Read Konkomba Kolosiya 1 Bible Online

Kolosiya 1 - Konkomba bible

Kolosiya 1

¹Pɔɔl wan ye Masiya[1] a toom Uwonbɔr a bam bu-n, nin ti na a big Timoti,

²Le sɔb kugbɔŋ nan ki tenn nim ban ye ti nabum ban be kasi ki si bogil liba Masiya ni Kolosiya a tiŋin ni. Ti Baa Uwonbɔr a nyunyunbasanl nin u posɔɔm li be nin ni.

³Ti tenn Uwonbɔr wan ye ti Yudaau Yisa a Baa-n kunɔɔpoog, iyoo yan biɛn wee ti miɛ Uwonbɔr ki tenn ni-n,

⁴nan bu-n ti gbir naah ŋa Yisa yada man, nin naah jiɛ Uwonbɔr a ninfo gannkaabin man na,

⁵yada nin njiɛm man bun ki nya tama kan dɔ papaab ki guu ni, wee ni pii gbir ibamɔn a mɔleen yan ye tibɔŋann nin,

⁶wee ki dan ni ban nin. Tibɔŋann nmɔn lo iloon le ki yabirig dulinya nan yaan biɛn, ke naah nan ti tun man ni sisiigin lidaal lan wee ni nan gbir ti, ki biɛ Uwonbɔr a nyunyunbasanlin nin libamɔn yan be ipoolin nin biɛn.

⁷Ni nan tinn Uwonbɔr a nyunyunbasanl nmɔn ti toontunn kpiɛg Epafarasi wan wee ti ban win ban le, wan sir ti taalin ki ye Yisa a toontunnu wan si bogil liba-n,

⁸le uma ji bei ti naah jɔɔ njiɛm Kinaaŋin man.

⁹Ni niɛ nan bu, lidaal lan wee ti gbir ni bu-n, taa ta Uwonbɔr a miɛm ni bu ki jiɛn ni, le ki le miɛ Uwonbɔr ke Un gbeen ni nnyinyin man ye u bam ki sei ni kinaaŋ a lam nin nbiɛm.

¹⁰Ti miɛ ni niɛ le ke ni fir be nbinben man kpaan ki gbee Uyudaan a num niwann biɛn nin: Ki lo iloon yan ye itoon ŋan biɛn a looi, ki yabirig nin Uwonbɔr a nyinyim.

¹¹Uma Uwonbɔr wan jɔɔ ipɔɔn biɛn nan n pɔɔg ni gbanann, U pag takpoŋin bu wee ni li jɔɔ pɔɔninba nin limɔril nin nmɔn,

¹²wee ni li tenn ti Baa Uwonbɔr kunɔɔpoog, wan sei ni npaan ke nim nin uninfo gannkaabin nan por lifaal lan be nwonween a naam a yerin nin yaan nin.

¹³Nan bu-n U fee ti libunbɔnl a pɔɔmin na, le ki ta ti ki kɔɔn u bijiɛkaag a naam a yerin nin,

¹⁴U big nmɔn le sei ti nkpenim a manug kan ye tibir a jiɛn per.

¹⁵Masiya le ye Uwonbɔr wan wee taa ga win a nunaŋ, uma ye kibininkpeeg kan yab jon kuwonaaŋ biɛn.

¹⁶Uma bu le niwann biɛn nan naan: Nan be papaab nin tum, nan wee ti ga nin nan wee taa ga, naah ye kunaangbɔŋ bee ipɔɔn bee nnaam a pɔɔm bee tininkper a pɔɔm; uma nan naan niwann biɛn le ki ye niwann biɛn.

¹⁷U nan be ke niwann niba kaa la nan be, uma bu le niwann biɛn choo tab ki ŋmag.

¹⁸Uma ye tigbanann a yudaau, biwonjiɛm a laguŋ; ki ye npiinim nin kibininkpeeg kan nyan bitakpiib a sisiigin. Naah li ŋa man wee u li ye wan chinn niwann biɛn ni.

¹⁹Nan bu-n, Uwonbɔr nan jɔɔ linungbeel le u bu, U binbemin biɛn kaah nan gbee u ni-n.

²⁰Uma bu le Uwonbɔr nan che niwann biɛn jir mɔŋ nin tab, Yisa a cham man nan nyan lidapunpunl bu-n le che nposɔɔn dan.

²¹Iyoo iba naa nan kpiɛ Uwonbɔr a ninfobin ni, ki ye Uwonbɔr a dataam ni potiɛlin nin ni binben biimin bu.

²²Amaa daandaan nan, Masiya a gbanann a kum nbu le Uwonbɔr jir ki mɔŋ nin ni, ke Un ta ni sei wee ni li be kasi u numin, ki laa jɔɔ tijaginn wee bin galin ni,

²³ni ye ni yin gbaa be nin ni yada ke, ki si chib, kaa fɔɔr tama kan wee tibɔŋann nin ŋmagin ke, ti ma ye tibɔŋann tan wee ni gbirin, wee bi mɔɔn ti sei kuwonaaŋ biɛn dulinya nan yaan, tan bu wee min Pɔɔl kpann utoontunn.

²⁴Daandaan nan ni mɔm, nin maah jin fala kan nim bu-n, le n la gbee nin fala nmɔn le n gbanann nin ki jin nan la paar Masiya a fala a jimin paam, u gbanann nmɔn le ye biwonjiɛm a laguŋ.[2]

²⁵N nin kpann biwonjiɛm a laguŋin a toontunnu le, litoonl lan wee Uwonbɔr ta seimin, ke n ta U mɔleen yin biɛn ki sei ni,

²⁶tibɔwoonkaar tan wee Uwonbɔr nan woon ibin nin n-yonn man nan jon nin, amaa wee U nin kpiir ki wɔɔn U ninfogannkaabin daandaan nan.

²⁷Bininfogannkaab nmɔn le Uwonbɔr nan gann ke bin kpiir liwool a bɔrin ki wɔɔn ban kaa ye Juu yaabin, liwool a pag kan yabin, ni ma ye Masiya wan be nin ni-n, ki ye kupag a tama-n.

²⁸Yisa nmɔn le ti mɔɔn, ki kpaan bininfob ki wɔɔn bi nlam a booli biɛn, naah li ŋa man wee ti ŋa uninfob biɛn kasi ki sei Uwonbɔr, Masiya ni.

²⁹Ni niɛ nan bu le n tun ki gbaar nin u pɔɔm biɛn man pɔɔ lagir ki be nni ki tun nin.