Read Konkomba Efesusi 6 Bible Online

Efesusi 6 - Konkomba bible

Efesusi 6

¹Nbuwaab, Uyudaan bu ni li cheel ni baam nin ni nam a mɔba, ke man le ŋan.

²“Ni li tenn ni baa nin ni na jilimau,” ke ni ma ye chinchinn a siim ki kpiɛ limɔsiinl,

³“ke ni li ŋan ki sei ni wee ni li ji limiɛfol lan fɔg a mɔm dulinya nan yaan.”

⁴Bibaam, ni laa fiin ni buwaab a ŋuui; amaa ni tinn bi nbamɔma ki wɔɔn bi ti Yudaau a bɔr.

⁵Biyom, ni li jɔɔ limɔcheel nin jilima ki tenn ni dulinya a yudam ki li san bi bijawaam, ki li tun itoon ki tenn bi nin ni sufu biɛn, ke naah bi li jɔɔ limɔcheel ki tenn Masiya man nin.

⁶Ni laa jɔɔ limɔcheel ki tenn bi ke bi num ngbee ni n-yonn man wee bi be ni ban ni, amaa ni li jɔɔ limɔcheel nan li gbee Uwonbɔr a num nin ni sufu biɛn naah ye Masiya a yomin bu.

⁷Ni li tun biyom a toon kaah ye man nin ni sufu biɛn na wee ni li ye ke ni tun tenn Uyudaan le amaa naa ye bininfobi.

⁸Nan bu-n ni nyi ke Uyudaan na li yɔ uninfo biɛn u toon ŋan kaah ye man, ŋaah ye uyom bee ŋaah ye a ba.

⁹Le nim biyudam, ni mu li ŋaan ni yomi tiŋanna, ki laa kɔɔn bi bijawaami, ki li nyi ke nim nin bi ma a yudaau be papaab le, waa gann uba ki jiɛn u tɔ.

¹⁰Nan joor ye nan le, ni li jɔɔ ngbananpɔɔn nin Uyudaan nin u pɔɔn takpemin bu.

¹¹Ni ta Uwonbɔr a gbaginu ki yeeu wee ki fir to ulinlaril nin u lol birimin.

¹²Taa kɔnn nin bininfob ban ye tigbanann nin nchamin ni, amaa ti kɔnn nin nnaam a pɔɔm, nin tininkper a pɔɔm, nin dulinya nan a bunbɔnl a pɔɔm, nin nnaanbiim man be paabin a pɔɔm.

¹³Mambu ni ta Uwonbɔr a gbaginu-n ki yeeu, wee ni ye lidabiril daal nmɔn nan foon ke, ni fir baan ki sir, wee ni bɔɔn bu ni ye ni fir ŋa niwann biɛn ki yin sir ke.

¹⁴Ni mann ki baan sir nbamɔm, ki ta ibamɔn a changbam ki lol ni cham, ki li jɔɔ nbuchin binben man be ke tukur tan wee bi jɔɔ piig ligbingbanl bu-n,

¹⁵ki ŋaam sili ki ta tibɔŋann tan tenn nposɔɔn nin ki kpann inaatag ki tag.

¹⁶Nan kpiɛ ni niɛ nan biɛn bu ye, ni ta yada ki kpann nan li guu ni wee ni fir ki ŋmar ulinlaril a piin yan nyɔɔr nŋmi-n.

¹⁷Ni ta feeja kpann utɔtogir a jabig ki chig, nin Uwonbɔr a bɔŋann tan ye Kasi a Naaŋ a takoobi ki li ŋmag.

¹⁸Ni li miɛ Uwonbɔr Kinaaŋin ki li miɛ U nan yaan biɛn wee ni be nin liwonmiɛl lan a booli biɛn wee ni ban. Ki che ni niɛ nan li be ni sufu ni, ni li guu ni ba wee ki li miɛ ki tenn Uwonbɔr a ninfogannkaabin biɛn na.

¹⁹Ki li miɛ ki tenn n mu ni, wee ni ye n-yonn man n nan yaar n mɔb ke, n fir kan tibɔr ki mɔɔn tibɔwoonkaar nan ki laa san bijawaami,

²⁰tibɔwoonkaar nmɔn bu le n ye ntoon le bi lolim tikulor nan, ni li miɛ Uwonbɔr ki tenn ma, wee n fir ki mɔɔn tibɔŋann nmɔn naah kpaan nin n mɔɔn ti man ki laa san bijawaami.

²¹Ti nabig jiɛkaag Tachikusi wan ye ti Yudaau a toon tun bamɔndaau nan li wɔɔn ni n bɔr biɛn, wee ni mu nbiɛ maah ye wan nin maah tun nan.

²²Nan bu wee n nan tun u ni ban nin ye un nan wɔɔn ni taah be man, ki pɔɔg ni gbanann.

²³Ti Baa Uwonbɔr nin ti Yudaau Yisa Masiya a posɔɔm, nin u jiɛm, nin yada li be ti nabumin biɛn bu.

²⁴Uwonbɔr a nyunyunbasanl li be ban biɛn jiɛ ti Yudaau Yisa Masiya nin njiɛm man kaa jɔɔ diɛmin.