Read Konkomba Galantiya 1 Bible Online

Galantiya 1 - Konkomba bible

Galantiya 1

¹Min Pɔɔl wan ye Masiya a toom nan, maa nyann bininfob ban ni bee naa ye uninfo le tunimi, amaa Yisa Masiya nin ti Baa Uwonbɔr, wan fiin u nkumin nin,

²nin n nabum ban biɛn be n ban, Le sɔb kugbɔŋ nan ki poor nim biwonjiɛm a laginn tan be Galantiya a timin:

³Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be ni bu,

⁴u ma ti yudaau Yisa nmɔn le ta uba ki siin ti taalin ti yaa toonbirin, ke un nyan ti dulinya birig kan a yonn wee ti be nan, ke ti Baa Uwonbɔr kaah ban man nin,

⁵Uma wan ye kupag hali nin n-yonn man kaa jɔɔ ndiɛmi. Ibamɔn.

⁶Ni garim pam nin naah labir weem ki jiɛn Uwonbɔr wan yin ni Masiya a nyunyunbasanl bu-n wee ki labir nɔɔ tibɔr tan be ti binba nmɔn,

⁷taa le ye tibɔŋann ma kolibi. Ibamɔn buu bininfob biba li yin ta kuŋmaruŋ ki ŋa ni sufu ni ki degin ni Masiya a bɔŋann nmɔn.

⁸Amaa hali tim bee malaka le nyan papaab ki yin mɔɔn tibɔŋann wee ti be tiba kaa ye tan wee ti pii mɔɔn ki sei nin nke, che nŋmi man kaa jɔɔ njunimin ngaa u!

⁹Ke taah pii nan len man nin, le n ji bei ni daandaan nan: Ni ye uba mɔɔn tibɔŋann wee taa ye tan wee ni nan gaa-n ke, che nŋmi man kaa jɔɔ njunimin ngaa u!

¹⁰N gbaar ki ban bininfob le n ke n toon ŋan bee Uwonbɔr aa? Bee n ban bininfob a num le n gbee maa? Ni ye n le la bi gbaar ban bininfob a num le n gbeem ke, maa bi yin ye Masiya a yomu wi.

¹¹N nabum, n ban ni li nyi ke tibɔŋann tan wee n nan pagin, naa ye uninfosaal le ŋa ti.

¹²Maa gaa ti uninfosaal ban ni, naa ye uba mu le ta ti ki wɔɔnimi; amaa, n gaa ti Yisa Masiya wan kpiir ti ki wɔɔnimin ban le.

¹³Ni pii gbir maah nan jɔɔ nbinben man n-yonn man wee n nan nɔɔ Juu yaab a wonjiɛn samin a bɔra, nin maah nan mugir biwonjiɛm a laguŋ linunmanl ki gbaar ban n bii liwonjiɛnl man.

¹⁴N nan lii Juu yaab takpem tim Juu yaab a wonjiɛn samin, min nin ban nan yegin, n nan jɔɔ inunman takpem ki nɔɔ n yaajam a kaal kaah wɔɔn man.

¹⁵Amaa Uwonbɔr, wan nan gannim ke baa la ma min, naah nan nan gbee U num n-yonn man nin le U yim U nyunyunbasanl bu,

¹⁶ki kpiir U bija wan be n ni-n ki wɔɔn ke n ta u ki mɔɔn ki sei ban kaa ye Juu yaabin, maa nan gbeer uba,

¹⁷n mu kaa jon Jerusalam ke n tan kan ban nan chinn ye itoon n ni, amaa libol nmɔn n nan jon Arabiya le, ni bɔɔn bu le n jir Damasiko.

¹⁸Ibin itaa a bɔɔn, le n nan jon Jerusalam n tan gɔnn Piita[1] ki biɛ u, le ki nan be u ban iweehn piig nin iŋmu.

¹⁹Maa nan kan Yisa a tooi bimiɛnin a ni uba, see ti Yudaau a waal Jemisi a binba.

²⁰Uwonbɔr buu, naa ye tibɔkar le n por ki sɔb tenn ni.

²¹Ni bɔɔn bu le n jon Siriya nin Silisiya.

²²N-yonn nmɔn, biwonjiɛm a laginn ban nan be Judiya a tingbɔŋin ki be Masiya ni-n kaa nan nyimi.

²³Bi le nan gbir bininfob biba le kaah pag ke: “Uja wan nan mugir ti-n, mu nin mɔɔn yada kan wee u nan ban un choo bii nle ki tenn bininfob.”

²⁴Le bi don Uwonbɔr a yinl min bu.