Read Konkomba Hiiburu yaab 10 Bible Online

Hiiburu yaab 10 - Konkomba bible

Hiiburu yaab 10

¹Nsiimin ye tiwann ŋann tan chaan nin a jinjiim le, amaa naa ye tiwann ŋann bamɔn nmɔn tɔɔl le ye ni. Ni ma bu kumanug kan gbaa mann ibin biɛn kaa diɛrin, kaa yin fir ŋa ban fɔɔr mal bin jiɛn Uwonbɔrin kasi.

²Ni ye biminmanib nmɔn nan bi li fir ke, baa nan bi li ta kumanug ki jiɛn naa? Ni ma bu na biwonjiɛmin bi kan nŋunnim nba buu le nin diɛ, le bi sufu kaa ji bi li bii bi toonbir bu.

³Amaa kumanug nmɔn a manim libinl biɛn nmɔn nan ye nan tiɛr bininfob le bi bir,

⁴nan bu-n inaaja nin iŋɔɔb a cham kaa li fir nyan tibiri.

⁵Mambu Masiya kaah dan dulinya nan yaan nin, u nan bei Uwonbɔr ke: “Ŋaa ban kumanug nin ipiin nin, amaa tigbanann le a ŋa ti sili ki seim;

⁶A num kaa nan gbee kumanug kan wee bi nan mann ki nyɔɔr ti nŋmi ni nin tibir a manugin ni.

⁷Le n nan len ke, ‘Min sɔ, ni sɔb Uwonbɔr a gbɔŋ kpabkaagin ki jiin n paam ke, “N dan n nan tun a bam le, Uwonbɔr aa.’ ”

⁸Chinchinn u nan len ke, “Ŋaa ban kumanug nin ipiin nin tiwankor tan wee bi nyɔɔ nŋmi, nin tibir a manug kan wee bi ti mann tibir bu-n nni” (hali nin nsiimin kaah le sei nsan ke bi li ŋaan man nin gbaa).

⁹Le u len ke, “Min sɔ, N dan n nan tun ŋaah ban man le.” Le Uwonbɔr ta chinchinn a manugin ki gab, le ki siin kumanug kan kpiɛ milee nan.

¹⁰Uwonbɔr a bam nmɔn bu le U ŋa ti kasidam Yisa Masiya kaah nan ta u gbanann ki mann kumanug nba bu ki sei ti-n bu.

¹¹Biminmanib biɛn si le lidaal biɛn ki tun bi wonjiɛn toon; ki le gbaa sagir ki mann kumanug kuba nmɔn, kan kaa li fir nyan tibiri.

¹²Amaa uminmann u niɛ man nan mann kumanugin nba bu le kpeŋileŋ tibir bu, le ki kal Uwonbɔr a nɔɔjiim paam.

¹³Ki guu iyoo yan wee Uwonbɔr na li che u dataam n kpann u taai a tɔɔn bol,

¹⁴nan bu-n kumanug kiba nmɔn le u che ban wee u nyan bi tibirin ki ŋaan bi kasi hali nin iyoo yan kaa jɔɔ diɛm.

¹⁵Kasi a Naaŋin mu jin kumanug nmɔn a siɛra ki sei ta. Chinchinn u len ke:

¹⁶Uyudaan len ke, “Tipoor tan wee N yin poo sei bi sɔ n-yonn man chaan nan a bɔɔn bu, N li ta N siimin ki ŋa bi sufu ni, le ki sɔb nsiim nmɔn ki ŋa bi potiɛrin.”

¹⁷Le u ji len kpiɛ ke: “Bi bir nin bi tukangbir a toon yin, maa ji li tiɛr i bu.”

¹⁸Nan yaan wee tibir a jiɛn per be-n, naa kpaa talar nin tibir a manug ji li be.

