Read Konkomba 2 Timoti 4 Bible Online

2 Timoti 4 - Konkomba bible

2 Timoti 4

¹Uwonbɔr a nintogil nin Masiya[4] wan na yin ji ban fo nin ban kpo a bɔr, wee ti lig waah na yin degirin nin u naamin, le n kpaaniŋ nan:

²Li mɔɔn tibɔr nmɔn na; ŋaam sili iyoo biɛn, ki li tenn bi ikpaan ki gbeer bi, ki pɔɔgir bi gbanann ki li jɔɔ limɔril nin maaninba a wɔɔnim.

³Iyoo chaan le bininfob kaa ji na yin pelig ibamɔn a wɔɔmi. Amaa le ki nɔɔ bi sufu a bam, bi na li lagin ban wɔɔnn takpem ke bin pag bi tuli kaah saag ki ban bin gbir nan ni.

⁴Bi na yin ŋal bi tuli le ki yii ibamɔn a gbirim, amaa le ki sin pelig nwɔɔm man kaa ye ibamɔn nin.

⁵Amaa fin ma, li ŋmag a ba n-yonn biɛn, ki li pɔɔn a ba a fala a jimin; ki wɔɔn bininfob tibɔŋann nan, ki li tun litoonl lan wee Uwonbɔr ta seiŋin biɛn na.

⁶Bi pii kpaarim wur le ke kumanug a daamin, le isaŋ foou nin n fɔr dulinya nan yaan na.

⁷N kɔn likɔnŋanla, n diɛ n taguunla, ki sin ŋmag n yada.

⁸Daandaan nan n buchin yuchigirig ŋa sili ki dɔ guum, kan wee Ubuchin yudaan wan ye ubɔjirin na yin ta ki yɔm lidaal nmɔn, naa yin ye n yaa binba, amaa u na li yɔ ban guu waah na yin degirin lidaal lan nin tɔɔl.

⁹Pɔɔn a ba wee ki dan n ban weem ni,

¹⁰Nan bu-n, Demasi kaah ban dulinya nan nbu che u jiɛnim le ki jon Tesalonika. Kiresensi mu jon Galantiya, le Tatusi mu jon Dalimasiya

¹¹Lug a binba le be n ban. Yin Mag wee fin nin uma nnɔɔ dan, nan bu-n u terim n toon yin pam.

¹²N tun Tachikusi Efesusi a tiŋin na.

¹³A chaan ke a ta n war a daala nni, kan wee n nan ta jiɛn Karipusi ban Tirosi a tiŋin ni, nin n gbann sɔb kaarin nan kpaa talar nin n gbann tan kaa la sɔbin.

¹⁴Alɛgzanda wan ye ucha-n ŋaam nan kaa ŋan na. Uyudaan li yɔ u ki jiin waah tun nan nmɔn bu.

¹⁵A mu li nyi a ba bu ki ta jiin u paam, nan bu-n u yii ti bɔrin na.

¹⁶Chinchinn maah nan kɔn n ba bu-n, u ba kaa nan kpiɛ n bu, amaa bininfob biɛn nan yiim le. Uwonbɔr n laa dar bi tuli

¹⁷Amaa le Uyudaan sir n bɔɔn ki seim npɔɔn, wee min bu U bɔrin n fir mɔɔn nbamɔm wee ban kaa ye Juu yaabin ngbir ti. Le u nan nyam ugbegin a mɔn.

¹⁸Uyudaan li nyam niwanbirilin kaah li legim nan yaan biɛn, wee ki nan taam kun U paab a naamin yaan soon. Uma ye npagim nin isaŋ yan kaa jɔɔ diɛmi. Ibamɔn.

¹⁹Poor Pirisila nin Akula nin Onesiforusi a niin yaaba.

²⁰Erasitusi nan paar Korenti a tiŋin na, le Tirofimusi mu buŋ le n jiɛn u Miletusi a tiŋin.

²¹Pɔɔn a ba ki dan wee kutafaag a yonn n nin foon. Ebulusi, nin Pudensi nin Linusin nin Kiladiya nin bi nabumin biɛn poorin.

²²Uyudaan li be nin a naaŋ. Linyunyunbasanl li be a bu.