Read Konkomba Hiiburu yaab 1 Bible Online

Hiiburu yaab 1 - Konkomba bible

Hiiburu yaab 1

¹Yaayoo nni, Uwonbɔr nan taar isaŋ takpem nin isan balbal le ki che bilinlem pag tenn ti yaajam,

²amaa idaa yan joor nan, u che U bija le pag sei ti, wan wee U ŋau niwann biɛn a faajiru win, nin wan bu wee U nan naan dulinya nan nin.

³Uwonbɔr a pag le che U bija-n nyagin, ki jɔɔ Uwonbɔr a nunaŋ, ki ji ye wan ŋmag niwann biɛn u mɔleen a pɔɔm bu. Ni bɔɔn bu waah nan ban tibir a ŋunnim ki sei ti-n, le u kal Jilimadaan Uwonbɔr a nɔɔjiim paam papaab.

⁴Le Masiya yab jon malakam biɛn, ke liyinl lan wee Uwonbɔr ta sei win kaah yab jon malakam a yin man nin.

⁵Malaka u la ba wee Uwonbɔr la nyi len ke, “Fin le ye N bijaa; dinan a daal N ŋa a Baa”? Bee, “N li ŋa u Baa, wee u mu n ŋa n bijaa”?

⁶Uwonbɔr kaah nan ta U bininkpeegin ki dan dulinya nan yaan nin, U ji nan len ke, “Che Uwonbɔr a malakam biɛn n jiɛn u.”

⁷U nan len ke malakamin paam ke, “U ŋa U malakam le bi be ke ntafaamin, Le u toontum mu be ke nŋmipeen nin.”

⁸Amaa U bija-n ma paam U nan len ke, “A naangbɔŋin, Uwonbɔr aa, a yin gbaa be le hali nin iyoo yan kaa jɔɔ diɛmi, le a buchin li ye a naam a jaangbiɛg

⁹Ŋaah ban nbuchin binben ki nan npooton ni; mambu Uwonbɔr, wan ye a weemin, nan kpaar nmɔn a kpam ki jaa a bu ki seiŋ tininkper tan yab jon a kpiɛtiib a ninkper.”

¹⁰Uwonbɔr ji len ke, “Npiinimin, Uyudaan aa fin le nan fiɛ dulinya nan a fiɛl, le paab mu ye a nɔɔi kaah tun nan.

¹¹Bi biɛn na li kpo, amaa fin le yin gbaa be le; bi na li char ke tiwanyee wan kaah char man nin.

¹²A na li kpab bi ke likinkenlin; bi biɛn na li kpenn ke likinkenlin. Amaa fin kaa yin kpenn ni, le a bi-n mu kaa jɔɔ diɛmi.”

¹³Malaka u la ba wee Uwonbɔr la nyi ki bei u ke, “Kalim n nɔɔjiim paam, hali nin maah na li che, a dataam n kpann a taai a tɔɔnbol laa”?

¹⁴Naa ye malakam biɛn ye nnaam ban tun itoon le ki tenn ban biɛn yin kan nŋmarimin naa?