Read Konkomba 1 Piita 1 Bible Online

1 Piita 1 - Konkomba bible

1 Piita 1

¹Min Piita wan ye Yisa Masiya a toomin, Le sɔb kugbɔŋ nan ki tenn Uwonbɔr a ninfogannkaab ban ye bicham ki be dulinya ni, ki yal kɔɔ ntimin ki be Pɔntusi nin Galantiya nin Kapadosiya nin Asiya nin Batiniya,

²ban wee bi nan gann, wee ti Baa Uwonbɔr pii nan nyi ke bi li gann bin, ŋa bi kasi, Kasi a Naaŋ a toon bu-n, ki che bi chee Yisa a mɔb le u cham n ŋunn bi: Linyunyunbasanl nin nposɔɔn li be ni bu takpem.

³Ipoor ye Uwonbɔr wan ye ti Yudaau Yisa Masiya a Baa-n yaal le! U nyunyunbasanl takpenlin bu ti kan nmaal pɔɔn man be tama kan fo-n, waah nan fiin Yisa Masiya nkumin,

⁴ki sei ti lifaal lan kaa li nyi buri, bee ki bii bee ki wiiri. Le li be paab ki guu nim,

⁵ban wee Uwonbɔr a pɔɔm guu ni-n, ni yada bu-n, hali nin feegab a nyɔɔr kaah na li foon, tan ŋa sili ki na li kpiir iyoo yan na yin joorin.

⁶Ni niɛ nan bu ni mɔ ni le takpem, hali naah le jin fala kan daandaan nan wee kaa li yuurin a booli biɛn nin yɔli.

⁷I niɛ nan dan le, ke ni yada kan ŋan jon salima kan burin, hali nŋmi kaah le mann salima kan li fir bii-n gbaa, yada nmɔn li wɔɔn ke ni ye ibamɔn le, ki ta kupag nin jilima dan ni joorimin, ni ye Yisa Masiya nan kpiirin ke.

⁸Hali naah kaa le kan u nni, amaa ni jiɛ u; nin hali naah kaa le la kan u daandaan nan gbaa, ni ŋaa u yadau, mambu le ni gbee nin nmɔn man kaa jɔɔ magimi,

⁹nan bu-n ni gaan ni yada a nyɔɔr le, nin ni naam a feeja.

¹⁰Ki ta jiin feegab nan paam, bilinlem ban nan pag ke linyunyunbasanl li foon ni ban nin, bi nan feen le nin linunmanl le bi baga be niin takpem,

¹¹ke bin kan iyoo yan nin naah li ŋa man wee Masiya a Naaŋ kan be bi ni nan chinn kan le ki wɔɔn bi Masiya a fala a jim nin kupag kan li ŋɔɔrin.

¹²Ni nan kpiir ki wɔɔn bi ke baa nan tun tenn biba le, amaa nim. Bilinlemin kaah nan pag tiwann tan wee ni gbirin wee ban mɔɔn tibɔŋann nin mɔɔn ti sei ni Kasi a Naaŋ kan nyan paabin a pɔɔm bu-n. Hali malakam ban bin biɛ tiwann nmɔn le.

¹³Mambu, ni ŋaam ni potiɛl sili ki tun itoon; ni choom niba; ki ta ni tama biɛn ki ŋa linyunyunbasanl lan wee bi na li sei nin, n-yonn man wee Yisa Masiya na yin kpiirin nin.

¹⁴Naah ye nbuwaab ban jɔɔ limɔcheelin, ni laa ji nɔɔ kɔlisabirug, kan wee naa la nan nyi wee ki nɔɔ nni.

¹⁵Amaa Uwonbɔr wan yin ni kaah be kasi man nin, ni mu li be kasi nin ni toon biɛn nin na;

¹⁶ni ma bu ni sɔb Uwonbɔr a gbɔŋin ke: “Ni li be kasiu, nan bu-n min Uwonbɔr be le kasi.”

¹⁷Nan bu-n naah yin ti Baa wan ji bininfob biɛn a bɔr nin bi toon kaah ye man wee kaa gann nin, ni bu ni che ni binbem li be ke ni ye bicham le dulinya nan yaan ki li san Uwonbɔr bijawaam nin jilimau.

¹⁸Nan bu-n ni nyi ke naa ye tiwann tan boon ke tikurninann bee salima le Uwonbɔr nan ta mann nkpenim a manug ki fee ni ki nyan nbinben man kaa jɔɔ bu wee ni yaajam nan ta sei ni-n ni,

¹⁹amaa ni nan ye Masiya wan a cham ŋan nin le, Masiya wan ye kipeebig kan kaa jɔɔ igalin bee kidaŋi.

²⁰Uwonbɔr nan gann u le ki nin naan dulinya, amaa le ki nan kpiir u wɔɔn idajoorikaa nan yaan nim bu.

²¹Uma bu le ni ŋa Uwonbɔr yada, wan nan fiin Yisa nkumin ki sei u kupag, mambu ni yada a ŋaam nin ni tama be Uwonbɔr ban le.

²²Naah mann niba kasi wee ki jɔɔ ibamɔn a mɔcheelin wee ki jiɛ ni nabum ibamɔn ni, ni li jiɛ tab nin ni sufu biɛn na.

²³Ni ma bu, ni ji kan nmaam jigin na, naa ye biwanboolib ban buri, amaa biwanboolib ban kaa bur, Uwonbɔr a mɔleen yan jɔɔ limiɛfol, ki be iyoo yan kaa jɔɔ diɛmin bu.

²⁴Ni ma bu “Bininfob biɛn nann timɔɔr le, le bi pag biɛn nann nmɔɔpuum man be kulɔŋ; timɔɔr koor le, le nmɔɔpuum mu lur,

²⁵amaa Uyudaan a mɔleen ma le gbaa be le.” I ma ye imɔleen yan wee bi nan ta mɔɔn sei ni.