¹⁹Mambu, n nabum, taah jɔɔ tidindann ke ti na li kɔɔ kasi mu a kasi a bolin Yisa a chamin bu-n,

²⁰nsanpɔɔn man fo wee ti kan likinkenlin loor ki sei ti-n, n ma ye, Yisa a gbanann,

²¹nin taah jɔɔ uminmann wan yab ki ŋmag Uwonbɔr a niin nin,

²²ni che ti fɔɔr mal Uwonbɔr nin sufu ŋaŋ nin yada kan gbee nin ibamɔn na, waah jɔgin ki ŋunn ti sufu nyan kasi, wee ti nyan igalin ti potiɛlin ni, wee ki fun tigbanann mu nnyum ŋami.

²³Ni che ti li ŋmag taah jɔɔ tama kan ki pag ki bɔrin wee ki laa yeŋi, nan bu-n wan siin limɔsiinlin nmɔn ye yada daan le.

²⁴Ni che ti baga li be taah li ŋa man ki li pɔɔgir ti kpiɛtiib a sufu, wee nin che ti fir wɔɔn ti jiɛm nin tab kaah ye man ki li tun itoon ŋan.

²⁵Ni laa che ti ta tab ban a lagim ki jiɛn ni, a li ke bibam kaah ŋaan man nin ni, amaa ni che ti li mann pɔɔg tab a gbanann, a li ke naah kan Uyudaan a dan daalin kaah fɔɔr maligin man nin.

²⁶Taah biɛ ibamɔn yan wee bi wɔɔn ti nan a bɔɔn bu, ni ye ti ji be ki tun titoonbir ke, kumanug kuba kaa ji gur ki li ŋunn tibir nmɔn ni,

²⁷amaa taah guu tibɔr a jim nin nŋmi takpen man na yin gaa Uwonbɔr a dataamin a jawaam le be.

²⁸Ni ye uninfo nan ti yii Moziz a siimin ke, wee bininfob bilee bee bita jin u siɛra ke, bi nan ti ku udaan le kaa san u kunyunyunbaagi.

²⁹Mambu, ni tiɛr ke baa a tudaril kpaan nin uninfo wan taah Uwonbɔr a bija a taal bu nan n kan naa, wan ŋa ncham man ye Uwonbɔr a poorin tijaginn a ŋaar, wee ncham nmɔn ŋunn udaan, wee udaan ji sug Uwonbɔr a nyunyunbasanl a Naaŋin naa?

³⁰Nan bu-n ti nyi wan nan len ke, “Ni ye min le nkɔn jiin; n li yɔ,” ki ji len ke, “Uyudaan li ji u ninfob tibɔr.”

³¹Ni jɔɔ bijawaam le nin uninfo n lu Uwonbɔr wan ye limiɛfoldaan nan a nɔɔn.

³²Ni tiɛr iyoo yan nan chinn nin, wee ni nan gaa nwonween nin a bɔɔn bu, wee ni nan ye fala a jim nin linunmanlin, amaa naa nan nyaŋ ni.

³³Iyonn iba bi nan ti sugir ni le ki mugir ni npaan ni; le iyonn iba mu ke ni ti kpiɛg ban wee bi mugir nbu le ki ji fala.

³⁴Ni nan jogir biloondiikɔɔbin le, le ki chee sei ban yug ni wan yɔɔrin nin nmɔn, nan bu-n ni tɔɔl nyi naah jɔɔ nan nin kaah ŋan kaa jɔɔ diɛmi.

³⁵Mambu ni laa ta ni dindanin ki gabi; nan bu-n ni nyɔɔr na li yab.

³⁶Ni ŋan nin ni li jɔɔ limɔril wee ni nan fir tun Uwonbɔr a bam ke, ni li kan nan wee U nan siin limɔsiinl ke U li sei nin.

³⁷Ni ma bu n-yonn wama nan yaan, “Wan chaan nin li dan kaa li yuuri.”

³⁸Amaa N yaa ninfo buchin win li be u yada ni. Ni ye u jir bɔɔn ke, N num kaa li gbee wi.”

³⁹Amaa tim kaa ye ban sul jir bɔɔn wee ki gab yɔli nni, amaa ti ye ban ŋa yada nin ban kan feegabin le.