Read Konkomba Kolosiya 2 Bible Online

Kolosiya 2 - Konkomba bible

Kolosiya 2

¹Nan bu-n n ban ni biɛ maah gbaar nim nin Laodisiya yaab bu man le, nin ban kaa laa nyi kan min tɔɔlin.

²N lol ye n che bi sufu le npɔɔg, wee bi lagin tab nin njiɛm, wee bi li jɔɔ nbiɛm man yab, wee ki li fir biɛ Uwonbɔr a bɔwoonkaar ti ma ye Masiya,

³uma ban le nlamgɔrikaam nin nnyinyin gbee le ki woo.

⁴N bei ni ni niɛ le, ni laa che uba n ta limɔkpel lan nann ibamɔn nin ki lar ni.

⁵Nan bu-n, hali maah kaa be ni ban nin tigbanann ni, n be ni ban kinaaŋin le ni mɔm, le ban n kan naah si nbamɔm man nin naah ŋmag ni yada-n man kenken Masiya ni.

⁶Ni ma bu, naah pii nan gaa Masiya[3] ke Uyudaan nan, ni li gbaa be u ban na,

⁷ki baan inyaan ki yabig nin uma, ki pɔɔg ni yada-n ke baah nan wɔɔn ni man nin, ki che ni nɔɔpoog li yaba ki tenn Uwonbɔr.

⁸Ni laa che uba n ta uninfosaal a biɛm man kaa jɔɔ nyɔɔrin ki lar ni kɔɔn tiyomirin ni, ni ma nyan bininfob a kaalin le nin kutingbɔŋ nan a maabiyiɛrugin, naa nyan Yisa ban ni.

⁹Ni ma bu Uwonbɔr a nunaŋ be Masiya a gbanann nin le waah nan ye uninfo-n,

¹⁰le Uwonbɔr ta Masiya le ki gbeen ni, wan ye npɔɔn biɛn nin tininkper a pɔɔm a yudaau win.

¹¹Masiya ni le ni kan lipunjiil, ki nyan tibir a binbemin, naa ye lipunjiil lan wee bininfosaalib ta bi nɔɔi ki jii amaa Masiya le jii ni

¹²n-yonn man wee bi nan lagin pii ni nin Masiya Uwonbɔr a nyunfulin ni, wee ni ji fii nkumin nin Masiya ni yada-n Uwonbɔr a pɔɔm man nan fii-n u nkumin ni.

¹³Ni nan ye bitakpiib le ni birin n-yonn iba, le kaa jɔɔ lipunjiil a bir a binbemin, le Uwonbɔr che ni jɔɔ limiɛfol Masiya ni. Le ki jiɛn per ti biɛn nan a bir,

¹⁴Uwonbɔr nan pir nsiim nin mi sɔbim man kaa nan chee sei ti-n, wee ki kɔn nin ti nle ki choo mi nyan le ki kpaa mi lidapunpunl bu.

¹⁵Masiya kaah nan nyaŋ bitindam nin tininkper a pɔɔmin, u nan nyan bi npaan ni le ki che bininfob biɛn kan bi le ki ŋa bi tiyomirin waah nan nyaŋ bi lidapunpunl bu-n.

¹⁶Mambu, ni laa che uba n ji ni tibɔr naah ji tijiir tan bee naah nyu nan bu bee ki jiin liwonjiɛnl a chiig paam bee uŋmapɔɔn a chiig bee likpakɔɔl daal a chiig bu.

¹⁷Ti nan le ye tiwann tan yin dan nin a jinjiim amaa niwann bamɔn nin be Masiya ni le.

¹⁸Ni laa che uba n ta tibɔkar a jiininba nin malakam a jiɛnim ki lar ni wee ni lann ni yɔri. U yaa daan nɔɔ waah ga nan biɛn tininforin nin le, naa ye kinaaŋin ni, u donn uba u potiɛlin le naa jɔɔ bu.

¹⁹Waa ji tug nin Masiya wan ye ni yulin ni, wan bu wee tigbanann biɛn tugin, uma ŋmag tigbanann le ti ŋmag tab nin tijiin, le ti yabirig ke Uwonbɔr kaah ban ti li yabirig man.

²⁰Ni nan lagin ki kpo nin Yisa ki sei kutingbɔŋ a maabiyiɛrugaa, ba ŋaa wee ni la be ke ni ye kutingbɔŋ nan a ninfob lee, ni chee sei kutingbɔŋ nmɔn a siim man ke:

²¹“Laa ŋmagi! Laa lenn ni! Laa maa n lee!”?

²²Ni niɛ nan biɛn ye ti wonleen le ki yin boon nin taah jɔɔ nan tun, nan bu-n ni ye uninfosaal a siim nin nwɔɔm le.

²³Ibamɔn, nsiim nmɔn nann man jɔɔ nlamgɔrikaam le, nin bi tɔɔl a bam a wonjiɛnl, nin bi bɔkar a jiininba, nin baah mug ki ŋmag bi gbanann man, amaa baa ŋmag nsiim man jɔɔ tinyɔɔr ki li nyan bi tigbanann a kɔlisa nin ni.