Read Konkomba Galantiya 5 Bible Online

Galantiya 5 - Konkomba bible

Galantiya 5

¹Ye n ba bu le Masiya nan nyan ti tiyomirin. Mambu mann sir nbamɔma, ki laa ji ta tiyomir a naajadaag paan a baa bu.

²Ni gbirim! Min Pɔɔl bei ni le ke ni ye ni la ŋmag lipunjiil a siimin ke, ni wɔɔn ke Masiya kaa jɔɔ tinyɔɔr tiba biɛn ki sei ni.

³N bei ni le jigin, uninfo biɛn wan ŋmag lipunjiil a siimin ke, ni kpaa le nin un ŋmag nsiim nmɔn biɛn.

⁴Nim ban pɔɔn ni ba ke Uwonbɔr n len ke ni bɔr ŋan nsiim a ŋmagim bu-n, ni pii bɔgir ni ba Masiya ban na, ki nyan ni ba Uwonbɔr a nyunyunbasanl n-yaan na.

⁵Amaa yada bu, le kinaaŋ sei ti npɔɔn le ti jɔɔ tama ki guu nbuchin binben a yonn.

⁶Ni ma bu Masiya[6] ban, taah jii ti pun bee taah kaa jii kaa kpaa talari. Nan kpaa talar le ye yada kan be npaanin nin njiɛm.

⁷Ni nan ti tun nbamɔm le. Ke ŋma ŋɔɔr ni ke ni laa ji nɔɔ ibamɔn nmɔn naa?

⁸Kularug nmɔn kaa nyan Uwonbɔr wan yin ni ban ni.

⁹“Boroboro a nyɔgim wama le che boroboro a yom fugir ki do.”

¹⁰Uyudaan bu n jɔɔ tidindann ke naa ji li jɔɔ lipotiɛl liba kpiɛ. Uninfo wan ŋmarin ni potiɛl nmɔn ke, Uwonbɔr li dar u daan a tul, ni baga kaa be waah ye wan ni.

¹¹N nabum, ni ye n la bi mɔɔn lipunjiil a bɔr le ke, ba ŋa wee bi ji mugirim maa? Ni ye man ke igalin yan nan ŋa lidapunpunl bu n gab yɔliu.

¹²Min bi ban ke bininfob ban mugir ni lipunjiil bu nan n bin jiɛn lipunjiil wee ki li faar bi bau.

¹³N nabum, Uwonbɔr le nan yin ni le ni kpann ban ye biba. Amaa ni li nyi ni nɔɔ ye nba nmɔn bu ki tun tigbanann a kɔlisa a toon; amaa ni li tun tenn tab nin njiɛma.

¹⁴Nsiim nmɔn biɛn li lagin ki ŋa lisiinjal lan len ke: “Li jiɛ a kunkɔɔn tab ke ŋaah jiɛ a ba man nin.”

¹⁵Ni ye ni gbaa boo tab ki tenn tab ndam ke, ni li nyi ke ni li bii tab.

¹⁶N bei ni le, ni li nɔɔ Kinaaŋ a binbema, wee tigbanann a bir a kɔlisa a toon laa be nin ni.

¹⁷Tigbanann kaah ban nan nin kaa chee sei kinaaŋ kaah ban nan nin ni, le kinaaŋ mu kaah ban nan nin kaa chee sei tigbanann kaah ban nan nin ni. I kɔn nin tab le, ni ma le che naa fir tun naah ban nan ni.

¹⁸Amaa ni ye kinaaŋin lii ni sam ke, nsiim kaa ŋmag ni.

¹⁹Tigbanann a binbem be npaan ni le, ni ma ye: Iwanchɔgin toon lipiibanlin bee lijabanlin, tijaginn a toon, nwanchɔgin binben,

²⁰nin libawol manil nin kusɔɔg; kininaŋ, likɔnl, lipiiponl, liŋuul, npooton a bam, kumaabiyiɛrug, nbɔgirim,

²¹nin linunchɔril, lidanyugbeel, nin lidanyugbeel a toonbir, nin ban tun man a booli. N bei ni le ke maah pii nan bei ni man nin, ban tun man nmɔn kaa na li kɔɔ Uwonbɔr a naamin ni.

²²Amaa kinaaŋin a looi le ye njiɛm, nmɔn, nposɔɔn, limɔril, tiŋann, nbinben ŋan, si nba bu,

²³nin jiininba, ki kpiɛ choonba. Nsiim nba kaa ji be wee ki li bii ban tun nan ni.

²⁴Masiya kaah ye ban nin ta tigbanann a kɔlisa nin bi binben biimin biɛn ki kpaa lidapunpunl buu.

²⁵Taah be kinaaŋin bu-n, ni che ti nɔɔ kinaaŋ nmɔn a tabogi.

²⁶Ni laa che ti li jɔɔ kalanbaani nin tab, bee ki fiin tab a ŋuui, bee ki li jɔɔ linunchɔril nin tabi.