Read Konkomba 2 Korenti 6 Bible Online

2 Korenti 6 - Konkomba bible

2 Korenti 6

¹Tim ban ye Uwonbɔr a toontunn tab, ti balin ni le, ni laa che u nyunyunbasanlin n gab yɔli.

²U len ke, “Iyoo kaah nan nan foo nin n gbir ni miɛmin, n nan pel ni miɛma, Iyoo kaah nan nan foo nin bininfob n kan feegabin, n nan ter na.” N bei ni le, daandaan nan le ye Uwonbɔr a nyunyunbasanl, daandaan nan le ye feegab a daal.

³Taa ta litangbagil gbiɛrikaal ki bil uba a samin ni, mambu uba kaa li fir kan ti galin ti toon yin ni.

⁴Ti ga fala nin limugil nin tibɔr, amaa le ki jɔɔ limɔril takpenl ki ta tiba ki sei itoon nin nin ni wan biɛn ni, taah ye Uwonbɔr a toontumin nbu,

⁵le bi boo ti, ki kɔɔn ti tiloondirin, ki gaan tijar ti bu, le ti le tun itoon nmɔn nin inunman nin nkom kaa jiɛn nyiɛgi;

⁶ti ye bipopendam le, ki jɔɔ nnyinyin, limɔril nin nbinben ŋan ki gbee nin Kasi a Naaŋ nin njiɛm,

⁷Ibamɔn a pipagir nin Uwonbɔr a pɔɔmin; nin tibuchinn a kunkɔntiɛr tan be ti nɔɔjiim nin ti nɔɔgam paamin;

⁸biba tenn ti jilima le biba mu kaa tenn ti jilima, biba pag ki mann ti le biba mu pag ki bii ti; ti ye bibamɔn pagib le amaa le bi yin ti tibɔkardam;

⁹bi nyi ti, amaa le ti be ke baa nyi ti le-n; ti kpeg le amaa le ki sin fo, bi boo ti le amaa le kaa ku ti;

¹⁰ti jɔɔ npoobiin, amaa le iyoo biɛn ke ni mɔ ti, ti ye faladam le, amaa le ti che bininfob takpem kpann bijɔɔndam; taa jɔɔ niba, amaa le ki sin jɔɔ niwann biɛn.

¹¹Ti pii pag ti poolin a bɔr biɛn ki bei nim Korenti yaaba, ki loor ti sufu ki sei na.

¹²Taa ŋmiɛ ni ti bami, amaa nim le ŋmiɛ ti ni bam.

¹³Ni ŋaam ke taah ŋaan man ki tenn nin, n pag tenn ni ke n baantɔɔl a buwaab le-n, ni mu nloor ni sufuu man.

¹⁴Ni laa por kudaag kuba a kpikpiɛl nin ban kaa ye biwonjiɛmin ke inaaja ilee kaah por man nni. Nmɔkpaa mi la be bibuchim nin bipootondam a sisiigin naa? Bee nween nin libunbɔnl jɔɔ ba a nɔɔ nin tab baa?

¹⁵Yisa nin Sintani li fir lagin tab baa? Uwonjiɛn nin wan kaa ye uwonjiɛn li fir jɔɔ nmɔkpaa?

¹⁶Kuwonjiɛndiig nin kutingbandiig jɔɔ baa a mɔcheel nin tab baa? Tim le ye Uwonbɔr wan fo-n a diig. A li ke Uwonbɔr kaah len ke, “N li be nin bi, ki li choon nin bi, Ki li ye bi Wonbɔru, wee bi mu ye n ninfob.”

¹⁷“Man bu ni nya bi ban na, ki li jɔɔ nbɔgirim, Uyudaan le len man. Ni laa maa niwann nan ye tijaginn ni, wee N gaa ni.”

¹⁸“Wee N li ye ni Baa, le ni mu li ye N naachim nin N bisiɛm, Uyudaan wan jɔɔ npɔɔn le len man.”