Read Konkomba 1 Jɔnn 4 Bible Online

1 Jɔnn 4 - Konkomba bible

1 Jɔnn 4

¹N jɔtiib ni laa ŋa kinaaŋ biɛn yada, amaa ni mag kinaaŋ biɛn njee ki nyan Uwonbɔr ban na, nan bu-n tibɔkar a linlem takpem dan dulinya nan yaan na.

²Naah li ŋa man ki biɛ Uwonbɔr a Naaŋ sɔ: Kinaaŋ kan biɛn len ke Yisa Masiya nan dan nin uninfosaal a gbanann le ke, u nyan Uwonbɔr ban le,

³amaa kinaaŋ kan biɛn kaa chee Yisa ke kaa nyann Uwonbɔr ban ni. Kinaaŋ nmɔn ye Yisa a dataag le, kan wee ni pii gbir ki bu ke ki chaan nin, hali daandaan nan gbaa ki pii be dulinya nan yaan.

⁴Nim, n bijiɛkaam, ni nyan Uwonbɔr ban le ki nyaŋ ba, nan bu-n wan be ni ban nin yab ki jon wan be dulinya nan yaan nna.

⁵Bi nyan dulinya nan yaan le, ni bu le bi pag dulinya a bɔr, le dulinya yaab pelig bi bɔr nmɔn.

⁶Tim nyan Uwonbɔr ban le, le uninfo wan biɛn nyi Uwonbɔr pelig ti bɔr, amaa wan kaa nyan Uwonbɔr ban kaa pelig ti bɔri. Taah ŋaan man ki biɛr ibamɔn a Naaŋ nin tibɔkar a naaŋ le yen.

⁷N jɔtiib, ni che ti li jiɛ taba, nan bu-n njiɛm nyan Uwonbɔr ban le. Uninfo wan biɛn jɔɔ njiɛm ke Uwonbɔr le ma u, le u nyi Uwonbɔr.

⁸Uninfo wan kaa jiɛ u tab ke waa nyi Uwonbɔr i, nan bu-n Uwonbɔr ye wan jiɛ le.

⁹Uwonbɔr kaah wɔɔn ti waah jiɛ ti man sɔ: U nan tunn U bija gaŋin dulinya nan yaan ke nin che ti kan limiɛfol kibig nmɔn bu.

¹⁰Njiɛm sɔ: Naa ye ti jiɛ Uwonbɔr le, amaa Uma jiɛ ti, le ki tunn U bija le u nan mann tibir a manug ti yaa bir bu.

¹¹N jɔtiib, Uwonbɔr kaah jiɛ ti kagin, ni ye ti mu li jiɛ tab le.

¹²Uba kaa la nyi kan Uwonbɔr i; amaa ni ye ti jiɛ tab ke, Uwonbɔr li be nin ti, le U jiɛm n ŋa dede ti ban.

¹³Ti nyi taah be nin Uwonbɔr le U mu be nin ti, nan bu-n U sei ti U naaŋin na.

¹⁴Le ti kan ki jin siɛra ke ti Baa-n le nan tunn U Bija ke un nan ŋa dulinya nan a feeru.

¹⁵Uninfo wan chee ke Yisa ye Uwonbɔr a Bija ke, Uwonbɔr be udaan ban, le udaan mu be nin Uwonbɔr.

¹⁶Ni bu ti pii nyi le ki ŋa yada nin Uwonbɔr a jiɛm man wee U jɔɔ nin ti-n. Uwonbɔr ye wan jiɛ le. Wan jiɛ ke, udaan be nin Uwonbɔr le, le Uwonbɔr mu be nin udaan.

¹⁷Ni niɛ nan bu, njiɛm ŋa dede ti ban na le ti li fir jɔɔ tidindann tibɔr a jidaal, nan bu-n ti nann U le dulinya nan yaan.

¹⁸Njiɛm kaa jɔɔ bijawaami. Amaa chasi a jiɛm ŋɔɔ bijawaam le ki nyann, nan bu-n bijawaam ye litudaril le. Uninfo wan san bijawaam kaa be chasi njiɛmin yaan ni.

¹⁹Ti jiɛ U nan bu-n Uma nan chinn jiɛ ti.

²⁰Ni ye uba len ke, “N jiɛ Uwonbɔr,” amaa wee ki nan u nabig ke, udaan ye tibɔkardaan le. Nan bu-n wan kaa jiɛ u nabig kan wee u ga win ke, waa li fir jiɛ Uwonbɔr wan wee waa ga win ni.

²¹Le U sei ti nsiim nan: Uninfo wan biɛn jiɛ Uwonbɔr ke, ni kpaa le nin u li jiɛ u nabig mu.