Read Konkomba 2 Piita 1 Bible Online

2 Piita 1 - Konkomba bible

2 Piita 1

¹Min Simɔnn Piita wan ye Yisa Masiya a toontunnu nin u toomin, Le sɔb kugbɔŋ nan ki tenn ban wee Uwonbɔr nin ti Yudaau Yisa Masiya a buchin binbem bu che bi kan yada kan ŋan ke ti yaagin:

²Uwonbɔr a nyunyunbasanl nin nposɔɔn li be ni bu takpem, naah biɛ Uwonbɔr nin ti Yudaau Yisa nbu.

³Waah jɔɔ Uwonbɔr a pɔɔm man nin bu che ti jɔɔ taah ban nan limiɛfolin biɛn nin nwonjiɛn binben taah biɛ u nbu, wan yin ti u baantɔɔl a pag nin u ŋam bu-n.

⁴Ni niɛ nan bu, le u sei ti imɔsiin takpen yan ŋan wee ni ma bu nin che ni por Uwonbɔr a wonaaŋ a pɔɔm wee ki ŋmar dulinya a ŋmaruŋin kan nyann tibir a kɔlisa-n.

⁵Ni niɛ nan bu, ni pɔɔn niba ki ta nbinben ŋan ki kpiɛ ni yada ni, ki ji che nbiɛm nkpiɛ nbinben ŋan nin;

⁶ki ta choonba ki kpiɛ nbiɛn nin; ki ta nnyiginim ki kpiɛ choonba-n, ki ta nwonjiɛn binben ki kpiɛ nnyiginimin;

⁷ki ta kunabitiig a ŋann ki kpiɛ nwonjiɛn binben nin, ki ta njiɛm ki kpiɛ kunabitiig a ŋann nin.

⁸Ni ye nbinben ŋan nan a bosu magir ni ki kpiɛ ke, mi li che naa li walin gurin bee naa li ye ban kaa jɔɔ nyɔɔri, ni biɛm ti Yudaau Yisa Masiya ni.

⁹Amaa ni ye wan kaa jɔɔ nbinben nan ke, udaan a num kaa ga nan fɔgi u jɔɔn na, ki pii tam ke Masiya nan ŋunn u bir kpegirin na.

¹⁰Mambu, n nabum, ni biɛn pɔɔn niba nin linunmanl ki che ni yim nin ni gannimin li ye ibamɔn na. Nan bu-n ni ye ni ŋa man ke, naa li lu,

¹¹man le li che ni ga ipoor ŋan ki kɔɔ nnaam man kaa jɔɔ diɛm ti Yudaau nin ti feeru Yisa Masiya nin.

¹²Mambu, n le yin gbaa tiɛr ni le tiwann nmɔn bu, hali naah pii nyi ki si kenken ki baa ibamɔn yan wee ni jɔɔ daandaan nan ni.

¹³N tiɛr ke ni ŋan nin n li ligir ni potiɛl, n miɛfol kaah la be n gbanann nin,

¹⁴nan bu-n naa li yuuri le n ta ti bil ngbaan, ke ti Yudaau Yisa Masiya kaah kpiir wɔɔnim man nin.

¹⁵N li pɔɔn nba niwann biɛn nin, ki ŋa nan kpaa talar ke n ŋa, wee ni bɔɔn bu n nan fɔɔr ni ban ke ni li fir tiɛr ni niɛ nan biɛn bu.

¹⁶Taa nɔɔ nlam a teeni isaŋ yan wee ti nan taah wɔɔn ni ti Yudaau Yisa Masiya a pɔɔm nin u dam a bɔrin ni, amaa ti ye siɛra jib le ban a num nan kan u jilima-n.

¹⁷Nan bu-n u nan kan jilima nin kupag ti Baa Uwonbɔr ban n-yonn man wee, likukɔl nan nyan U jilima a pagin yaan ki len ke, “N bija sɔ, wan wee N jiɛ; uma le N num gbee.”

¹⁸Ti baantɔɔl a tuli nan gbir likukɔl nan kaah nyan paab ki len man, tim nin uma kaah nan lagin be kasi a jɔɔl bu-n.

¹⁹Le ti ta bilinlem a mɔboi yin ki ŋa ibamɔn, ni pɔɔn niba ki mann pel ya, a li ke nwonween kaah wonn libunbɔnlin man nin, ki nan kpaa kutaag kaah na li wonn wee njakpanyiɛn a ŋmabili nwonn ni sufu ni.

²⁰Nan jon ni biɛn, ni kpaa le nin ni biɛ ke ilinlen leen yan sɔb Uwonbɔr a gbɔŋin nin kaa nyan ulinlenn baantɔɔl a kar wɔɔn nin ni.

²¹Ni ma bu-n ilinlen leen kaa nan nyan uninfosaal a sufu a bamin le, amaa Uwonbɔr a Kasi a Naaŋ le nan be bininfob ban le ki che bi pag ilinlen leen.