmunl nin kunyiɛmuŋ.

²⁶N sanchonl a poolin, n nan ti ga kininbɔŋ ikpen ni, ki ji ga kininbɔŋ bininfob ban feen ban, nin n tɔɔl a tiŋ a ninfob ban, nin ban kaa ye Juu yaab ban, ki ji ga kininbɔŋ ntintakpemin, nin itindoo-n nin imɔgin nin n nabum ban choon ki larin ban.

²⁷N tun itoon nin linunmanla, ki be kaa dɔ jiɛn ni; nkom nin nnyunyum nan ti chorim le, amaa le maa ji; le tiwar choom le n wan yee waŋ kaa foomi.

²⁸Naa ye nima a binba le n nan kan ni, biwonjiɛmin a laginn biɛn a mugil bu le che n baga be bi bu.

²⁹Ŋma gbarig, wee min kaa gbarigaa? Ŋma wee bi che u kɔɔ tibirin, wee n sufu kaa gaan nŋmi?

³⁰Ni ye n yin fa ligbingbanl ke, n li fa ligbingbanl wɔɔn n daburigi nbu le.

³¹Ti Yudaau Yisa a Baa Uwonbɔr wan ŋan nin npagim iyoo biɛn ni, U ma nyi maah kaa por tibɔkari.

³²Maah nan be Damasiko a tiŋin n-yonn man ni, ubɔr Aritasi a bɔrbig nan ban un choom le ki nan che bitɔtogib si kitiŋ nmɔn a timansanmɔnn ki guu ke bin choom.

³³Amaa le bi nan taam ki kpeen kukachiɛgin, ki nan taam lann kitiŋ nmɔn a gonl a bolin, le n nan nyan uja nmɔn a nɔɔn.