Read Konkomba 1 Piita 2 Bible Online

1 Piita 2 - Konkomba bible

1 Piita 2

¹Mambu, ni jiɛn niwann nan ye kininaŋ nin kularug, nin bilinlarib a toon nin linunchɔril nin kutingbiig a booli biɛn na.

²Ni li be ke nbiliɛmin, ki li jiɛ Kinaaŋ a biim man be kasi-n na, wee nin che ni yabig ni feegabin,

³daandaan nan naah len ki biɛ ke Uyudaan ŋan ni.

⁴Naah chaan Uyudaan ban nin, wan ye limiɛfol a tangbagil lan wee bininfob yii win, amaa le Uwonbɔr a num gbee u le U gann win,

⁵ni mu tɔɔl be le ke itangbag yan fo-n, le U ta ni ki ma iniin wee ni li ye kasi a minmanib, wee ni li mann kinaaŋ a manug kan wee Uwonbɔr a num gbee Yisa Masiya bu-n.

⁶Nan bu-n ni sɔb Uwonbɔr a gbɔŋin ke: “Lig, n ta litangbagil liba ki bil Zayɔnn, litangbagil gann kaal lan jɔɔ linungbeel ki ŋmag lifiɛl, le wan gaa u jin biɛn kaa li ji ifa.”

⁷Ki ta jiin nim ban ŋa yada-n paam, litangbagil nmɔn jɔɔ linungbeel. Amaa ban kaa ŋa yada ma ban, “Litangbagil lan bitanmaab yii lin nan labir litangbagil lan ŋmag nmaan nni le,”

⁸nin, “Litangbagil lan che bininfob gbiɛr nin litangbagil takpenl lan che bininfob lur.” Bi gbiɛr li le, nan bu-n baah kaa chee Uwonbɔr a bɔrin bu, wee ni mu ye Uwonbɔr kaah siin bi man le yen nin.

⁹Amaa nim ye bininfob gannkaab le, ki ye bininfob ban ye ibɔrniin a minmanib, ki ye kasi a bol, ki ye Uwonbɔr yaab, ke ni pag Uma wan yin ni ki nyan ni libunbɔnlin ki ta ni ŋa ligaril a wonweem n-yaan nin.

¹⁰Isaŋ iba naa nan ye bininfobi, amaa daandaan nan ni ye Uwonbɔr a ninfob le; isaŋ iba naa nan kan linyunyunbasanli, amaa daandaan nan ni kan linyunyunbasanla.

¹¹N jɔtiib, n balin ni le, naah kaa ye dulinya nan yaab wee ki sin be dulinya nan ki ye bichamin, ni jiɛn titoonbir a kɔlisau, tan kɔnn nin ni naamin.

¹²Ni li be nbinben ŋan nmɔn a bosuu ban kaa ye biwonjiɛmin a sisiigin na, hali baah le galin ni ke ni tun tibirin na, ni biɛn yɔli ni li che bin kan ni toon ŋan ki sei Uwonbɔr kupag lidaal lan wee U nan yin gɔnn ti.

¹³Ti Yudaau bu, ni li cheel ban wee bininfob siin bi tininkper a pɔɔmin biɛn a mɔɔŋi ya, naah ye ubɔraa wee u pɔɔm jon tininkper a pɔɔm,

¹⁴bee bitinŋmagib, bi ma le u tun bi ke bin dar tibirdam a tuli wee ki pag ban tun itoon ŋan nin.

¹⁵Nan bu-n ni ye Uwonbɔr a wiib le ke ni tun itoon ŋan nan li loon tijɔri tan kaa nyi niba-n a mɔleen.

¹⁶Ni li be ke ban ye bi ba-n, amaa ni laa jɔɔ ye nba a binbem nmɔn ki tun tibiri; ki li be ke Uwonbɔr a toontum kaah be man nin.

¹⁷Ni sei uninfo biɛn jilima kan kpaan u: Ni li jiɛ ni wonjiɛn tab a linlaginn na, ni li san Uwonbɔr ki li tenn ubɔr yudaan jilimau.

¹⁸Nim ban ye biyomi, ni gaam ni yudam a mɔɔŋi nin jilima biɛn, wee nin laa ye ban ŋan wee bininfob a num gbee bin a binba, amaa hali nin ban a pooi to-n gbaa tɔɔl.

¹⁹Nan bu-n, ni ye usaal kan nan kpaan a nan wi wee ki sin jɔɔ limɔril waah tiɛr Uwonbɔr bu-n ke, u li kan npagim Uwonbɔr ban.

²⁰Amaa a ŋa tibir wee bi booŋ a toonbir nmɔn bu wee a jin fala ke, baa nyɔɔr wee a kan naa? Amaa ni ye a jin fala itoon ŋan bu ki jɔɔ limɔril ke, ni ma le a li kan npagim Uwonbɔr ban.

²¹Ni nan bu le Uwonbɔr nan yin ni, nan bu-n Masiya nan jin fala ni bu-u, ki wɔɔn ni limagil, ke ni li nɔɔ u tabogi ya.

²²“Waa nan tun niba a biri, le kularug mu kaa nan nyi nyan u mɔnn ni.”

²³Baah nan sugir win, waa nan sug bi ki jiin ni; waah nan jin fala-n, waa nan fann uba, amaa u nan ta u ba le ki ŋa Uwonbɔr wan ji bininfob biɛn a bɔr kaah kpaa man nin a nɔɔn,

²⁴Uma tɔɔl le nan tu ti yaa bir u gbanann nin lidapunpunl bu, wee nin che ti kpo tibir bu ki kan limiɛfol nbuchin binben nin ban; u daŋin bu le ni kan kutebug.

²⁵Ni nan nann ipee yan bor le, amaa daandaan nan ni jir Upeekpaar nin Wan guu ni tinaamin ban na.