Read Konkomba 2 Tesalonika 1 Bible Online

2 Tesalonika 1 - Konkomba bible

2 Tesalonika 1

¹Min Pɔɔl nin Silasi nin Timoti, Le sɔb kugbɔŋ nan ki tenn biwonjiɛm a laguŋ kan be Tesalonika ki be nin ti Baa Uwonbɔr nin ti Yudaau Yisa Masiya bu:

²Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be ni bu.

³N nabum, ni ye ti poor Uwonbɔr le ni bu, ni ŋan nin ti ŋa man, nan bu-n ni yada-n le mann yabirig le takpem, le njiɛm man wee ni jiɛ tabin mann kpiɛg le.

⁴Ni ma bu Uwonbɔr a ninfob a laginn nan a sisiigin, ti far ligbingbanl le ni bu nin naah jɔɔ limɔril nin yada limugil nin libiginl biɛn a poolin wee ni la biɛ nin jɔɔ yada n bu.

⁵Ni niɛ biɛn ye siɛra le ki wɔɔn ke Uwonbɔr a bɔjil ŋan, le ni joorimin bi li kan ni ki kpiɛ bininfob ŋamin Uwonbɔr a naam man bu wee ni ji fala nan.

⁶Uwonbɔr ye ubuchin le: Ban mugir ni-n, U li yɔ bi ki jiin,

⁷ki sei nim ban wee bi mugir ni-n lifooril, nin ti biɛn. Ni na yin ŋa n-yonn man wee Uyudaan Yisa nan kpiir ki nyan papaab nin nŋmipeen nin u malakam ban jɔɔ npɔɔn nin.

⁸U li dar ban kaa nyi Uwonbɔr a tuli nin ban kaa ŋa ti Yudaau Yisa a bɔŋann nin yada-n.

⁹Bi li ji fala wan kaa jɔɔ ndiɛmi bi tudaril nmɔn a poolin. Uwonbɔr na li ŋɔɔr bi ki nyan Uyudaan ban ki che bin lann u pɔɔm man jɔɔ jilima-n,

¹⁰lidaal lan wee u nan dan un nan gaa u pag kasi a ninfob nin u jilima ban biɛn ŋa u yada-n ban nin. Ni tɔɔl kpiɛ niin na, ni ŋa tibɔr tan wee ti pag sei nin yadau.

¹¹Naah be ti sufu-n nin bu, le ti miɛ Uwonbɔr ki tenn ni iyoo biɛn, ke ti Wonbɔru n ŋa ni bininfob ŋam ke waah yin ni ki ban ni li be man nin, ki che naah tiɛr nan biɛn n ŋa n ŋam ki sei ni u yaa pɔɔm bu, ki che ni gbaar ni yada a toonlin.

¹²Ti miɛ Uwonbɔr le ke un che ti Yudaau Yisa a yinlin kan kupag ni ni, wee ni mu n kan kupag u ni, ti Wonbɔru nin Uyudaan Yisa Masiya a nyunyunbasanl bu.