Read Konkomba 2 Korenti 3 Bible Online

2 Korenti 3 - Konkomba bible

2 Korenti 3

¹Ti piin ki pagir ti ba le jigin naa? Ni kpaa talar le ke uba n sɔb ti siɛra a gbɔŋ ki sei ni bee ti gaa siɛra a gbɔŋ ni ban ke biba kaah ŋaan man n naa?

²Nim baantɔɔl le ye ti siɛra a gbɔŋ, ki sɔb dɔ ti sufu ni le bininfob biɛn karin ki nyi.

³Nim le wɔɔn ke ni nann kugbɔŋ kan nyann Masiya ban le, ki ye ti toon a siɛra, naa ye ngbansɔbmɔɔn le bi ta sɔbi amaa Uwonbɔr wan fo-n a Naaŋ, naa ye litangbagil bu le bi sɔb paan ni, amaa bininfob a sufu ni.

⁴Tidindann nan a bosu ye ti yaan le Masiya bu Uwonbɔr ban.

⁵Taa wɔɔn tiba ke ti li fir tun niba nin ti tɔɔl a pɔɔmi, amaa taah fir tun nan ni nyan Uwonbɔr ban le.

⁶U che ti ye bitoontunŋam ban fir mɔɔn tipoopɔnn ni le, naa ye nan sɔb dɔ, amaa ti nyan Kinaaŋin le; nan sɔb dɔ-n ma ku le amaa le Kinaaŋ ma tenn limiɛfol.

⁷Ni ye itoon nan le che nkum foon ke, wee bi nan sɔb litangbagil bu-n, iyaayoo le Uwonbɔr nmɔn a weem takpem jiirin ki nan won ki nyagin Moziz a num paam, nwonween nmɔn kaah nan nyagin man ni n bu, Iziral yaab kaa nan fir ligi, ni ye itoon nmɔn le nan che nkum foon ki biɛ che nwonween takpen foon ke,

⁸Kasi a Naaŋ a toon-yin kaa li jɔɔ jilima nin nwonween ki jo man naa?

⁹Ni ye itoon yan ku bininfobin che jilima foon ke, ibuchin toon yan che jilima chaan nin ma li jo man!

¹⁰Nan nan ye jilima-n kaa ji jɔɔ jilima daandaan nan ni, nin ti ta ki mag nwonween takpen man kaa jɔɔ diɛm nan ni.

¹¹Ni ye nan wiir nan che jilima foon ke, nan kaa wiir ma a jilima li jo man.

¹²Mambu taah jɔɔ tama kan nin bu le che ti jɔɔ lipoobil.

¹³Taa ye Moziz wan nan ta likinkenl ki piin u num paam ke Iziral yaabin laa kan nwonween man yin jo nbu.

¹⁴Amaa bi le laa ye tukangbirdam le, hali nin dinan, ni ye bi karin Moziz a gbann nin ke, likinkenl nmɔn la deg bi num paam le. Laa la degiri. Nan bu-n Masiya a binba bu le li degir.

¹⁵Hali nin dinan, bi karin Moziz a a gbann nmɔn ke, likinkenl nmɔn le la deg bi sufu le.

¹⁶Amaa ni ye uba kpenn ki nɔɔ Uyudaan ke, likinkenl nmɔn degir u num paam ma.

¹⁷Uwonbɔr ye kinaaŋ le, Uwonbɔr a Naaŋ kaah be nan yaan ni, ye nbaa mu be niin le.

¹⁸Amaa tim ban wee likinkenl kaa deg ti num paamin, le ti kan ti Yudaau kaah jɔɔ tiŋann man takpem, le ni kpenn ti le ti nann u, le ti yaa ŋam nmɔn kpiɛg, le tiŋam nmɔn nyan Uwonbɔr wan ye kinaaŋin ban le.