Read Konkomba Jemisi 2 Bible Online

Jemisi 2 - Konkomba bible

Jemisi 2

¹N nabum naah ŋa ti yudaau Yisa Masiya wan ye kupag daan nin yada man ni, ni laa gann tabi.

²Ni ye uba dan ni laguŋin ki yee tiwanŋann nin salima a gbiɛŋ, wee faladaan mu nan kɔɔn ki yee tiwanchar ke,

³ni ye ni sei wan yee tiwanŋann nin jilima ki bei u ke, “Kikaabol ŋaŋ sɔ kalim” amaa wee ki bei faladaan nin ke, “Fin li si doo,” bee “Kalim tum,” ke,

⁴naa ye nganim le ni ŋa ni sisiigin nmɔn naa? Ki labir bibɔjib ni potiɛbir buu?

⁵N nabum; ni pela man: Naa ye Uwonbɔr le gann ban ye faladam kutingbɔŋ nan a poolin, ke bi li ye biwandam yada a ŋaam bu, wee ki nan ji paab a naam a faal lan wee Uwonbɔr siin limɔsiinl ke u li sei ban ban win naa?

⁶Amaa le nim sug faladam. Naa ye biwandamin le jɔɔ ni ki mugir ki chor ni chaa tibɔr a jim a dirin ni naa?

⁷Naa ye bi ma pag ki bii Masiya a yin ŋanl lan wee Uwonbɔr ta sei ni nnaa?

⁸Ni ye a ŋmag nnaam a siim man be Uwonbɔr a mɔleen yin nin ki ke, “Li jiɛ a kunkɔɔn taba ke ŋaah ban a ba man nin,” ke a ŋa man ke a ŋa choba.

⁹Ni ye a gann bininfob ke a ŋa tibira ki ye wan bii nsiim.

¹⁰Wan ŋmag nsiimin biɛn, amaa wee ni ŋa le u bii nsiim nmɔn miba ke, u bii nsiim man gurin biɛn na.

¹¹Amaa wan len ke, “Laa tun iwanchɔgin toon ni,” uma le ji len ke, “Laa ku.” Ni ye ŋaa tun iwanchɔgin toon amaa wee ki ku ke, a ye wan bii nsiim le.

¹²Ni li paga, wee ki sin li tun ke bininfob ban wee bi na li ji bi tibɔr nsiim man tenn feeja-n,

¹³nan bu-n, ban kaa san bikpiɛtiib kunyunyunbaagin, Uwonbɔr mu na li ji bi tibɔr kaa yin san bi kunyunyunbaagi. Linyunyunbasanl jon tibɔr a jima.

¹⁴N nabum, ni ŋam ye baa, ni ye uninfo ke u jɔɔ yada wee u yada nmɔn kaa tun itoon ke, yada nmɔn a bosu li fir fee u jaa?

¹⁵Che ti ke a nabig wan ye kibijag bee kibisiɛg be wee kaa jɔɔ tiwanyeer bee tijiir tan li ji.

¹⁶Le ni ni uba bei u ke, “Li chaa nin nposɔɔn na,” ki ji bei u ke, “Uwonbɔr li seiŋ wee a ji gbee,” wee kaa ŋa nan wee u ban ki sei u ke, ni ŋam ye baa?

¹⁷Ni ye man le, yada a ŋaam a binba wee yada nin itoon kaa nɔɔ tab ke, yada kpiiŋ le yen.

¹⁸Amaa uba li len ke, “Fin le jɔɔ yada, le n mu tun itoon.” Wɔɔm a yada kan kaa tun itoon nin ni, wee n wɔɔniŋ n yada nin n toon yan wee n tun.

¹⁹Ni ŋa yada ke Uwonbɔr ye u ba le kpeŋileŋ. Ni ŋan! Nnaanbiim gbaa tɔɔl ŋa yada man le ki san bijawaam.

²⁰Fin kujɔrug nan, a ban a biɛ ke yada wan kaa tun itoon ye yɔlii?

²¹Naa ye itoon ŋan a tum bu le Uwonbɔr nan ŋa ti yaaja Abiraham ubuchin, waah nan ta u big a Azig paan kumanug a binbinl bu ke un mann kumanug ki sei Uwonbɔr nnaa?

²²Ni kan ke u yada nin u toon nan lagin tab le ki tun, le u yada nan ŋa nbamɔm u toon a tum bu.

²³Le ni nan gbeen Uwonbɔr a mɔleen yan len ke, “Abiraham nan ŋa Uwonbɔr yada, le U ŋa u tibuchinn,” le ki nan yin u ke Uwonbɔr a jɔ.

²⁴Ni kan ke uninfo a toon ŋan bu le bi ke u ye uninfoŋan amaa naa ye u yada a binba bu.

²⁵Naa ye man mu jigin le Rahab wan nan ye lipiijagɔɔril nmu bi nan yin u ubuchin, waah nan ta kudiig ki sei ban nan dan bin nan pigir lig kitiŋ nmɔn ki ji nyan bi wee baa ku bin nnaa?

²⁶A li ke tigbanann tan kaa jɔɔ kinaaŋ kaah ye tigbanann kpiinn man nin, man le yada a ŋaam kan kaa tun itoon mu ye yada kpiiŋ.