Read Konkomba Filipi 4 Bible Online

Filipi 4 - Konkomba bible

Filipi 4

¹Ni ma bu n nabum, nim ban wee n ban wee ki yuur ni kam nan, nim li ye n mɔm nin n naan yuchigirig, njɔtiib, ni ma bu le ni kpaan ni mann sir nbamɔm Uyudaan a samin!

²N balin Yuwodiɛ le ki balin Sintiche ke, Uyudaan bu bin pɔɔn biba ki li jɔɔ nmɔkpaau.

³Ni ye ibamɔn le n bei nim ban ye n naajadaag tug tab bamɔm nan, ni ter bipiib ban pɔɔn biba ki kpiɛ n bu wee ti mɔɔn tibɔŋann nan na, nin Kilɛmenn nin ban biɛn ye n toontunn tabin, wee bi yin be limiɛfol a gbɔŋin yaan nin.

⁴Ni che ni li mɔ ni naah be Uyudaan nin iyoo biɛn na. N ji yin mann bei ni le ke: Ni che ni li mɔ na!

⁵Ni ta ni binbenŋamin ki che ni li ye siɛra ki sei bininfob biɛn na. Ke Uyudaan malin na.

⁶Ni laa jɔɔ npotiɛ bii-n ni niwann niba bu, amaa ki li miɛ Uwonbɔr naah ban nan bu, ki li tenn U kunɔɔpoog, ki bei U naah ban nan.

⁷Le Uwonbɔr a posɔɔm, man yab ki lagir uninfosaal a biɛm bu-n le che ni ŋmag Masiya[4] ni sufu ni nin ni potiɛlin.

⁸Ni joorimin, n nabum, nan ye ibamɔn, nin nan ye jilima, nin nan ŋan, nin nan be kasi, nin nan ye njiɛm, nin linungbeel, ni ye niwann ŋan ki tan lagir bee ki be kasi ke, ni li tiɛr tiwann nmɔn buu.

⁹Niwann nan wee ni tinn n ban bee ki gaa n ban bee ki gbir n ban nin ni li jɔɔ tun itoon na man. Wee nposɔɔn a Wonbɔr win li be nin ni.

¹⁰Uyudaan bu ni mɔŋim pam nin n-yonn takpem man jon wee ni ji nan mann wɔɔn ni baga kaah be n ni man. Ni ye ibamɔn le, ni baga be n ni, amaa naa jɔɔ npaan man wee ni ta wɔɔn le.

¹¹Naa ye maah lann niba bu le n pag man nin, amaa n tinn le ki che n num gbee maah jɔɔ nan n-yonn biɛn nin.

¹²N nyi maah kaa nan jɔɔ niba ke ni ye man, ki ji nyi maah nan jɔɔ takpem mu ke ni ye man. N tinn le ki nyi liwool lan ye linungbeel naah ye man niwann biɛn nin, ni baga kaa be maah jin gbee bee maah choon nin nkomi, ni baga kaa be maah jɔɔ takpem bee maah kaa jɔɔ.

¹³N li fir tun niwann biɛn Masiya kaah seim ngbananpɔɔn man nin bu.

¹⁴Amaa ni nan tun tiŋann pam nin naah nan terim n bɔr mugkaarin.

¹⁵Nan kpiɛ ni bu, nim Filipi yaab nyi, maah nan nyan Masedoniya, n-yonn man nan jon wee n nan chonn mɔɔn tibɔŋannin nin, biwonjiɛm a laguŋ kiba kaa la nyi ki terim niba nseimin nin ngamin ni, see nim a binba;

¹⁶hali maah la nan be Tesalonika n-yonn man wee ki nan ban literilin, ni le nan gbaa terim le.

¹⁷Naa ye n ban ipiin le, amaa n ban ni kan tinyɔɔr tan yin kpiɛ naah jɔɔ nan nin le.

¹⁸N gaa tiyɔr takpem ke ti yab tan lagira; n nin jɔɔ nan biɛn wee n ban, maah gaa ipiin yan biɛn wee ni nan ta sein Ipaforɔditusi n ni. Ki ye kumanug kan jɔɔ nbaam mɔɔm wee Uwonbɔr a num gbee le.

¹⁹Le n Wonbɔru li ta U jilima a jɔɔm man be Masiya nin ki sei ni.

²⁰Ti Baa Uwonbɔr n gaam kupag n-yonn nin n-yonn. Ibamɔn.

²¹Ni poor Uwonbɔr a ninfogannkaabin biɛn Masiya a yinl buu. N nabum man be n ban nin poor ni.

²²Uwonbɔr a ninfogannkaab biɛn poor ni, naah tɔɔ ban bu ubɔr Siiza a niin yaab ke n poor ni nbamɔma.

²³Uyudaan Yisa Masiya a nyunyunbasanl li be ni naamin. Ibamɔn.