Read Konkomba 1 Tesalonika 3 Bible Online

1 Tesalonika 3 - Konkomba bible

1 Tesalonika 3

¹Taah kaa ji nan na li fir ŋmag tiba n-yonn man nin, le ti nan tiɛr ke ni ŋan nin ti laan paar Atensi ti binba.

²Ti tun Timoti wan ye ti toon tun kpiɛg Uwonbɔr a toon n-yaan wee ki mɔɔn Masiya a bɔŋann nle ni ban, ke un nan pɔɔg ni gbanann nin ni yada-n,

³wee u ba n laa lu u yada-n limugil nan bu. Ni tɔɔl nyi ke ni ye Uwonbɔr a wiib le ke ti kan limugil nmɔn a booli.

⁴Ibamɔn, taah nan be ni ban nin, ti le nan gbaa bei ni ke ti li kan limugil. Le ni sin tun ke naah nyi ni bu nbamɔm man nin.

⁵Ni ma bu ni che maah kaa ji nan na li fir ŋmag n ba-n, le n nan tun ke bin nan lig ni yada kaah si man. N nan san bijawaam le ke, nba ke ulinlaril n par lar ni wee ti yaa baginn n gab yɔli.

⁶Amaa Timoti le la nyan ni ban le ki foon ti ban ki ŋmagin tibɔŋann ki ta jiin ni yada nin ni jiɛm paam. U bei ti ke ni le la tiɛr ti bu le ki bi ban ni kan ti, ke ti mu kaah le ban ti kan ni man nin.

⁷Mambu n nabum, nin ti mugil nin ti fala a jimin biɛn nin, ti jɔɔ ngbanann pɔɔn ki jiin ni yada kan wee ni jɔɔ n paam.

⁸Daandaan nan, naah si nbamɔm Uyudaan a samin nan man, ti sin fo.

⁹Ipoor takpen ilaba wee ti yin ta sei Uwonbɔr ni buu ki jiin nmɔn man biɛn wee ti jɔɔ Uwonbɔr a nintogil ni buu?

¹⁰Nween nin kunyiɛg ti le miɛ Uwonbɔr ki bi ban ti kan ni jigin wee ki ter ni nan par ni yada-n.

¹¹Ti Baa Uwonbɔr baan tɔɔl nin ti Yudaau Yisa n mann nsan ki sei ti wee ti dan ni ban.

¹²Uyudaan n che njiɛm man wee ni jɔɔ ban ni tabin n mann tann ki pii uninfo biɛn, ke ti yaa bamin kaah be nin ni man nin.

¹³Un pɔɔg ni sufu wee ni laa jɔɔ igbarigi ki li be kasi ti Baa Uwonbɔr a nintogil n-yonn man wee ti Yudaau Yisa na li foon nin u kasi a ninfobin.