Read Konkomba Tatusi 1 Bible Online

Tatusi 1 - Konkomba bible

Tatusi 1

¹Min Pɔɔl wan ye Uwonbɔr a yomu nin Yisa Masiya a toomin, le Uwonbɔr tum u ninfo gannkaab ban, ke n ter bi bi yada-n wee bin biɛ ibamɔn a bɔr tan wɔɔn nwonjiɛn binben nin,

²yada nmɔn nin nbiɛmin tɔɔ tama kan wee bi jɔɔ ke bi na li kan limiɛfol lan kaa jɔɔ diɛmin bu le, ke Uwonbɔr, wan kaa por tibɔkarin, kaah nan siin limɔsiinl ke u na li sei ti limiɛfol nmɔn n-yonn man wee dulinya kaa la nan piin nin,

³le iyoo kaah nan nan foo-n le u nyan tibɔr nmɔn nween ni ke Uma Uwonbɔr wan ye ti feeru win kaah wɔɔnim ke n mɔɔn ti man nin,

⁴N sɔb kugbɔŋ nan ki tenn fin Tatusi wan ye n big bamɔŋin, nin taah lagin ki jɔɔ yada kiba kan nin bu. Ti ba Uwonbɔr nin Masiya[1] wan ye ti feeru win a nyunyunbasanl nin nposɔɔn li be niŋ.

⁵Nan bu wee n nan jiɛn niŋ Kereti a tiŋin nin nan ye nan le, n nan ban a gbaar itoon yan nan gur kaa diɛ n le ki sin gann bininkpeeb ntim biɛn nin ke maah nan wɔɔniŋ man nin.

⁶Naa ŋan nin uninkpel li jɔɔ igalin ni, u li ye wan jɔɔ upii uba kpeŋileŋ, le u buwaab mu li ye ban jɔɔ yada, ki laa ye tukangbirdami.

⁷Nibu, uwonjiɛn sanliir kaah ŋmag Uwonbɔr a toon yin ni, naa ŋan nin u li jɔɔ igalin bee ki mugir u tabi, ki laa ye wan a ŋuul fii yɔli yɔli, ki laa ye udanyugbeeri, ki laa ye ukɔnban bee ki laa ban tinyɔɔr tan kaa jɔɔ jilima.

⁸Amaa ni kpaa talar le nin u li gaan bicham, ki li ye wan ban nan ŋan, ki li ye wan fir chor u ba, ki li ye wan jɔɔ lasaab, ki li be kasi nin uba a ŋmagimin.

⁹Ki li ŋmag ibamɔn a bɔr tan wee bi nan wɔɔn win kenken, wee ki fir pɔɔg u kpiɛtiib a gbanann nin ibamɔn a wɔɔmin, wee ki fir nyaŋ ban biɛn kaa cheel tibɔŋann nmɔn nin.

¹⁰Nan bu-n, limɔyiil a ninfob yaba, ban pag yɔli yɔli nin kularug a ninfob, nin ban jann nɔɔ lipunjiil a kaalin.

¹¹Ni kpaa talar le nin bin ŋmin, nan bu-n bi choon kɔɔ bininfob biɛn a niin yin le ki wɔɔn nwɔɔm man kaa kpaan nin bi li wɔɔn ni, bi wɔɔn man ki ban tinyɔɔr tan kaa jɔɔ jilima le.

¹²Hali bi yaa linlenn uba len ke, “Kereti yaab ye tibɔkardam le iyoo biɛn, bi nann tiwankor le, ki ye bigbanyagdam nin bijijib.”

¹³Siɛra nan ye ibamɔn le. Ni ma bu fuun bi bu choba, wee nin che bin mann sir bi yada-n nbamɔm,

¹⁴ki laa pelig Juu yaab a wɔɔnim man kaa ye ibamɔn nin bee bininfob ban yii ibamɔn a siimin ni.

¹⁵Bininfob ban be kasi-n, bi wan biɛn be le kasi, amaa bininfob ban kaa be kasi wee kaa jɔɔ yada-n ma ban, niba kaa be ki be kasi. Nan bu-n bi sufu nin bi potiɛri biɛn ŋmarin na.

¹⁶Bi len ke bi nyi Uwonbɔr, amaa le bi toon yin wɔɔn ke bi yii wa. Uwonbɔr nan bi binbem nmɔn. Bi ye tukangbirdam le kaa li fir tun litoon ŋanli.