Read Konkomba Galantiya 4 Bible Online

Galantiya 4 - Konkomba bible

Galantiya 4

¹Maah len man nmɔn wɔɔn le ke ufaajir nmɔn kaah le la ye kibigin, nin waah le jɔɔ nan nmɔn biɛn yɔli, waa yin jɔɔ nbɔgirim nin uyomi.

²U yin be ban guu win nin u toon tun ninkpeebin a nɔɔn le, hali ki nan kpaa u baa kaah nan siin u n-yonn man nin.

³Man mu le ye ti, taah la nan ye nbuwaab Yisa a samin yaan nin, dulinya nan a maabiyiɛrug nan ŋmag ti le ke biyomin.

⁴N-yonn nmɔn kaah nan nan foon biɛn nin, le Uwonbɔr tun U tɔɔl a bija, wan wee upii ma u, wee nsiim ŋmag u,

⁵ke un ŋa nkpenim a manug ki nyan ban be nsiim nmɔn yaan nin, wee ti kpann Uwonbɔr a bibamɔm.

⁶Naah ye Uwonbɔr a buwaabin bu le Uwonbɔr tun U big nmɔn a Naaŋ le ki dan ki nan be ti sufu ni, le kinaaŋ nmɔn yi ke, “Ti dindaau, ti baa.”

⁷Mambu, ŋaa ji ye uyomi, amaa a nin ye Uwonbɔr a big le; ŋaah ye U big n bu, le U ŋaaŋ U faajiru mu.

⁸N-yonn man nan jon wee naa la nan nyi Uwonbɔr nan, ni nan ye biyom le ki sei Uwonbɔr kaah naan tiwann tan kaa ye iween nin.

⁹Amaa daandaan nan ni nin nyi Uwonbɔr, bee Uwonbɔr nyi ni, ke ba ŋa wee ni ji ban ni jir ki nɔɔ dulinya nan a maabiyiɛrug kan ye idaburig nin kunyunyunbaag a binbem nan naa? Ni ban ni kpann tiwann nmɔn a yomi le jigin naa?

¹⁰Ni ji iweehn nin iŋmal nin iyoo nin ibin a chiig le!

¹¹N san ni bijawaam le, maah tun nan ki jiin ni paamin nan gab yɔli bu.

¹²N nabum n balin ni le, ni li be ke min na, ke maah be ke nim man nin. Naa galimi.

¹³Ke naah nyi man nin, maah nan bu-n bu le n nan chinn ki mɔɔn tibɔŋann nan ki sei ni.

¹⁴Hali nin n wiɛn nmɔn kaah nan mugir ni nan biɛn na, amaa naa nan yim yɔli bee ki yii mi, ni gaam le ke Uwonbɔr a malaka-n, ki ji gaam ke Masiya[5] baantɔɔlin.

¹⁵Ni mɔmin biɛn be laa? N li fir ji siɛra ke, ni ye ni bi li fir ke, ni bi li chee ki logir ni numbili ki seim.

¹⁶Amaa daandaan nan n nin kpann ni dundaau le maah bei ni ibamɔn nin buu?

¹⁷Bininfob biba jɔɔ inunman ki ban ni ta ni baga ŋa bi ni, amaa naa ye ni ŋam bu le bi ŋaan nmɔn ni. Bi ban bin ta ni ŋa bicham ti ban, naah li ŋa man wee ni li jɔɔ inunman ki ta ni baga ŋa bi ni.

¹⁸Ni ŋan ni li jɔɔ inunman, ni ye ni tun nin ni ŋam bu, wee ni li ye man ki jɔɔ chaa ki laa ye n-yonn man wee n nan be ni ban a binba.

¹⁹N bijiɛkaam, ni wum le ke nmarwiɛn kaah choo upii ke ni wuu man nin, ki nan kpaa n-yonn man wee ni na li chegir Masiya a sam nan yaan.

²⁰N bi ban n li be ni ban daandaan nan wee ki mann kpenn n kukɔl, nan bu-n n lam ŋmarin le ni bu.

²¹Ni beim ni, nim ban ban nsiim li ŋmag ni nan, naa nyi nsiim nmɔn kaah len man naa?

²²Ni sɔb Uwonbɔr a gbɔŋin ke Abiraham nan jɔɔ nbijabum milee le, uba a na nan ye uyom le wan gurin mu a na nan ye upii wan ye uba.

²³U bija wan wee upiiyomin nan maa-n, u nan ma u le ke bininfob kaah maa man nin; amaa u bija wan wee upii wan ye uba-n nan maa-n, u nan ma u le ke Uwonbɔr kaah nan siin u mɔsiinl man nin.

²⁴Ni niɛ li fir ta, pag wonn a poolin ke, bipiib bilee nan si Uwonbɔr a poor a kerim milee a sisiimin le, uyom nmɔn a yinl li nan ye: Hega; le u si tipoor tan wee Uwonbɔr nan poo Sinai a jɔɔl a paabin a sisiim, le ki nan ma u big tiyomirin.

²⁵Daandaan nan Hega si ki sei Sinai a jɔɔl lan be Arabiya a tiŋin nin le, ki nann dulinya nan a Jerusalam le, nan bu-n u ma nin u buwaab be tiyomirin le.

²⁶Amaa Jerusalam kan be papaab nan ma ye u ba le, le ki ye ti na.

²⁷ Ni sɔb Uwonbɔr a gbɔŋin ke: “Upiiŋɔɔbee, che ni li mɔŋa, fin wan kaa la nyi ma nbuwaab nan; li yigin ki le sɔɔlin na, fin wan kaa la nyi nmarwiɛn a tom nan; nan bu-n upii wan a chal yii u nan a buwaab yab ki jon upii wan jɔɔ chal nan a buwaaba.”

²⁸N nabum daandaan nan ni nann Azig le, ni ye Uwonbɔr a buwaab le, U mɔsiinlin bu.

²⁹Iyaayoo nmɔn, baah nan ma wan ke bininfob kaah maa bi buwaab man nin, nan mugir wan wee bi ma u Kinaaŋ a pɔɔmin nin, ni ye man le daandaan nan.

³⁰Amaa Uwonbɔr a gbɔŋin bei ke nii? “Ŋɔɔr upiiyomin nin u bigin ki jaau, upiiyom a big nin upii wan ye u ba nan a big kaa li fir lagin por lifaali.”

³¹Mambu n nabum, taa ye upiiyom nmɔn a buwaabi, amaa ti ye upii wan ye u ba nan a buwaab le.