Read Konkomba 1 Jɔnn 5 Bible Online

1 Jɔnn 5 - Konkomba bible

1 Jɔnn 5

¹Uninfo wan biɛn ŋa yada ke Yisa le ye Masiya ke, Uwonbɔr le ma u, le uninfo wan biɛn jiɛ Baa-n jiɛ U bigin tɔɔl.

²Ni niɛ nan le ye taah biɛr ke ti jiɛ Uwonbɔr a buwaab man: Ti li jiɛ Uwonbɔr wee ki li nɔɔ U siim.

³Taah li jiɛ Uwonbɔr man sɔ: Ti chee U siimin na. Le U siim nmɔn kaa ye litugili,

⁴Uwonbɔr kaah ma nan biɛn nyaŋ dulinyau. Nnyaŋim man nyaŋ dulinya sɔ: Hali ti yada-n.

⁵Ŋma ye u ki nyaŋir dulinyaa? Wan le ŋa yada ke Yisa ye Uwonbɔr a bija-n.

⁶Yisa Masiya le ye wan nan dan nin nnyum nin ncham. Naa ye nnyum a binba bu le u nan dan ni, amaa nnyum nin ncham bu. Le Kasi a Naaŋ jin ni siɛra, nan bu-n Kinaaŋin ye ibamɔn le.

⁷Nan bu-n tiwann titaa le jin ni siɛra:

⁸Kinaaŋin, nin nnyum nin ncham; le tiwann titaa nmɔn jɔɔ limɔcheel nin tab.

⁹Ti cheel uninfosaal a siɛra le, amaa Uwonbɔr a siɛra le polig jon man, nan bu-n ni ye Uwonbɔr a siɛra kan wee U jin U bija-n bu le.

¹⁰Wan biɛn ŋa Uwonbɔr a bija nan yada jɔɔ siɛra nan u sufu ni. Wan kaa ŋa Uwonbɔr yada ta U ki labir tibɔkardaan na, nan bu-n waa ŋa yada Uwonbɔr a siɛra kan wee U jin U bija-n bu.

¹¹Siɛra nmɔn sɔ: Uwonbɔr sei ti limiɛfol lan kaa jɔɔ diɛma, le limiɛfol nmɔn be U Bija-n ban le.

¹²Wan jɔɔ Bija-n jɔɔ limiɛfol; wan kaa jɔɔ Uwonbɔr a Bija-n ke waa jɔɔ limiɛfoli.

¹³N sɔb tiwann nan ki tenn nim ban ŋa Uwonbɔr a Bija a yinlin yada ke nin che ni biɛ ke ni jɔɔ limiɛfol lan kaa jɔɔ ndiɛm.

¹⁴Nan bu wee ti jɔɔ tidindann Uwonbɔr ban sɔ: Ni ye ti miɛ U nan nɔɔ nin U sufu a bam ke, U gbir ti miɛm le.

¹⁵Le ni ye ti nyi ke U gbir ti miɛm ke, ti nyi ke taah miɛ U nan bu biɛn ti li kan.

¹⁶Ni ye uba kan u nabig tun tibir tan kaa joor nin nkum ke, un miɛm wee Uwonbɔr n sei udaan limiɛfol. N pag jiin ban a bir kaa ye bin kpo nle. Tibir tiba be ki ye nkum. Naa ye ti a bir le n ke un miɛ.

¹⁷Itoon yan a tum kaa kpaan biɛn ye tibir le, amaa tibir tiba be kaa joor nin nkumi.

¹⁸Ti nyi uninfo wan biɛn wee Uwonbɔr ma win kaa gbaa tun tibiri. Wan wee Uwonbɔr nan ma-n[1] le guu u, le ulinlaril kaa li fir sei u kidaŋi.

¹⁹Ti nyi taah ye Uwonbɔr a buwaab, le dulinya munl nan be ulinlaril a nɔɔn.

²⁰Le ti ji nyi Uwonbɔr a big kaah dan ki nan sei ti nbiɛm, ke nin che ti biɛ Uma wan ye ibamɔndaan nin. Le ti mu be nin Uma wan ye ibamɔndaan nmɔn, hali nin U big Yisa Masiya. U ye ibamɔn a Wonbɔru le nin limiɛfol lan kaa jɔɔ ndiɛm.

²¹N buwaab, ni nyam niba ibawolin.