Read Konkomba 2 Piita 3 Bible Online

2 Piita 3 - Konkomba bible

2 Piita 3

¹N jɔtiib, n gbɔŋ ku niɛ nan le nin kpiɛ milee. Tigbann nmɔn a poolin, n sɔb le ti ye literil ke n ligir ni sufu wee ni tiɛr nan ŋan.

²N ban ni li tiɛr imɔleen yan wee kasi a linlem nan pag isaŋ yan nan jon nin, nin nsiim man wee ti Yudaau nin ufeerin nan che u tooi yin ta sei nin.

³Chinchinn, ni kpaa le nin ni li nyi ke idajoorikaa-n bininfob ban yɔɔlin na li dan, ki ta bi yɔɔlim nmɔn ki nɔɔ bitɔɔl a gbanann a kɔlisa birugin.

⁴Bi na li len ke, “Waah nan siin limɔsiinl ke u li dan nin, u dam nmɔn be laa? Hali ti baam a kum a bɔɔn ki nan kpaa daandaan nan, niwann biɛn le la be le ke dulinya a naan yonn nin.”

⁵Amaa bi yii le kaa tiɛr ke isaŋ yan nan jon nin Uwonbɔr nan pag imɔleen le i naan paab nin tum, nnyum le u nan ta naan dulinya a tingbɔŋ, ki che kutingbɔŋ nmɔn nyan nnyumin.

⁶Nnyum nmɔn le nan jin bi ki bii dulinya iyaayoo nmɔn.

⁷Uwonbɔr a mɔleen iba nmɔn le U ji ta guu papaab nin tum kan be daandaan nan ke nŋmi n nan gaa, ni si le ki guu tibɔr a ji daal nin ban kaa ye biwonjiɛmin a biim.

⁸Amaa ni laa tam ni niɛ nan bu, n jɔtiib: Ti Yudaau ban, lidaal liba nann ibin turil le, ibin turil mu nann weemba le.

⁹Ti Yudaau kaa ye wan sɔɔn wee kaa ŋmag u mɔsiinlin ni, a li ke biba kaah tiɛr nsusɔɔn bu man nin. U jɔɔ limɔril le nin ni, kaa ban uba n nan kpo, amaa u ban uninfo biɛn nkpenn u binbem le.

¹⁰Amaa ti Yudaan a dam nmɔn na yin nann unaayig a dann le. Papaab na li fɔɔr nin tifur takpenn; le nŋmi na li gaa tiwann tan be papaabin, le tum nin tiwann tan be tum nmɔn na li dɔɔn yɔli.

¹¹Tɔ, ni niɛ biɛn kaah na li gab yɔli nan, ni kpaan ni li ye ŋmam maa? Ni kpaan ni li be nbinben man ye kasi le nin nwonjiɛn binben,

¹²a li ke naah lig Uwonbɔr a daal wee ki ban ke li pii bi foon nin. Lidaal nmɔn le nŋmi na yin gaa ki bii papaab, le nŋmi nmɔn a tuntom na li che tiwann tan be paab ndenn.

¹³Amaa taah ŋmag U mɔsiinlin, tim le guu papaab pɔŋ nin tum pɔŋin le, bibuchim a niin yin.

¹⁴Ni ma bu n jɔtiib, naah guu ni niɛ nan bu, ni pɔɔn niba ki li jɔɔ kasi a binbem wee ki laa jɔɔ igalin Uwonbɔr ban ni, wee ki li jɔɔ nposɔɔn nin Uwonbɔr.

¹⁵Ni li nyi ni sufu ni ke ti Yudaau a mɔrilin ye nan sei ni nŋmarim le, a li ke ti nabig jiɛkaag Pɔɔl kaah sɔb sei ni Uwonbɔr kaah sei u nlam man ni.

¹⁶U le sɔb man le u gbann biɛn nin, ki pag jɔɔ jiin tibɔr nan paam. U gbann nmɔn jɔɔ tiwann tiba tan pɔɔ nin uninfo nbiɛ ni taai, nan wee bininfob ban kaa nyi niba, kaa si bogil liba-n, taar ti ki labir ti tibɔkar, ke baah pii ŋaan Uwonbɔr a mɔleen iba man ni, wee i bii bitɔɔlin.

¹⁷Mambu, n jɔtiib, naah pii nyi ni niɛ nan bu nan, ni li guu niba wee ki laa che ban kaa jɔɔ nsiim nan nlar ni ki kɔɔn kulɔŋ wee ni lu ni sisibol ŋanlin ni.

¹⁸Amaa ni li yabirig nin ti Yudaau nin ti feeru Yisa Masiya a nyunyunbasanl nin u nyinyimin na. Uma kpaan kupag daandaan nan nin isaŋ yan kaa jɔɔ diɛmi! Ibamɔn.