Read Konkomba 1 Tesalonika 1 Bible Online

1 Tesalonika 1 - Konkomba bible

1 Tesalonika 1

¹Min Pɔɔl nin Silasi nin Timoti; Le sɔb kugbɔŋ nan ki tenn Tesalonika a wonjiɛm a laguŋ kan wee ti Baa Uwonbɔr nin ti yudaau Yisa Masiya ye-n; Uwonbɔr a kaar nin nposɔɔn li be nin ni.

²Ti le poor Uwonbɔr le ni biɛn nan bu, ki tiɛr ni bu ti wonmiɛlin.

³Ti tiɛr ni bu ti Baa Uwonbɔr ban, ni yada a ŋaam nin ni jiɛm a toon nin ni tama kan wee ni jɔɔ nin ti Yudaau Yisa Masiya nbu le che ni si nbamɔm.

⁴Ti nabum, ti nyi ke ni ye ban wee Uwonbɔr ban le, ki gann ni ki ta ni ŋa U ninfob,

⁵nan bu-n tibɔŋann tan foon ni ban nin, kaa nan ye imɔleen a binba, amaa ti nan jɔɔ npɔɔn le nin Kasi a Naaŋ. Le ban nan mɔɔn ti-n chee ti nin yada. Taah nan be ni ban nin, ni nan nyi ti binbem kaah ye man nim bu.

⁶Ni nan toog tim nin ti Yudaau a binbem le; nin naah nan ji fala kan nin biɛn yɔli, ni nan gaa tibɔŋann nmɔn le nin npopeen man wee Kasi a Naaŋ ta sei ni-n.

⁷Ni ma bu le che nim kpann limagil ki sei biwonjiɛm ban biɛn be Masedoniya nin Akaya a timin.

⁸Ti yudaau a bɔŋann nmɔn kaa nan nyan ni ban ki kɔɔ Masedoniya nin Akaya a binba le, amaa naah ŋa Uwonbɔr yada kan nin pii kɔɔ ilog nan biɛn na. Ni ma bu naa ji kpaan ti pag ni ki kpiɛ,

⁹bininfobin biɛn pag ki jiin naah nan gaa ti man, taah nan dan ni ban n-yonn man nin, nin naah nan jiɛn ni bawoli ki dan Uwonbɔr ban man, ke ni jiɛn Uma ibamɔn a Wonbɔru wan fo-n,

¹⁰ki li guu U bija wan yin nyann papaab ki dan nin, wan wee U fiin nkumin nin, Uma ye Yisa wan nyan ti Uwonbɔr a ŋuufiiŋ kan chaan nin yaan.