Read Konkomba 1 Tesalonika 5 Bible Online

1 Tesalonika 5 - Konkomba bible

1 Tesalonika 5

¹Daandaan nan, n nabum, naa kpaa talar nin ti sɔb ki wɔɔn ni n-yonn bee idaa,

²nan bu-n ni nyi nbamɔm ke Uyudaan a dan daal na yin be le ke unaayig kaah chaan kunyiɛg man nin.

³N-yonn man wee bininfob li len ke “Nposɔɔn dan na bi gaa bi ba-n,” libol nmɔn le tibɔbir li dan bi bu, ni na yin be le ke nmarwiɛn kaah choo upii ke ni be man nin, le baa li ŋmari.

⁴Amaa nim, n nabum nan ma, naa be libunbɔnlin ni, mambu ni laa che lidaal nmɔn n nan lir ni ke unaayig a dan ni.

⁵Ni biɛn nan ye nwonween nin nweehn a buwaab le. Taa ye kunyiɛg bee libunbɔnl a ninfobi.

⁶Ni ma bu, ni laa che ti be ke bitab kaah be man ki dɔ jiɛn ni ni, amaa ni che ti li lig ki li chor ti bau.

⁷Ban dɔ jiɛn nin jiɛn kunyiɛg le, ban mu nyu ndaam gbeegin mu nyugbeeg kunyiɛg le.

⁸Amaa tim kaah ye nweehn a ninfobin, ni che ti li chor ti bau, ki li jɔɔ yada nin njiɛm man li guu ti gbanann, ki li jɔɔ nŋmarim a tama man wee ti li ta chig ti yul bu ke kijabig.

⁹Uwonbɔr kaa gann ti ke ti nan ji fala le U ŋuufiiŋin ni, amaa ke ti nan kan nŋmarim ti Yudaau Yisa Masiya bu.

¹⁰U kpo tim bu le, a lig le bee a jiɛn le ke ni, ti na li lagin ki be nin U.

¹¹Ni ma bu ni li pɔɔg tab a gbanann ki li kpiɛg tab bu ke naah pii ŋaan man nin na.

¹²N nabum, ti balin ni le, ni li tenn ban pɔɔn biba ni sisiigin ki ye ni sanliib Uyudaan a samin ki wɔɔn ni nwonjiɛn binben nin jilimau.

¹³Ni li tenn bi jilima takpema, ki li jɔɔ njiɛm nin bi toon yin bu. Ni li be nin nposɔɔn nin taba.

¹⁴Ti balin ni le, n nabum, ni kpaan ban ye bigbanyagdamin na, ki pɔɔg ban san bijawaamin a sufuu, ki ter ban a yada kaa pɔɔ-n, ki li jɔɔ limɔril nin uninfo biɛn na.

¹⁵Ni laa che uba nta tibir ki yɔ tibiri, amaa ni pɔɔn niba ki li jɔɔ nbinben ŋan nin tab nin uninfo biɛn.

¹⁶Ni che ni li mɔ ni iyoo biɛn na;

¹⁷Ni li miɛ Uwonbɔr iyoo biɛn na;

¹⁸niwann biɛn a poolin ke ni li poor Uwonbɔr a, Uwonbɔr a bam le yen ki sei ni Masiya[3] bu.

¹⁹Ni laa junn Kinaaŋ a ŋmiimin ni;

²⁰ni laa yin ilinlen leen yɔli.

²¹Ni mag i biɛn liga, ki gann yan ŋan ki li ŋmaga.

²²Ni nyan niba tibir biɛn a tumin na.

²³Che Uwonbɔr tɔɔl, wan ye nposɔɔn a Uwonbɔr win n ŋa ni kasi niwann biɛn nin. Ki che ni naaŋ nin ni sufu nin ni gbanann biɛn n laa nan jɔɔ igbarig ti Yudaau Yisa Masiya a dan daali.

²⁴Uwonbɔr wan yin ni nan li tun man, U ye yada daan le.

²⁵N nabum, ni li miɛ Uwonbɔr tenn ta.

²⁶Ni poor ti nabumin biɛn nbamɔma.

²⁷N bei ni le Uyudaan a nintogil ke ni karin kugbɔŋ nan ki sei n nabumin biɛn na.

²⁸Ti yudaau Yisa Masiya a nyunyunbasanl li be ni bu.