Read Konkomba 2 Korenti 4 Bible Online

2 Korenti 4 - Konkomba bible

2 Korenti 4

¹Naah ye Uwonbɔr a nyunyunbasanl bu le u ta itoon nan ki ŋa ti nɔɔn ni, nibu che naa gbɔɔ ti gbanann ni.

²Amaa ti yii tibɔwoonkaar nin ifa a tooi le, taa lar uba, bee ki bii Uwonbɔr a bɔri. Amaa ibamɔn a wɔɔm a poolin le ti ta tiba ki wɔɔn uninfo biɛn a potiɛl kaah wɔɔn u ke un nɔɔ man wee nin gbee Uwonbɔr a num.

³Nibu, ni ye Uwonbɔr a bɔŋann nin pag ki woon ke, ni pag woon ban bor Uwonbɔr a samin nin le.

⁴Dulinya nan a weem jɔɔn ban kaa ye biwonjiɛm a potiɛriya, ni bu baa ga Masiya a bɔŋann nin a wonweemi, u ma ye Uwonbɔr a nunaŋ.

⁵Naa ye ti mɔɔn ti baantɔɔl a bɔr le, amaa ti mɔɔn Yisa Masiya a bɔr le, ke u ma ye ti Yudaau, le tim ye ni toontum, Yisa bu.

⁶Uwonbɔr kaah nan len ke, “Che nwonween nwonn libunbɔnlin.” U ma che u wonweem ween ti sufu ni, ke un sei ti nbiɛm a weem man li sei Uwonbɔr kupag Masiya a num paam.

⁷Amaa ti jɔɔ njɔɔm man be tiyɔgir a binboli yin, le ni wɔɔn ke npɔɔn man jon niwann biɛn nyan Uwonbɔr ban le, amaa naa ye tim ban ni.

⁸Ti kan nton a booli biɛn, amaa naa nyaŋ ti. Ti kan limugil takpem amaa tigbanann kaa gbɔɔ.

⁹Bi mugir ti takpem, amaa Uwonbɔr kaa jiɛn ti. Bi fa ti jaa tum, amaa kaa ku ti.

¹⁰Ti jɔɔ Yisa a kum ti gbanann nin iyoo biɛn, wee nin che u miɛfolin mu n nyan npaan ni ti gbanann nin.

¹¹Tim ban fo nan, ti be nkum a nɔɔn le Yisa bu, naah li ŋa man wee u miɛfol n kpiir ti gbanann nin.

¹²Ni bu nkum be mi toon ni le ti ni, amaa le limiɛfol mu be mi toon yin ni bu.

¹³Ni sɔb Uwonbɔr a gbɔŋin ke, “N ŋa yadau; ni ma bu le n pag.” Kinaaŋ kiba nmɔn le ti mu ŋa yada le ki pag,

¹⁴nan bu-n ti nyi wan nan fiin Yisa nkumin, u ma na yin fiin tim ke waah nan fiin Yisa man ni, ki ta tim nin nim ki jo u baan tɔɔl ban.

¹⁵Ni niɛ nan biɛn ye tinyɔɔr le ki sei ni, wee Uwonbɔr a nyunyunbasanl n foo bininfob takpem, wee bin sei Uwonbɔr kunɔɔpoog takpem nin kupag.

¹⁶Mambu che naa gbɔɔ ti gbanann ni. Hali ti gbanann kaah le bagirin gbaa, amaa ti naaŋin ma mann pɔŋir le iween biɛn.

¹⁷Nan bu-n fala kan kaa kpiɛg wee ti jin ki wama nan, ni ma yin che ti kan kupag kan yab ki jon ni biɛn nan.

¹⁸Naa ye ti num paa nan be npaan ni nin bu le, amaa ti num paa nan woo-n bu le. Nan be npaan ni nin kaa yin yuuri, amaa nan woo-n le yin yuur.