Read Konkomba Filipi 3 Bible Online

Filipi 3 - Konkomba bible

Filipi 3

¹Ni joorimin n nabum, ni che ni li mɔ ni Uyudaan buu! Naa ye tibɔr mugkaar ki seim nin n ji sɔb maah nan sɔb nan sei ni-n jigin ni, ni ma yin guu ni.

²Ni li nyi bininfob ban ye ibɔ nan, ki ye titoonbirdam wee ki jiil bi gbanann chɔr nan bu.

³Tim le ye ban gaa ibamɔn a pun jiil nmɔn, tim ban jiɛn Uwonbɔr kinaaŋin nin, le ki jɔɔ jilima taah be nin Masiya[3] n bu, tim kaa jɔɔ tidindann tigbanann bu,

⁴min tɔɔl jɔɔ nan bu che n jɔɔ ti ma a dindann. Ni ma bu ni ye uninfo uba len ke u jɔɔ tidindann tigbanann bu ke, min jɔɔ takpem ki jon wa:

⁵Baah nan mam a ween iniin daal le bi nan jii n punl, n ye Iziral a ninfou le, ki nyan Bɛnjamɛnn a bolin, ki ye Hiiburu a ninfou tob tob; ki jiin nsiim mu paam ke, n ye Farasii le;

⁶ni ye nsiim nmɔn a ŋmagim a nunmanl bu ke, n nan mugir biwonjiɛm a laguŋ; ni ye nbuchin binben nin limɔcheel ki tenn nsiimin ke, maa jɔɔ igalin ni.

⁷Amaa nan biɛn nan ye tinyɔɔr ki seimin daandaan nan min lig ki miin ni ye yɔli le, Masiya bu.

⁸Ni la yab ki jon ni tɔɔ, maah ta niwann biɛn gab nin maah gaa Masiya n yudaau wan jɔɔ tinyɔɔr ki jon niwann biɛn nin, uma bu le n ta niwann biɛn gab. Min ban ke ni ye lifatanpol a mɔɔr le naah li ŋa man wee n fir ki gaa Masiya,

⁹wee ki li be nin u, wee ki laa jɔɔ min tɔɔl a buchin binbem man nyan nsiimin yaan ni, amaa maah ŋa Masiya yada n bu le n jɔɔ nbuchin binben man nyan Uwonbɔr ban n yada n bu.

¹⁰N ban n li nyi Masiya le nin u kum a fiim a pɔɔmin ki li jɔɔ nɔɔnintab nin u, ki ji fala wan wee u nan jin nin, ki li be ke uma nin u kumin,

¹¹ni ye niwann biɛn ke, n na li kan nkum a fiim.

¹²Naa wɔɔn ke min nyaŋ ni niɛ biɛn le, bee min yaa binbem ŋan ki tan diɛ, amaa n pɔɔn nba le ki gbaar n choo nan bu wee Masiya nan choo min.

¹³N nabum, maa tiɛr ke n baan tɔɔl a nɔɔ la ŋub ni. Amaa maah ŋa man ye nan le: N tam nan pii tun jon nin bu le ki gbaar ban nan la be n nintogilin bu,

¹⁴n jɔɔ inunman le ki gu chaa n num kaah paa nan bu-n ban ke n tan pii tiyɔr tan bu wee Uwonbɔr yim papaab Masiya bu-n.

¹⁵Tim ban biɛn chegir Uwonbɔr a samin nin li jɔɔ potiɛl liba ti sufu ni. Ni ye ni potiɛi kaa nan chee nan bu ke, Uwonbɔr li che ni biɛ ni taai.

¹⁶Ni le yin che ti li be nin taah nan kan nan nin.

¹⁷N nabum, nim nin ni tabin biɛn li nɔɔ maah mag man ki wɔɔn ni nna, wee ki biɛ ban a binbem nɔɔ nsan man wee ti nan sei ni-n.

¹⁸A li ke maah pii gbaa bei ni man nin, hali ki nin bei ni nin tinyinyinn ke, bininfob biba a binbem ŋa Masiya a dapunpunlin a dataag le.

¹⁹Bi na yin joor nŋmi-n le, bi weem le ye bi pooi, le bi pag ye bi fai. Bi potiɛl biɛn be dulinya nan a wan yɔɔrin le.

²⁰Amaa tim ye papaab a tinbum le. Ti ŋa sili le ki guu ufeer wan yin nya niin ki dan nin, Uma ye Uyudaan Yisa Masiya,

²¹Uma wan ta u pɔɔm ki lagin niwann biɛn u nintogilin, u li kpenn ti gbanann tan kaa pɔɔ-n ki ŋa ti u jilima a gbanann.