Read Konkomba 1 Timoti 4 Bible Online

1 Timoti 4 - Konkomba bible

1 Timoti 4

¹Kinaaŋ len na, ke idajoorikaa-n, bininfob bibam na li ta bi yada gab, ki nin nɔɔ nnaanbiim man ye bilinlarib nin npɔniim kaah wɔɔn nan.

²Nwɔɔm nmɔn nya bitingbiib ban larin ban le, ban a potiɛl denn ke bi ta kukurug toŋ le tabin nin.

³Bi kɔɔg bininfob le lipiikɔɔnl nin lijakunl, nin tijiir tibam a jim, tan wee Uwonbɔr naan ki ta sei tim ban ŋa u yada ki nyi ibamɔn nin, ke ti ga wee ki sei U kunɔɔpoogin.

⁴Nan wee Uwonbɔr naan nin biɛn ŋan, ti laa yii niba ni ye ti gaa ni nin kunɔɔpoog ke,

⁵nan bu-n Uwonbɔr a bɔr nin liwonmiɛl le che tijiir nmɔn be kasi.

⁶A ta ni niɛ nan ki wɔɔn a nabum ke, a li ŋa usanliiŋan Masiya[4] a toontumin, ŋaah nɔɔ ibamɔn a yada nin nwɔɔn ŋam man wugiriŋin.

⁷Laa nɔɔ ban kaa ye biwonjiɛmin a teeni nin tinaakpabɔri, pɔɔn a ba ki li jɔɔ nwonjiɛn binben.

⁸Tigbanann a tunim jɔɔ tinyɔɔr ti ba ti ni, amaa nwonjiɛn binben jɔɔ tinyɔɔr niwann biɛn ni, ki ŋmag limɔsiinl lan tun daandaan nan nin iyoo yan la chaan nin.

⁹Ni niɛ nan ye ibamɔn le, ni kpaan nin bininfob n gaa ti nbamɔm,

¹⁰(Mambu le ti tun nin linunmanl) nan bu-n ti jɔɔ tama Uwonbɔr wan fo-n ban, wan ye bininfob biɛn a feeru win, naah jann tɔɔ ban bu ye ban ŋa u yada n le.

¹¹Siin nsiim wee ki wɔɔn ni niɛ nan.

¹²Laa che bin lig ki ziɛŋ ŋaah ye kibipɔliŋ nbu, amaa ŋa limagil ki wɔɔn yadadam a pipagirin, a miɛfolin, a bamin, a yada-n nin a kasi a toon yin.

¹³Hali nin maah na li dan n-yonn man, a li jɔɔ isaŋ ki karin Uwonbɔr a bɔr nmɔn ki tenn bininfoba, wee ki li mɔɔn ti ki li jɔɔ ti wɔɔn ba.

¹⁴Laa che a piin yin ŋa yɔli, nan ye ilinlen leen ki seiŋ n-yonn man wee bininkpeeb nan ta bi nɔɔ-i paan a bu-n.

¹⁵Li jɔɔ inunman tibɔr nan yaan man, ki ta a gbanann biɛn ki sei ba, ni ma yin che bininfob biɛn n kan a kpaarim.

¹⁶Li nyi a ba bu, ki li ŋmag a wɔɔmin nbamɔm. Li jɔɔ inunman bi bu, nan bu-n ni ye a ŋaan man ke, a li fee a ba nin ban pelig a wɔɔm nmɔn ki jaa.