Read Konkomba Efesusi 3 Bible Online

Efesusi 3 - Konkomba bible

Efesusi 3

¹Ni niɛ nan bu, le min Pɔɔl wan ye uloondiikɔɔr Masiya[4] nin ban kaa ye Juu yaabin bu-n.

²N nyi ke ni pii gbir ke Uwonbɔr a nyunyunbasanl a toon bu, le U nan ta litoonl nan seim ke n tun nim bu,

³ni ma ye waah nan kpiir tibɔwoonkaar ki wɔɔm, ke maah pii sɔb ti kugbɔŋ nan yaan wama-n.

⁴Ni ye ni karin maah sɔb nan nmɔn ke, ni li biɛ maah nyi Masiya a bɔwoonkaar man,

⁵Uwonbɔr kaa nan kpiir tibɔwoonkaar nmɔn ki wɔɔn n-yonn man nan jon nin a ninfobi, amaa daandaan nan Kinaaŋin kpiir tibɔwoonkaarin ki wɔɔn Uwonbɔr a kasi a tooi nin u linlema.

⁶U bɔwoonkaar nmɔn ye nan le, tibɔŋann nmɔn bu le ban kaa ye Juu yaabin fir ki lagin jin lifaal nin Iziral yaab, ki lagin ye gbanann tiba a ninfob, ki jɔɔ waah nan siin limɔsiinl lan Masiya bu-n ki por nin tab.

⁷Uwonbɔr a nyunyunbasanl bu le n kpann tibɔŋann nan a yomu Uwonbɔr a piini yan wee u seim u pɔɔm a toon yin nin.

⁸Min le joor kaa yabi Uwonbɔr a ninfob nmɔn biɛn a sisiigin, amaa ni biɛn yɔli, Uwonbɔr a nyunyunbasanl bu le U gannim ki seim nsan ke: N mɔɔn ki wɔɔn ban kaa ye Juu yaabin Masiya a jɔɔm man kaa li fir ban kan ni,

⁹ki che uninfo biɛn n mann biɛ Uwonbɔr a bɔwoonkaarin a toon kaah ye man, wee Uwonbɔr, wan nan naan niwann biɛn nin, nan ŋmag ti liwoolin n-yonn man nan jon nin.

¹⁰Uwonbɔr a boni nan ye le ke daandaan nan, biwonjiɛm a laguŋ bu, Uwonbɔr a lam a booli ye nin ta wɔɔn nnaam a pɔɔm nin tininkper a pɔɔm man be paabin,

¹¹Uwonbɔr nan ŋa ni niɛ nan ke waah gbeen u lolim man kaa jɔɔ diɛmin ti Yudaau Yisa Masiya nin.

¹²Taah ŋa Yisa yada ki be u ni nbu, le ti jɔɔ lipoobil ki li foo Uwonbɔr ban, nin tidindann.

¹³Ni ma bu, n balin ni le, ni laa che ni gbanann ngbɔɔ maah ji fala wan ni bu nni, ni ye kupag le sei ni.

¹⁴Ni niɛ nan bu le n gbaa n dun bu n Baa Uwonbɔr a nintogil,

¹⁵Uma ban le U niin yaab ban be papaab nin dulinya nan yaan biɛn a yin nyann.

¹⁶N miɛ Uwonbɔr le ke Un ta U jɔɔm a pagim ki pɔɔg ni gbanann nmɔn U Naaŋ kan be ni nin bu,

¹⁷wee Masiya li be ni sufu-n ni yada bu. Le n miɛ u ke un che ni fir ki sir nbamɔm ki baan inyaan njiɛmin,

¹⁸wee ni li jɔɔ npɔɔn nin Uwonbɔr a ninfob gannkaab biɛn ki fir biɛ Masiya a jiɛm a yiyalim nin mi fufɔgim nin mi kpikperim nin mi nyunyɔɔm kaah ye man,

¹⁹ki biɛ Masiya a jiɛm kaah jon nnyinyin biɛn man, wee nin gbeen nin Uwonbɔr a magim nin U binbenŋam ke naah gbeen Uwonbɔr ban man nin.

²⁰Uwonbɔr a pɔɔm kaah tun nin ti nbu, u li fir ki tun niwann biɛn ki sei ti ke nin jo taah tiɛr nan bu ki miɛ win,

²¹U ma Uwonbɔr ye kupag biwonjiɛm a laguŋ nin Masiya ni ki tan kpaa n-yonn man nan jon nin a ninfob biɛn, nin n-yonn man kaa jɔɔ diɛm nan! Ibamɔn.