Read Konkomba 2 Jɔnn 1 Bible Online

2 Jɔnn 1 - Konkomba bible

2 Jɔnn 1

¹Min uninkpel, Le sɔb kugbɔŋ nan ki tenn upii gannkaa nin u buwaabin[1], wan wee n jiɛ u nin ibamɔn nin, le naa ye n binba le jiɛ wi, amaa ban biɛn nyi ibamɔn ni mu jiɛ u le,

²nan bu-n ibamɔn yan be ti ban ki yin gbaa be ti ban chaan bu.

³Ti Baa Uwonbɔr nin Yisa Masiya wan ye Baa-n a Bija-n a nyunyunbasanl, nin nposɔɔn li be ti ban ibamɔn nin njiɛm.

⁴Ni seim nmɔn takpen le maah kan ke a buwaab biba nɔɔ ibamɔn a samin, ke ti Baa kaah siin ti man nin.

⁵Daandaan nan upii jiɛkaa, maa sɔb n siinpɔm le ki tenn niŋi, amaa nsiim man wee ti pii nan gbir npiinimin nin. N beiŋ le ke ti li jiɛ taba.

⁶Njiɛm sɔ: Ke ti li nɔɔ U siimin. A li ke naah nan gbir man npiinimin nin, U siim ye le ke ti li choon nin njiɛm.

⁷Bilinlarib takpem, ban kaa chee ke Yisa Masiya dan nin tigbanann le dulinya nan yaan nin, bi nyan le ki yal dulinya nan yaan. Bininfob nmɔn a bosu ye bilinlarib le nin Yisa a dataam.

⁸Ni bu ni li lig niba nbamɔm ki laa che nan wee ni tun nin n lu yɔli, amaa wee ki li ye ban li kan tiyɔr biɛn.

⁹Uninfo wan paa lagir wee kaa gbaa be Masiya a wɔɔmin yaan ke, waa jɔɔ Uwonbɔr i; wan gbaa be nwɔɔmin yaan ke, u jɔɔ Baa nin Bija-n le.

¹⁰Ni ye uba dan a ban wee kaa ŋmag Yisa a wɔɔmin ke, laa che un kɔɔ a niin bee a poor wi.

¹¹Wan poor u ke, udaan ye wan kpiɛ u bu le bi tun npooton a toon.

¹²N jɔɔ tibɔr takpem n sɔb sei ni, amaa maa ban n ta kugbɔŋ nin ngbansɔbmɔɔn ki sɔbi. Amaa n jɔɔ tama ke n li gɔnn ni wee ti num n kan tab wee n pag sei ni, wee ti mɔm nmɔn ngbeen.

¹³A ninsa gannkaa win a buwaab poorin.[2]