Read Konkomba Jemisi 5 Bible Online

Jemisi 5 - Konkomba bible

Jemisi 5

¹Nim bijɔɔndam, ni pela man, ni li mɔra ki li kuun na, nan bu-n fala kan yin dan ni bu-n bu.

²Ni jɔɔmin biɛn bura, le ipɔgliɛn liɛ ni wann yɔɔr biɛn ki bii u.

³Ni salima nin ni kurninann nin kɔɔ likurila. Likuril nmɔn le li ye siɛra ki li gaa ni gbanann ke nŋmi-n. Ni taah ifaa le ki woon idaajoorikaan.

⁴Lig! Ni jin bitoontum ban tun ni kpaan nin dulima, kaa yɔn bi. Le bi mɔr, bidichiɛb nmɔn a mɔr kɔɔ Liwonbɔr Gbingbemil a tuli yin na.

⁵Ni be naah ban man le dulinya nan yaan, ki nɔɔ ni gbanann a bam, ki don ni ba. Ni ŋaam nmɔn polig ni gbanann le lidaal lan wee bi na yin kɔr ni.

⁶Ni nan pag ki bii bipopendam ma, ki ku ban kaa nan kɔnn nin ni-n.

⁷Mambu n nabum, ni mɔra, hali ki nan kpaa ti Yudaau a jirim. Ni lig ukpaar kaah jɔɔ limɔril man ki guu u kpaab kaah na li ŋa tijiir, naah yuur unalantaal a yonn ki nan kpaa utakotaal a yoo.

⁸Ni mu li jɔɔ limɔrila, ki li si nbamɔma, nan bu-n Uyudaan a damin mala.

⁹Ni laa ŋulin nin tabi, n nabum, ni ye man ke bi na li ji ni tibɔr. Ubɔjirin si ntimɔsan!

¹⁰N nabum, nim le ye limagil ki jɔɔ limɔril fala a poolin, ki si bilinlem ban mɔɔn Uyudaan a yinlin a taai-n.

¹¹Ke naah nyi man ni, ni ye tinyɔɔr le ki sei ban jin fala. Ni gbir Job kaah nan jɔɔ limɔril man u fala a jimin, ki ji kan ni joorim Uwonbɔr kaah tun nan ki sei wa. Uyudaan ye Unyunyunbasann le.

¹²N nabum, nan jon ni biɛn ye le ke, laa poo paab a naamin bee dulinya bee niba a wan ni. Che a “Nn” li ye nn, le a “Aai” mu li ye aai, wee bi laa galiŋi.

¹³Ni ni uba be tibɔmugkaarin naa? Un miɛm Uwonbɔr. Ni ni uba jɔɔ lipoopenl laa? Ni che un gaah ilan ki pag Uwonbɔr.

¹⁴Ni ni uba buu? Un yim biwonjiɛm a ninkpeeb wee bin miɛ Uwonbɔr sei u ki sin war nkpam ki jaa ubu Uyudaan a yinlin.

¹⁵Bi miɛ nin yada ke, ubaar nmɔn li pɔɔg, Uyudaan li fiin u paab. Ni ye u ŋa tibir le ke, u li kan jiɛn per.

¹⁶Mambu, ni kpiir ni bir ki wɔɔn taba, ki li miɛ Uwonbɔr ki tenn taba wee ni kan kutebug. Ubuchinn a wonmiɛl jɔɔ npɔɔn le mitoon yin.

¹⁷Elaja nan ye uninfosaal le ke taah ye man nan, u nan miɛ nin linunmanl ke utaal nlaa nu, le utaal kaa sin nan nun kitiŋ nmɔn yaan ki tan kpaa ibin itaa nin iŋmal iloob.

¹⁸Le u ji nan nan miɛ Uwonbɔr, le utaal nun, le tijiir naan.

¹⁹N nabum, ni ye ni ni uba bor kaa nɔɔ ibamɔn a samin, wee uba ta u jiin nin ibamɔn a sam nmɔn yaan ke,

²⁰ni li tiɛr ni niɛ: Wan biɛn fir labir tibirdaan wan borin ki jiin siin ibamɔn a samin yaan ke, udaan fee tibirdaan nmɔn nkum a nɔɔn na, ki li che tibirdaan nmɔn n kan feegab u bir takpemin bu.