Read Konkomba 2 Korenti 7 Bible Online

2 Korenti 7 - Konkomba bible

2 Korenti 7

¹A li ke taah jɔɔ limɔsiinl man ni, n jɔtiib, ni che ti ŋa tiba kasi ki nya nan ye tijaginn ni ki sei tigbanann nin kinaaŋ nna, wee ki li be nbamɔm ki li jɔɔ kasi a binbem nin jilima ki tenn Uwonbɔr.

²Ni loor ni sufu ki sei ta man. Taa tun ki bii uba, taa ta kuŋmaruŋ dan uba a binbemin ni, kaa jin uba dulimi.

³Maa pag ni niɛ ke n bii ni le; n pii bei ni ke ni be ti sufu ni, tim nin ye nba le ti miɛfolin bee nkumin.

⁴N jɔɔ tidindann takpem ni bu; nin ligbingbanfaal ni bu, n jɔɔ ngbanann pɔɔn takpem, nin ti yaa bɔmugkaarin biɛn n gbee nin nmɔn le.

⁵Taah nan foo Masedoniya a tiŋin ni, tigbanann kaa nan kan lifoorili, ti nan kan limugil ilog biɛn ni, ikɔn nan be itingbaa-n, le bijawaam mu nan be ti sufu ni,

⁶amaa Uwonbɔr wan sɔŋir bipoobiindam a sufu-n nan sɔŋ ti sufu Tatusi a damin na,

⁷Naa ye u dam n-yaa binba le nan sɔŋ ti sufu, amaa lisufusɔŋil lan wee ni nan ta sei u nbu. U nan bei ti naah ban ni kam man na, ni poobiim nin ni baga kaah be n ni man, naah li ŋa man wee nin mɔŋim ki jo naah nan mɔm man ni.

⁸Hali ni ye n gbɔŋ nmɔn nan bii ni sufu ke, naa mug mi, ni nan mugim mau, n kan ke n gbɔŋ nmɔn nan dam na, amaa naa nan yuuri.

⁹Amaa daandaan nan n jɔɔ npopeen, naa ye ni sufu kaah nan bii n bu, amaa ni sufubiil nmɔn kaah che ni binbem kpenn nbu. Ni nan ye Uwonbɔr a bamin le ni sufu bii amaa naa nan sei ni kidaŋ ti bu.

¹⁰Biwonjiɛm a poobiim che bi ga nkpenim man tenn bi nŋmarim le mambu npoobiim nmɔn a bosu kaa mugir bi, amaa dulinya nan ma a poobiim jɔɔ nkum le chaan.

¹¹Ni lig biwonjiɛm a poobiim nan kaah tun nan ni ni: Ni che ni jɔɔ inunman, ki kɔn ni bamɔn bu, le ni ŋuui fii, ki san bijawaam, ki ban ni kam le ki ta ni ba sei, nin naah ŋa sili ki ban ibamɔn ngann man, naah tun man nmɔn, ni sin wɔɔn ke naa jɔɔ niba a galin tibɔr nmɔn yaan ni.

¹²Maah nan sɔb kugbɔŋ nmɔn ki sei ni, naa nan ye uninfo kaah tun tibir bu le n nan sɔb ki, bee naa ye uninfo wan wee u galin u nbu le n sɔb ki. Amaa n nan ban ni tɔɔl nbiɛ ni baga kaah be ti paam man Uwonbɔr a nintogil, ni man nan che n sɔb ki.

¹³Ni niɛ nan biɛn bu ti jɔɔ ngbanann pɔɔn. Nan ji kpiɛ ti tɔɔl a gbanann pɔɔm nmɔn bu ye nan le, ti pooi nan pen taah nan kan Tatusi wee u jɔɔ nposɔɔn nin bu.

¹⁴N faa ligbingbanl Tatusi ban ni bu-u, le naa jim ifa. Amaa taah nan bei ni nan biɛn wee ni ye ibamɔn nin, ni ma che taah faa ligbingbanl Tatusi ban nibu n mu ŋa ibamɔn na.

¹⁵Waah ban ni man u sufu nni, mann kpiɛg le, ni ye u nan tiɛr ni biɛn kaah jɔɔ limɔcheel ki tenn u man ke, nin naah nan gaa u ki san u bijawaam ki jegil man.

¹⁶Ni ŋaam nmɔn na, nibu n li fir jɔɔ tidindann takpem nin ni.