Read Konkomba Galantiya 3 Bible Online

Galantiya 3 - Konkomba bible

Galantiya 3

¹Nim Galantiya yaab, tijɔri nan! Unyɔgdaan u la baa ŋmarin ni sufuu? Yisa Masiya a kum lidapunpunlin bu a bɔr nan kar ki wɔɔn ni npaan nin ni tɔɔl a numin.

²N ban n biɛ niwann niba le kpeŋileŋ ni ban: Naah ŋmag Uwonbɔr a siimin bu le che ni gaa Kinaaŋin bee naah gbir tibɔŋannin ki ŋa ti yada-n buu?

³Ni jɔrig lee? Nim ban nan piin nin Uwonbɔr a Kasi a Naaŋ a pɔɔm nan, ni nin gbaar ban ni ta uninfosaal a pɔɔm le ki jooraa?

⁴Naah jin fala wan takpem nan ye yɔli lee? Ke ni sin ye ke ni ye yɔli ke,

⁵Uwonbɔr nan ta U Kasi a Naaŋin ki sei ni nin ligaril a toon yan wee U nan tun ni sisiigin nin ke naah ŋmag nsiim nbu le, bee naah gbir tibɔŋannin ki ŋa ti yada n buu?

⁶Man le, ni sɔb Uwonbɔr a gbɔŋin ki len ke; “Abiraham nan ŋa Uwonbɔr le yada, le ni wɔɔn ke u ye ubuchin le.”

⁷Mambu, ni biɛm ke bininfob ban ŋa yada nan ye Abiraham a yaabili le.

⁸Ni ji sɔb dɔ Uwonbɔr a gbɔŋin ke, bininfob ban kaa ye Juu yaab nan a bɔr na li ŋaŋ bi yada bu. Baah kaa la nan gbir tibɔŋannin n-yonn man nin le U nan chinn mɔɔn ti sei Abiraham ke, “Fin bu, N li kaab tikaar jaa dulinya nan yaab biɛn bu.”

⁹Mambu ban ŋa u yada kan tikaar ke Abiraham, wan ye yada daan nin, kaah kan man nin.

¹⁰Bininfob ban biɛn nɔɔ nsiim ke bin kan nŋmarimin, limɔpool be bi bu, nan bu-n ni sɔb Uwonbɔr a gbɔŋin ke, “Wan biɛn kaa nɔɔ nsiim man biɛn sɔb dɔ nsiim a gbɔŋin ke, limɔpool be u bu.”

¹¹Ibamɔn, nsiimin bu ke uba kaa be wee Uwonbɔr ke u bɔr ŋan ni, nan bu-n, “Ubuchin le be yada bu.”

¹²Amaa nsiim kaa nɔɔ nin yada; nan bu-n, “Uninfo wan tun nsiimin kaah wɔɔn man nin li be nsiim nmɔn bu.”

¹³Masiya nan ta u ba le ki mann nkpenim a manug ki fee ti nyan nsiim a mɔpool lan nan nɔɔ ti-n ki jaa, waah nan gaa ti a sisibol ki sir ki che limɔpool nmɔn jin u nbu, nan bu-n ni sɔb Uwonbɔr a gbɔŋin ke: “Limɔpool be wan biɛn bi jɔn u busub bu.”

¹⁴U nan sei ti nkpenim a manug le ke Masiya[3] bu le ban kaa ye Juu yaabin mu nkan tikaar tan wee Uwonbɔr nan ŋa Abiraham bu-n ni, ke ni ye ti ŋa yada ke, ti li kan Kinaaŋ kan wee U nan siin limɔsiinl ke U li sei ti-n.

¹⁵N nabum, n ban n ta idaa biɛn a binbem le ki mag wɔɔn ni tibɔr nan. Bininfob kaah lagin ki poo tipoor tan ke, uba kaa li fir bii ti bee ki ta niba kpiɛ ni bu man nin, man le ye ni niɛ mu.

¹⁶Limɔsiinl nmɔn nan siin ki sei Abiraham nin u yaabil le. Uwonbɔr a gbɔŋ kaa ke, “Nin a yaabili yi” wee ni wɔɔn ke kuninfogbaluŋi amaa u nan ke “Nin a yaabil”, le ni wɔɔn ke uninfo uba u ma ye Masiya.

¹⁷Maah wɔɔn nan nmɔn ye nan le: Uwonbɔr le nan poo tipoor, ibin kobina nin ibin pita kaah jon a bɔɔn le u ta nsiim mu ki sei bininfob, ni ma bu nsiim nmɔn kaa li fir bii Uwonbɔr a poor tan wee u nan poo siin nmɔn ni.

¹⁸Ni ye nsiim a ŋmagim bu le Uwonbɔr tenn bininfob U faal ke, mambu ke waa bi li sei uba lifaal U mɔsiinlin bu, amaa ni nan ye Uwonbɔr a nyunyunbasanl bu le U sei Abiraham U faal nmɔn limɔsiinlin bu.

¹⁹Ke babu wee Uwonbɔr nan siin nsiim nmɔn naa? Nsiim a biim bu le Uwonbɔr nan ta nsiim nan ki sei bininfob ki kpiɛ U mɔsiinl bu, ki ban nsiim nmɔn li ŋmag bi hali nin n-yonn man wee Abiraham a yaabil lan wee U ma Uwonbɔr nan siin limɔsiinl ki sei-n kaah na li foon. Le malakam ta nsiim nmɔn ŋubin usandanfaar a nɔɔn.

²⁰Usandanfaar nan kaa si uninfo uba bu; amaa Uwonbɔr ye uba le.

²¹Mambu nsiim kɔn nin Uwonbɔr a mɔsiinlin lee? Naa ye man ni! Ni ye Uwonbɔr bi siin nsiim man li fir sei uninfo limiɛfol ke, U bi li ke bininfob ye bibuchim le U ban, nsiim nmɔn a ŋmagim bu.

²²Amaa Uwonbɔr a gbɔŋin bei ke, uninfo biɛn be tibir a loondiigin le, naah li ŋa man wee Uwonbɔr kaah nan siin limɔsiinl ke U li sei ban ŋa Yisa Masiya yada lifaal lan nin, bi yada nmɔn bu le U yin sei bi.

²³Yada nan kaah kaa la nan foon nin, nsiimin nan ŋa ti biloondiikɔɔb le, le ki loon ti ki nan kpaa n-yonn man wee Uwonbɔr nan kpiir yada a ŋaam a bɔr ki wɔɔn ti-n.

²⁴Mambu, nsiim nmɔn nan ye uguguur le ki jɔɔ ti chaa Masiya ban, naah li ŋa man wee Uwonbɔr n len ke ti bɔr ŋan yada bu.

²⁵Daandaan nan yada a ŋaam a sam kaah dan nan, nsiimin kaa ji ye ti guguuru wi.

²⁶Ni biɛn nan ye Uwonbɔr a buwaab le naah ŋa Masiya yada-n bu.

²⁷Nim ban wee bi fun ni Uwonbɔr a nyunful Masiya a yinlin nin, nim le ta Masiya ki yee ke kuwan yeewaŋin.

²⁸Mambu, nbɔgirim kaa ji be ban ye Juu yaab nin ban kaa ye Juu yaab a sisiigin ni, kaa be biyom nin ban ye bi ba nan a sisiigin ni, kaa be bijab nin bipiib mu a sisiigin ni, ni ma bu ni biɛn ye nba le Masiya ni.

²⁹Ni ye Masiya le ye ni ke, man ke ni ye Abiraham a yaabili[4] le, ki li ji u faal ke Uwonbɔr a mɔsiinlin kaah wɔɔn man nin.