Read Konkomba Jemisi 3 Bible Online

Jemisi 3 - Konkomba bible

Jemisi 3

¹N nabum, ni takpem nlaa ban ni ŋa ban wɔɔnn ni, nan bu-n, ni pii nyi ke tim ban wɔɔnn nin, a bɔr a jim na li pɔɔ ki jo bininfob biɛn yaal.

²Tiwann takpemin, ti biɛn tun ki bura. Ni ye uba kaa nyi ki pag burin u pipagirin ke, u yaadaan ye kasi daan le, ki li fir ŋmag u gbanann nbamɔm.

³Ni ye ti lee itaan a mɔɔŋi itangalig ke yin ŋa taah ban man ke, ti li fir labir bi gbanann ki kpaa taah ban nan paam.

⁴Bee ni taam tiŋalin ki ŋa siɛra. Hali tiŋalin kaah le yab man wee ntafaam daar ti chaan, ni biɛn yɔli, amaa kisalaabig le wan donn n jɔɔ donn tiŋalin, le ki jɔɔ chaa waah ban nan paam.

⁵Lilanbil mu ye kiwanbig man le tigbanann nin, amaa le ki far ligbingbanl takpem. Lig! Nŋmi wama kaah lu timɔɔrin ke min nyɔɔ kutingbɔŋ man.

⁶Lilanbil mu tɔɔl ye nŋmi le, ki ji ye dulinya nan a bɔbir ki be tigbanann a yagi biɛn, ki tenn tigbanann nmɔn biɛn tijaginn, ki jɔɔ nŋmi nyɔɔr tigbanann nmɔn a binbemin biɛn, le Sintani a ŋmiim man kaa junn nin mu nnyɔɔ lilanbil nmɔn.

⁷Tiwankor a booli nin nnɔɔm a booli nin iwaalab a booli nin iwanfol yan be limɔgilin biɛn nan, uninfo le jɔɔ ni biɛn a pɔɔm,

⁸amaa uba kaa jɔɔ lilanbil a pɔɔmi. Lilanbil jɔɔ tibir, ki gbee nin tilabir tan ku.

⁹Lilanbil le ti jɔɔ pagir ti yudaau nin ti Baa, le ki biɛ jɔɔ li ki sugir bininfob, ban wee Uwonbɔr naan bi wee bi nann win.

¹⁰Bimɔb biba nmɔn le tibɔŋann nin tibɔbir nya. N nabum, naa kpaan ke ni li ye man ni.

¹¹Kinyunbuŋ kiba li fir bun nnyum man mɔ ki ji bun nnyum man ye n-yaam maa?

¹²N nabum, bikinkam a sub li fir lo tisaan naa? Bee kigansiig li fir lo ikinkan naa? Man mu le ni ye kinyunbuŋ kan bun n-yaam a nyum kaa li fir bun nnyum man mɔ.

¹³Ŋma ye ulandaan nin ubiɛndaan ni sisiigin naa? Ni che un wɔɔn ni u binben ŋam a lam a toon yan ye jiininba a toon nmɔn.

¹⁴Amaa ni ye ni jɔɔ lipiiponl nin npooton ni sufu ni ke, ni laa far igbingban Mambu bee ki yii ibamɔn ni.

¹⁵“Nlam nmɔn a bosu kaa nyan paab a naamin ni amaa mi ye dulinya nan a lam man kaa gbee nin Kinaaŋ ki ye ulinlaril yaamin le.

¹⁶Nan yaan wee linunchɔril nin kujaŋuuŋ a don nba a potiɛl be-n nin yaan le kuŋmaruŋ nin titoonbir be.

¹⁷Amaa nlam man nyan paab a naamin nin, chinchinn mi ma ye kasi ki ye man jɔɔ limɔril nin jiininba, ki gbee nin linyunyunbasanl nin nbinben ŋan, nin ibamɔn a pagim.

¹⁸Ban jɔɔ limɔril ki bu tibur nin nposɔɔn nin, bi na li chiɛ nin tibuchinn.