Read Konkomba 1 Timoti 6 Bible Online

1 Timoti 6 - Konkomba bible

1 Timoti 6

¹Ban biɛn wee tiyomir a naajadaag paa bi bu nan, n chee sei biyudam nin linungbeel nin jilima takpem wee Uwonbɔr a yinl nin taah wɔɔn nan nin nlaa ye kutingbiig.

²Biyom ban a yudam ye biwonjiɛmin n laa ziɛn bi, nan bu-n bi ye nnabum le nin tab. Amaa ni ye bin mann ter bi le nbamɔm, nan bu-n ban ji bi toon nmɔn a nyɔɔr ye biwonjiɛm le, ban wee biyudamin jiɛ. Ni niɛ le ye nan wee ni li jɔɔ wɔɔn ki pɔɔgir bi gbanann.

³Wan wɔɔn tibɔkar a wɔɔm wee kaa chee nwɔɔm bamɔm man wee ti Yudaau Yisa Masiya wɔɔn nin liwonjiɛnl a wɔɔmin ke,

⁴u ye kalanbaanidaan wan donn uba le kaa sin nyi niba. Ki ji ye wan a mɔsanyum sɔɔn, nin wan a sufu be limɔkpel a famin nin tibɔyɔɔr a pagimin, nin lipiiponl lan jɔɔ nbɔgirim chaan ki che taa nyi ki biɛn tab,

⁵ki far limɔkpel nin bininfob ban tiɛr tipotiɛbir bi sufu-n nin, bi lann bibamɔn le ki nyi ke liwonjiɛnl ye njɔɔm a wan le.

⁶Amaa uninfo a num gbee nan wee u jɔɔ liwonjiɛnlin nin ke, ni ye tinyɔɔr le takpem ki sei u.

⁷Taa ŋmag niba ki dan dulinya nan yaan ni, ti mu kaa li fir ta niba ki nya dulinya nan yaan ni.

⁸Amaa ni ye ti jɔɔ tijiir nin tiwann yeewann ke, ti num li gbee taah jɔɔ nan nmɔn.

⁹Bininfob ban ban bin ŋa bijɔɔndamin, bi ma kɔɔ nbigimin, nin kupeŋin nin ijɔrig takpem a wann nin kɔlisa kan ye kidaŋ ki bii bininfob wee bi lurin.

¹⁰Lilig banl ye titoonbir biɛn a sibonl le. Bininfob ban ban ilig ki tan lagir nmɔn a yada bora, le bi sufu nin gbee nin npoobiin takpem.

¹¹Amaa fin, wan ye Uwonbɔr a ninfo nan, guun ki nya ni niɛ nan yaan biɛn na, pɔɔn a ba ki li jɔɔ nbuchin binben, nin nwonjiɛn binben, nin yada, nin njiɛm, ki li jɔɔ lipoobil ki li be soon.

¹²Kɔm likɔnŋanl nin yada. Li ŋmag limiɛfol lan kaa jɔɔ diɛmin, lan bu wee Uwonbɔr nan yiŋin, wee a ŋa siɛra ŋaŋ ki kpiir ki wɔɔn siɛradam takpemin.

¹³Uwonbɔr a nintogil, wan tenn niwann biɛn limiɛfol nin Masiya[5], wan nan sir Pontiɛ Palati a nintogil ki ŋa siɛra ŋaŋ n bu, n kpaaniŋ le

¹⁴ke a li ŋmag nsiim nan ki laa jɔɔ igalin ni, hali nin ti Yudaau Yisa Masiya kaah na li degirin,

¹⁵N-yonn man wee ni na yin ŋa Uma Uwonbɔr a saŋi, tikaardaan wan le ŋmag, ki ye bibɔrtiib biɛn a bɔru nin biyudam biɛn a yudaau,

¹⁶U yaa binba ni le limiɛfol lan kaa jɔɔ ndiɛmin be, ki be nween man yaan wee uba kaa li fir foon niin ni, uba kaa la nyi kan wi, bee ki li fir kan wi. Uma kpaan nin jilima ki ye npɔɔn takpendaan hali nin iyoo yan kaa jɔɔ diɛmi. Ibamɔn.

¹⁷Kpaan ban ye bijɔɔndam dulinya kan yaan wee ti be nan ke bi laa jɔɔ kalanbaani bee ki ta bi tama ki ŋa njɔɔm man kaa si bogiliba nan yaan ni, amaa bin che bi tama li be Uwonbɔr ban, wan tenn ti njɔɔm man biɛn wee ti jɔɔ ter tiba-n.

¹⁸Bei bi wee bi li tun nan ŋan na, ki li ye bijɔɔndam itoon ŋan nin, ki li por baah jɔɔ nan ki tenn taba ki laa jɔɔ woog tabi.

¹⁹Bi ŋa man ke, bi li bil lifaal ki sei biba lan ye lifiɛl lan pɔɔ ki guu n-yonn man chaan nan, wee bin nan fir kan limiɛfol lan ye ibamɔn a miɛfol.

²⁰Timoti, li mann ŋmag nan wee Uwonbɔr ta ŋa a nɔɔn ke a li ŋmagin nbamɔma. Jiɛn tijɔrbɔr tan ye limɔkpel wee kaa jɔɔ nyɔɔr kaa biɛ ji ye Uwonbɔr yaar wee bibam yin ni nlamin na,

²¹nan bu-n bininfob ban ke bi jɔɔ man a biɛm nmɔn bor bi yada-n na. Uwonbɔr a nyunyunbasanl li be ni biɛn bu.