Read Konkomba Hiiburu yaab 13 Bible Online

Hiiburu yaab 13 - Konkomba bible

Hiiburu yaab 13

¹Ni li jiɛ ni kpiɛtiib ke ni nabuma.

²Ni laa tami wee ki li gaan bichama, nan bu-n ni ŋaan man ke, bibam gaan malakam le kaa nyi.

³Ni li tiɛr ban be tiloondirin nin bu, a li ke ni gbaa tɔɔl be tiloondirin le-n, nin ban wee bi mugir bin a li ke ni mu ji bi fala nmɔn le-n.

⁴Lipiikɔɔnl nin lijakunl ye ti biɛn li tenn li jilima le, lipiikɔɔnl nin lijakunl a didɔɔbol ye ni li be kasi le, nan bu-n Uwonbɔr na li ji ban tun iwanchɔgin toon nin tibɔr bipiib banlin nin bija banlin.

⁵Ni choo niba nin ilig a jiɛma, wee ki che ni num ngbee nan wee ni jɔɔ-n, nan bu-n Uwonbɔr len ke, “Maa li nyi ki jiɛn ni; maa li nyi ki yii ni.”

⁶Ni ma bu le ti pag nin tidindann ke, “Uyudaan le ye wan terim; ni bu jawaam kaa jɔɔmi. Uninfosaal li fir ŋaam baa?”

⁷Ni li tiɛr ni sanliib ban nan pag Uwonbɔr a bɔr ki sei nin. Ni li tiɛr bi binbem kaah nan nan joor man na, wee ki li toog bi yada kaah nan ye man nin.

⁸Yisa Masiya kaah won be man won nin yaan nin, u le be man le dinan, u le yin gbaa be man le nin iyoo yan kaa jɔɔ diɛmi.

⁹Ni laa che nwɔɔncham nan a booli biɛn nboon ni. Ni ŋan nin ti sufu n kan npɔɔn Uwonbɔr a nyunyunbasanlin bu, naa ye ikaal a jiir tan kaa ter ban ji ti nni.

¹⁰Ti jɔɔ kumanug a binbinl lan wee ban tun itoon tiwonjiɛn nanbonn nin kaa jɔɔ nsan nin bin ji li bu a jiiri.

¹¹Ni ma bu biminmanib a yudaau nan ti ŋmag tiwankor a cham le ki kɔɔ kasi mu a kasi a bolin le ti ye tibir a manug, amaa le ki nyɔɔ tiwankor nmɔn bi laguŋ nmɔn a gbaam.

¹²Mambu le Yisa mu nan jin fala ntingbaan kitiŋ nmɔn a timansanmɔnn, ki ta u tɔɔl a cham ke un nyan bininfob tibirin.

¹³Ni che ti jo u ban kulaguŋ nmɔn a gbaam, ki tan ji ifa yan wee u jin nin.

¹⁴Nan bu-n dulinya nan yaan taa jɔɔ kitiŋ kan li gbaa be, amaa ti lig kitiŋ kan la yin danin le.

¹⁵Mambu, Yisa a yinlin bu, ni che ti li pagir Uwonbɔr kumanug a pag kan nya timɔgban yin ki wɔɔn U yinlin.

¹⁶Ni laa tam itoon ŋan a tumi, ki li por tab naah jɔɔ nan na, man a manug le Uwonbɔr a num gbee.

¹⁷Ni li jɔɔ limɔcheel nin ni sanliib wee ki chee sei bi ninkper a pɔɔma. Bi baga be nin ni, ki ye bininfob ban na li wɔɔn baah tun nan. Ni chee sei ba wee bi toon li ye nmɔn, ki laa ye litugili, naa ye man ke naa na yin ŋan sei ni.

¹⁸Ni li miɛ Uwonbɔr ki tenn ta. Ti nyi ke ti jɔɔ potiɛri yan ween le ti ban ti li be jilima a binbemin niwann biɛn nin.

¹⁹N tɔɔl le balin ni le ke, ni li miɛ Uwonbɔr a wee Un che n jirin ni ban daandaan nan.

²⁰Uwonbɔr wan ye nposɔɔndaan wan nan ta tipoor tan kaa jɔɔ diɛmin a cham ki fiin ti yudaau Yisa wan ye upeekpaaŋanin nkumin nin,

²¹un sei ni nan ŋan biɛn wee ni ta tun u bam, ki che ni tinn nan li gbee u num, Yisa Masiya, wan ŋan nin npagim iyoo yan kaa jɔɔ ndiɛm bu. Ibamɔn.

²²N nabum, n balin ni le ke, ni li jɔɔ limɔril wee ki gaa n kpaan nan a bɔra, nan bu-n tibɔr wama le n ta sɔb kugbɔŋ nan ki sei ni.

²³N ban ni li nyi ke bi loor ti nabig Timoti kuloondiigin ki jaau. Ni ye u foon weem ke, n li ta u ki dan wee ti nan kan ni.

²⁴Ni poor ni sanliib nin Uwonbɔr a ninfobin nan. Itali yaab poor ni.

²⁵Uwonbɔr a nyunyunbasanl be ni biɛn bu.