Read Konkomba Filipi 2 Bible Online

Filipi 2 - Konkomba bible

Filipi 2

¹Ni ye ni jɔɔ ngbananpɔɔn man nyan ni mɔkpaam man wee ni jɔɔ nin Masiya n ke, wee u bamin che ni sufu sɔɔn, wee ni jɔɔ nɔɔnintab nin kinaaŋin ke, wee ki jɔɔ nbinben ŋan nin tab ki san tab a nyunyunbaag ke,

²ni bi li mɔŋim pam ni ye ni potiɛl bi nann tab, wee ni jɔɔ njiɛm nba, ki jɔɔ kinaaŋ kiba nin ibonn iba.

³Ni laa jɔɔ npooton a bam bee ki far igbingban ni, amaa ni li jɔɔ jiininba ki li tenn ni kpiɛtiib jilima ki jo ni ba.

⁴Uba n laa che u baga be u binba a ŋam bu amaa un che u baga li be u kpiɛtiib mu a bam bu.

⁵Ni che ni binbem li be ke Masiya[2] a binbemin:

⁶U jɔɔ Uwonbɔr a nunaŋ le, amaa waa tiɛr ke un ta u ba kpaag nin Uwonbɔr bee niwann nan wee u li choo,

⁷amaa u ŋa u baa le ke waa ye niba le-n, le ki jɔɔ uyom a binbem, le ki jɔɔ uninfosaal a nunaŋ.

⁸Waah nan kpenn ki gaa uninfosaal a gbanann nin bu, le u nan jiin u ba tum, le ki chee nkum a mɔb, hali ki kpo lidapunpunl bu!

⁹Ni ma bu le che Uwonbɔr don u papaab le ki sei u liyinl lan yab jon iyin biɛn,

¹⁰ke ni ye bi nan pur Yisa a yinl ke idun biɛn li gbaan tum, papaab nin tum nin kutingbɔŋ kan be tumtum nan,

¹¹le lilanbil biɛn na li pag npaan ni ke Yisa Masiya le ye Uyudaan, wee Uwonbɔr wan ye ti Baa n kan kupag.

¹²Ni ma bu n jɔtiib, naah jɔɔ limɔcheel n-yonn man wee n be ni ban nin, ni le li jɔɔ limɔcheel nmɔn n-yonn man wee maa nan be ni ban na, ni tugir ki li tun ke bininfob ban kan nŋmarimin ki li san bijawaam ki li jegila.

¹³Uwonbɔr le tun nin ni le ki che ni tun ni U bamin ke waah ban ni tun man.

¹⁴Ni li tun niwann biɛn na ki laa ŋulin ni bee ki far limɔkpel nin tab bi,

¹⁵wee ki laa jɔɔ igalin ni ki li be kasi, ke Uwonbɔr a buwaab ban kaa jɔɔ igalin, naah be dulinya biig kan yaan nin titoonbirdam a sisiigin nin bu, wee ni li nyagin ke iŋmabil yan be kutingbɔŋ nan yaan nin,

¹⁶ke naah ta limiɛfol a bɔr wɔɔn bi man nin, naah li ŋa man wee n li fir fa ligbingbanl Masiya a jirin daal ke n taguunl nin n baginn kaa gab yɔli.

¹⁷Hali ni ye bi kpaarim le wur ke libawol a daam le bi ta mann kumanug ki jiin ni yada kan wee ni jɔɔ nin Uwonbɔr n bu ke, n pool peen le ni mɔm ni biɛn nan bu.

¹⁸Ni ma bu ni li jɔɔ npopeen wee ni li mɔ nin ma.

¹⁹N jɔɔ tama ke ni ye Uyudaan Yisa chee ke n li tun Timoti wee un dan ni ban weem, n mu bi li kan ngbananpɔɔn ni ye n gbir ni bu ke.

²⁰Maa ji jɔɔ uba ki kpiɛ u bu, wee u baga sin be ni ni ibamɔn nin.

²¹Ban gurin biɛn a baga be bi baantɔɔl a toon yin le, naa ye Yisa Masiya a toon yin ni.

²²Amaa ni tɔɔl nyi Timoti kaah pɔɔn u ba man, nan bu-n u be ke kibijag kaah be u baa a nintogil man nin le, u terim le tibɔŋann nmɔn a mɔɔnimin.

²³N jɔɔ tama ke n tun u ni ban le weem ni ye n biɛ n bɔr a sam ke.

²⁴Le n jɔɔ tidindann Uyudaan bu ke min tɔɔl li dan daandaan nan.

²⁵Amaa n tiɛr ke ni ŋan nin n che n na a big Ipaforɔditusi wan ye n toontunn kpiɛg nin n tɔtog kpiɛg wee ki ji ye ni toom wee ni nan tun u wee u nan terimin n jirin ni ban.

²⁶U bi ban un kan ni biɛn nan, u sufu kaa dɔ naah nan gbir ke u bu-n bu.

²⁷Ni sin ye ibamɔn le, u nan buŋ ki yin kpo le, amaa le Uwonbɔr san u kunyunyunbaag, naa ye u binba bu, amaa u ji nan san n mu kunyunyunbaaga, le ki nyam npoobiin a booli yin.

²⁸Ni ma bu n jɔɔ inunman ki ban un jirin ni ban, wee ni ye ni ji kan u ke nin mɔŋ ni wee n mu n nya n potiɛri nin.

²⁹Ni gaam u nin nmɔn takpen uyudaan a yinl bu, ki sei bininfob ban be ke u ma nan jilimau,

³⁰nan bu-n ni nan gur wama nin un kpo Masiya a toon yin bu, ki ta u miɛfol ki tun ki seim naah kaa bi li fir terim nan ni.