Read Konkomba Hiiburu yaab 6 Bible Online

Hiiburu yaab 6 - Konkomba bible

Hiiburu yaab 6

¹Mambu ni che ti jiɛn Masiya a bɔr tan ye npiinim a wɔɔnimin, wee ki ta nninkpelam ki wɔɔn ki jo nintogil, naa ji kpaa talar nin ti ji mann bil lifiɛl a bɔr tan wɔɔn ke ni jiɛn titoonbir tan ye nkum a samin a nɔɔma, amaa wee ki ŋa Uwonbɔr yada,

²nin Uwonbɔr a nyunful a wɔɔnim, nin inɔɔ a paanim bininfob bu, nin n kum a fiim, nin litudaril lan kaa jɔɔ diɛmi.

³Ni ye Uwonbɔr chee ke, ti li ŋa man.

⁴Ni li pɔɔ ki sei bininfob ban wee Uwonbɔr wonn bi numin, ban nyi len paab a piini wee ki nan por kasi a Naaŋ a piini ki sei tabin.

⁵Ni li pɔɔ ki sei ban len Uwonbɔr a bɔr a ŋam nin n-yonn man chaan nin a bɔr,

⁶ni ye bi lu bi yada ni ke, baa ji li fir kan nsan man wee bi li nɔɔ ki kpenn bi binbemi. Nan bu-n bi lum nmɔn bu bi ji jiin Uwonbɔr a Bija-n le ki kpaag lidapunpunl bu ki jinn u ifa npaan ni.

⁷Nkpatam man nyu utaal a nyum man lur mi bu-n wee ki ŋaan tijiir ki tenn ban ko nan, Uwonbɔr le ŋaan tinyɔɔr ŋaan nkpatam nmɔn bu.

⁸Amaa nkpatam man wee ikunkon nin ijakpiɛgar pa-n mi dɔ le yɔli, limɔpool a daŋ li be nkpatam nmɔn bu. Le njoorimin nŋmi n nan gaa npaan nin nmɔn.

⁹N nabum hali nin taah le pag man nan biɛn na, ni biɛn yɔli ti jɔɔ tidindann, ti nyi ke ni jɔɔ tiwann ŋann tan nyan ni feegabin.

¹⁰Uwonbɔr ye wan ŋan le, Waa li tam ni toon nin naah jiɛ U man ki ter U ninfob ki la biɛ nin ter bin bu.

¹¹Ti ban ni biɛn li jɔɔ inunman le hali nin ndiɛm, wee nin che naah jɔɔ tama nan bu-n nin sin ŋa ibamɔn.

¹²Taa ban ni ŋa bigbanyagdami, amaa ni toog ban nan ŋa yada wee ki jɔɔ limɔrilin na, wee nin che ni kan lifaal lan wee Uwonbɔr nan siin limɔsiinlin.

¹³Uwonbɔr kaah nan yin siin limɔsiinl ki sei Abiraham, wee uba kaa nan be ki jon U wee U li poo udaan a yinl bu-n, U nan jir poo Ubaantɔɔl a yinl bu le,

¹⁴Ki len ke, “Ibamɔn, N sin li kaab tikaar ki jaa a bu, ki seiŋ iyaabil takpem.”

¹⁵Abiraham kaah nan jɔɔ limɔril ki guurin, ni bɔɔn bu le u nan kan nan wee Uwonbɔr nan siin limɔsiinlin.

¹⁶Bininfob poog ban jon bi a yinl bu le, le tipoor nmɔn cheel ki ku limɔkpel biɛn.

¹⁷Nan bu-n Uwonbɔr kaah nan ban Un wɔɔn ban na yin kan U mɔsiinlin a gbeemin, ibamɔn ke waa yin kpenn waah bon man nin bu, le U nan poo tipoor.

¹⁸Uwonbɔr ŋa tiwann tilee nan le taa jɔɔ kpenimi, ti ma ye limɔsiinl nin tipoor tan bu wee ni li pɔɔ nin Uwonbɔr n por tibɔkar. Mambu tim ban kan wunwoon bol u ban ni, ni ŋan nin ti li ŋmag ti tama kan be ti nintogilin nin lipoobil kenken.

¹⁹Tama kan wee ti jɔɔ nmɔn li ŋmag ti sufu le ki baa kenken. Tama nmɔn le jon lagir likinkenl lan gɔɔn nin bu, ki kɔɔ kasi a diig n-yaan ke uninfosaalin,

²⁰nan yaan wee Yisa nan chinn jon ki tan kɔɔ nin ti-n, un nan kɔɔ tim bu le. Le ki ŋa biminmanib a yudaau wan kaa jɔɔ diɛm, ke Melikizɛdɛg a toon kaah nan ye man nin.