Read Konkomba 1 Timoti 1 Bible Online

1 Timoti 1 - Konkomba bible

1 Timoti 1

¹Min Pɔɔl wan wee Uwonbɔr ŋaam Masiya[1] a toomin, wan ye ti feeru nin Masiya wan bu wee ti jɔɔ tama-n,

²N sɔb tenn Timoti wan ye n big bamɔŋ yada bu nle: Ti Baa Uwonbɔr nin ti Yudaau Masiya a linyunyunbasanl nin nposɔɔn li be a bu.

³Ke maah pii nan beiŋ man n-yonn man wee n nan jon Masedoniya-n, li be Efesusi wee ki che bininfob bibam nlaa ji wɔɔn tibɔkari,

⁴ki che bin nyan biba bi yaajam a bɔkpegir tan ye tibɔkar a teeni ki nyan bi yaajam a yiin npaamin. Ni ma che limɔkpel forin kaa ye Uwonbɔr a niin a toonl lan ye yada nbu.

⁵Nwɔɔnim nan a num kaah paa nan bu ye njiɛm le, man nyan kasi a sufu-n nin ipotiɛ ŋan nin ibamɔn a yada-n.

⁶Bininfob bibam yii ni niɛ le, ki tur ki kɔɔ ileen yan kaa jɔɔ bu a pagimin.

⁷Bi ban bi li ye ban wɔɔnn nsiim le, amaa baa nyi baah pag nan nmɔn ni bee nan wee bi pag nin tidindann nmɔn ni.

⁸Ti nyi nsiim nmɔn kaah ŋan, ni ye uninfo ŋmag mi nbamɔm ke.

⁹Ti ji nyi nsiimin kaah kaa siin sei ban ye bibuchimi, amaa ban ye tukangbirdam, nin ban kaa san Uwonbɔr, nin tibirdam, nin tijagindam nin ban galin Uwonbɔr, nin ban ku bi baam, nin ban ku bi nam nin bininfokub,

¹⁰nin ban tun iwanjaab toon, nin ban yii bi piib wee ki dɔ nin bijab tabin, nin ban jɔɔ biyom kpeŋ nin ban ye tibɔkardam, nin ban ji tibɔkar a siɛra, nin ban biɛn kaa nɔɔ ibamɔn a wɔɔnimin,

¹¹ni niɛ nan le ye jilima a bɔŋann tan nyan tikaar a Wonbɔru ban, le u ta ŋa n nɔɔn ke n li mɔɔn na.

¹²N poor ti Yudaau Masiya, nin waah seim npɔɔn, ki ŋaam yada daan, ki taam ŋa u toon yin.

¹³Hali maah le nan sugir u, ki mugir u, ki pag tibɔbir ki tenn win, u nan sam kunyunyunbaaga, nan bu-n maa nan nyi maah tun nan ni, maah kaa nan jɔɔ yada-n bu.

¹⁴Ti yudaau nan kpaar u nyunyunbasanl takpem le ki jaa n bu, ki ji kpiɛ yada nin njiɛm man be Masiya nin.

¹⁵Ni niɛ nan ye ibamɔn le, ni kpaan nin bininfob n gaa ti nbamɔm: Masiya nan dan dulinya nan yaan ke u nan fee tibirdam le jaa, min le ye tibirdaan ki jon bi biɛn.

¹⁶Amaa ni niɛ bu le Uwonbɔr nan sam kunyunyunbaag, ke min wan ye chinchinn a birdaau win, wee Masiya n fir wɔɔn u mɔril lan kaa jɔɔ tarig wee ni li ye limagil ki sei ban li ŋa Yisa yada ki kan limiɛfol lan kaa jɔɔ ndiɛmi.

¹⁷Daandaan nan, Ubɔr wan kaa jɔɔ ndiɛm, wan kaa kpegi, wan wee baa ga, Uwonbɔr uba, Uma ŋan nin jilima nin kupag hali nin iyoo yan kaa jɔɔ ndiɛmi. Ibamɔn.

¹⁸N bija, Timoti, n jɔɔ ikpaan nan ki ŋaan a nɔɔn, ikpaan nmɔn ye bilinlem kaah pii nan pag man ki jiin a paamin le. Ni ye a nɔɔn min nbamɔm ke a fir kɔn likɔnŋanl.

¹⁹Li ŋmag a yada nin a potiɛŋamin na. Biba nan yii mi le ki che bi yada bii.

²⁰Bi ma ye Hamenasi nin Alɛgzanda, ban wee n ta bi ŋubin Sintani a nɔɔn ke un dar bi tul wee bin jiɛn Uwonbɔr a sugir.