Read Konkomba 1 Piita 3 Bible Online

1 Piita 3 - Konkomba bible

1 Piita 3

¹Nim biniinpiib, man mu le ye ni, ni li cheel ni chiɛb a mɔɔŋi ya, ni ye bi ni uba kaa ŋa Uwonbɔr a bɔr yada ke, ni binbem bu bi li ŋa yada, ke naa kpaa talar nin ni pag niba gbaa,

²ni ye bi kan ni kasi nin ni jilima a binbem ke.

³Ni laa che ni ŋinŋam be npaan ni, a li ke ni yukper a lolim bee salima a liɛnbim, bee ikinken ŋan a yeem bu.

⁴Amaa ni che niba a manim li be ni sufu ni, nŋinŋan man kaa wiiri ki be soon nin kinaaŋin, ni ma ye nŋan man wee Uwonbɔr a num gbee takpem.

⁵Yaayoo ni, kasi a piib ban nan ŋa Uwonbɔr yada-n, man le bi nan ŋaan ki ŋaŋir biba. Bi nan cheel bi chiɛb a mɔɔŋi le,

⁶ke Sɛra wan nan chee Abiraham a mɔb wee ki yi u ke u yudaau win. Ni ye Sɛra a bisiɛm le, ni ye ni tun nan ŋan wee kaa san bijawaam ke.

⁷Nim bipiidam, man mu le ye ni, ni mu li cheel tenn ni piiba, ki li nyi ke bi ye bilanjiim le ni ban, ki li tenn bi jilima ke nim nin bi ma biɛn na li gaa Uwonbɔr a piinŋan yan ye limiɛfolin, wee niba laa li fir legin ni wonmiɛli.

⁸Nan joor, ni biɛn li jɔɔ nmɔkpaau wee ni baga li be tabin na; ni li jogir taba, ki li jiɛ tab ke nnabumin, ki li san tab kunyunyunbaag nin jiininba.

⁹Ni laa jɔɔ tibir ki yɔ tibiri bee ki laa sug ban sug ni ki jiin ni, amaa ni li kaab tikaar ŋan tenn ban kaa ŋaa ni choba, ni niɛ nan bu le Uwonbɔr nan yin ni ke ni nan kan tikaar a faal.

¹⁰Ni ma bu ni sɔb Uwonbɔr a gbɔŋin ke, “Wan jiɛ limiɛfol wee u num nkan idaa yan ŋan ke, un choom u lanbil tibɔbir a pagimin nin u mɔgbai kularug a leen yin.

¹¹Ni kpaa le nin un jiɛn tibir a tum wee ki li tun itoon ŋan; ki li ban nposɔɔn a sam wee ki li nɔɔ mi.

¹²Nan bu-n Uyudaan a num paa bibuchim bu le, le ki pelig bi wonmiɛl iyoo biɛn, amaa Uyudaan a num kaa paa ban tun titoonbirin bu.”

¹³Ni ye a num man itoon ŋan a tum bu ke, uba be ki li fir seiŋ kidaŋaa?

¹⁴Amaa hali ni le ye ni ji fala itoon ŋan bu ke, tikaar be ni bu. “Ni laa san bininfob kaah san nan bijawaamin nni; ni laa che ni lam yugiri.”

¹⁵Amaa ni taam Masiya ki ŋa ni sufu ni wee u li ye ni Yudaau. Ki sin li ye ban ŋa sili iyoo biɛn ki guu uninfo wan biɛn li baan ni nan bu wee ni jɔɔ tama. Amaa ni ŋa man nin nbinbem ŋan nin jilima,

¹⁶ki che ni potiɛl li ŋan na, wee ban pag bii ni nin kininaŋ ni binbenŋam Masiya ni-n nji ifa bi tingbiig nmɔn bu.

¹⁷Nan bu-n ni ye ni jin fala itoon ŋan a tum bu wee ni ye Uwonbɔr a bam ke, ni sɔ nin ni ji fala titoonbir bu.

¹⁸Nan bu-n nba le Masiya nan kpo ki sei tibirdam biɛn, ubuchin nan gaa ban kaa ye bibuchim a kum ki kpo, ke un che ni foo Uwonbɔr ban. Bi nan ku u le tigbanann ni le u ji kan limiɛfol Kinaaŋ bu,

¹⁹Kinaaŋin bu le u ji nan jon ki tan mɔɔn tibɔŋann nin ki sei nnaam man be kuloondiigin ni,

²⁰ban nan jɔɔ limɔyiil iyaayoo yan nan jon nin wee Uwonbɔr nan jin limɔril ki guu bi Nowa a yonn, wee Nowa nan be kpee kuŋaluŋin. Kuŋaluŋ nmɔn yaan bininfob wama le nan kɔɔ ki ye bininfob biniin, bi man nan kan nŋmarim nnyum nmɔn yaan,

²¹le nnyum nan, nin si Uwonbɔr a nyunfulin lan fee ni mu gabin a taai yin, kaa ye tigbanann a jaginn a funya, amaa tipoor tan wee ti poo ke ti li jɔɔ nbinben ŋan ki jiin Uwonbɔr paamin bu, li fee ni ki gab Yisa Masiya a kum a fiim bu.

²²Yisa wan nan don paab ki be Uwonbɔr a nɔɔjiim paam nin Malakam nin tininkper a pɔɔm nin ipɔɔn biɛn yan cheel u mɔbin.