Read Konkomba 2 Tesalonika 2 Bible Online

2 Tesalonika 2 - Konkomba bible

2 Tesalonika 2

¹Ki jiin ti Yudaau Yisa a dam paam nin taah na yin lagin U ban man, le ti balin ni ke, n nabum,

²ni laa che nin ŋmarin ni potiɛli, bee ki yugin ni lam ki ta jiin ilinlen leen yan wee bibam pag bee tibɔr beikaar bee kugbɔŋ kan nyan bi ban ki ke tim ban le ki nyan nin. Imɔleen yan forin nin kaah len ke ti Yudaau a dam a daa-n pii foon nin bu.

³Ni laa che uba n ta niba lar ni, lidaal nmɔn kaa la yin foo see ke wan kɔnn nin bininkpeeb nin limɔyiildaan nin nyan npaan ni, wan a binbebol ye nŋmi-n nin.

⁴Waa yin chee sei iween yan wee bi jiɛn nni, le ki sin yuur uba paab ki jo iween nmɔn, le ki ta uba ki siin Uwonbɔr a binbebol ki ke u ye Uwonbɔr le.

⁵Naa tiɛr ke maah nan be ni ban nin, n nan gbaa bei ni ni niɛ nan biɛn naa?

⁶Le ni nyi ni wan nan la ŋmag u daandaan nan, naah li ŋa man wee un nan kpiir uba n-yonn man kpaan nin un nyan.

⁷Npɔɔn man woo limɔyiildaan nmɔn a bɔɔn nin pii piin itoon na; amaa wan la ŋmag mi wee maa tun nin, le la ŋmag man le, hali nin Uwonbɔr kaah na li nyan nan ŋmag mi nmɔn.

⁸Le limɔyiildaan nmɔn n nin kpiirin, wan wee Uyudaan Yisa na yin foor u mɔb a faam ki ku u, u dan daal nmɔn u na li bii limɔyiildaan nmɔn.

⁹Limɔyiildaan nin na yin dan nin Sintani a pɔɔmin le, ki nan tun ligaril nin lijinjeel a toon ki ji tibɔkar a siɛra,

¹⁰u li ta u binben biim nmɔn ki lar bininfob ki bii bi, baah yii ibamɔn yan li sei bi nŋmarimin bu.

¹¹Ni ma bu le Uwonbɔr ta kuŋmaruŋ a pɔɔm ŋa bi sufu ni ke nin che bi li pag tibɔkar

¹²wee ni joorimin Uwonbɔr na li bii ban biɛn kaa ŋa ibamɔn nin yada wee ki sin gann tibirin.

¹³Ni ye ti le li poor Uwonbɔr le iyoo biɛn ni bu, n nabum, nim ban wee Uyudaan jiɛ, nan bu-n npiinimin Uwonbɔr nan gann ni le ke ni kan nŋmarim Kinaaŋin a pɔɔmin ki ŋa ni u kasi a ninfob nin naah ŋa ibamɔn nin yada-n.

¹⁴Tibɔŋann tan wee ti pag tenn nin le Uwonbɔr ta yin ni, ke nim nin ti Yudaau Yisa Masiya n nan lagin kan u jilima-n.

¹⁵Ni ma bu n nabum, ni mann sir nbamɔm ki li ŋmag taah wɔɔn ni man nin, naah ye imɔleen le ti pag bee kugbɔŋ le ti sɔb sei ni ke ni.

¹⁶Ti Yudaau Yisa Masiya nin ti Baa Uwonbɔr, wan jiɛ ti nin U nyunyunbasanlin bu n kɔɔn ti lipoobil ki sei ti tama ŋaŋ,

¹⁷Un sei ni lipoobil ki pɔɔg ni gbanann nin itoon ŋan nin imɔleen ŋan.