Read Konkomba Tibɔkpiirkaar 13 Bible Online

Tibɔkpiirkaar 13 - Konkomba bible

Tibɔkpiirkaar 13

¹Le kutunwiɛŋ nan sir limɔgil a dool. Le n kan kuwanbiig kaah chaa nyan limɔgilin. Ku nan jɔɔ iyinh piig le nin iyul ilile, ki chig nnaam a yuchigirim piig u yin bu, le iyin yan sugir Uwonbɔr nan sɔb paa u yuli nmɔn biɛn bu.

²Maah nan kan kuwanbiig kan nmɔn nan nann unamuun le, amaa le u taai nann ke ubakar a taai, le u mɔb nann ligbeginl a mɔb. Le kutunwiɛŋ ta u pɔɔm, nin u naangbɔŋ nin tininkper a pɔɔm ki sei kuwanbiigin.

³Kuwanbiig nmɔn a yul liba bu nan nann le ke li kan kidaŋ takpem le-n, amaa kidaŋ takpeŋ nmɔn a biɛl nan bugira. Ni nan gar dulinya yaab le bi nɔɔ kuwanbiig nmɔn.

⁴Le bininfob nan jiɛn kutunwiɛŋ nmɔn waah ta tininkper a pɔɔm ki sei kuwanbiigin nbu, le bi ji nan jiɛn kuwanbiigin mu ki len ke, “Ŋma nann kuwanbiig nan naa? Ŋma be ki li fir to kuwanbiig nan bitɔbaa?”

⁵Le kuwanbiig nmɔn nan kan bimɔb ki pag kalanbaani a leen nin tisugir ki ta u ninkper a pɔɔm ki tun ki tan kpaa iŋmal pina nin ilee.

⁶Le u nan yaar u mɔb ki sugir Uwonbɔr, ki gbii kutingbiig U yinl nin nan yaan wee U be, nin ban be paab.

⁷Bi nan sei u npɔɔn ke un kɔnn Uwonbɔr a ninfogannkaab wee ki nyaŋ bi. Le bi ji sei u tininkper a pɔɔm ke u li ye imaal, nin bininfob, nin ileen, nin ibol biɛn.

⁸Bininfob ban biɛn be dulinya nan yaan wee bi yin kaa sɔb ŋa Kipeebig kan wee bi nan ku-n a miɛfol a gbɔŋin yaan dulinya nan a piimin nin, bi biɛn nan yin jiɛn kuwanbiig nmɔn le.

⁹Wan jɔɔ litul ke, ni che un gbir.

¹⁰Wan ye bin nan choo u tiyomir ke, see ki bi nan choo u tiyomir wan ye bi nan ta takoobi ki ku u ke, takoobi nmɔn le bi yin ta ki ku u. Mambu ni ŋan nin Uwonbɔr a ninfogannkaab li jɔɔ limɔril nin nyiginim ki ŋa Uwonbɔr yada nin ibamɔn.

¹¹Le n ji kan kuwanbiig kuba kaah nyan dulinya nan yaan. U nan jɔɔ iyin ilee le a li ke kipeebig, amaa le ki pag a li ke kutunwiɛŋin.

¹²Le ki sir chinchinn a wanbiig a ninkper a pɔɔm ki che dulinya a ninfob biɛn jiɛn chinchinn a wanbiigin, kan nan kan kidaŋ wee ni bugir.

¹³Le kuwanbiig nmɔn ŋa ligaril a siɛra takpenl, hali ki che nŋmi nyan paab ki lunn nin le bininfob kan mi npaan nin.

¹⁴Chinchinn a wanbiigin kaah sei u npɔɔn man wee u si u taalin ki fir ŋa siɛra a toon yin, ni bu che u fir lar dulinya yaaba. Le ki bei bi ke bin maa litingbanl nin jilima lan nann chinchinn a wanbiigin kan nan kan takoobi a daŋ amaa wee kaa kpe-n.

¹⁵Le Uwonbɔr nan sei kuwanbiig kan kpiɛ milee nmɔn npɔɔn ke kin foor jaa litingbanl lan jɔɔ chinchinn a wanbiigin a nunaŋ, wee lin fir pag wee ban yii kaah jiɛn li ke lin ku bi.

¹⁶Le u mu ji mug bininfob biɛn, ban kaa gbee bininfob nin ban gbee bininfob, ban jɔɔ nin ban kaa jɔɔ, ban ye biba nin ban ye biyom, ke un daag bi nɔɔjiim bee bi yutun bu ndaagim,

¹⁷wee nin che uba laa ji fir da niba bee ki kɔɔr niba wee naa ye udaan jɔɔ kuwanbiig nmɔn a daagim le, ndaagim man ye u yinl nin u kanl.

¹⁸Ni niɛ nan ban nlamgɔrikaam le. Ni ye uba jɔɔ nlam ke, ni che un kanh tiwanbir a kanl, nan bu-n ni ye uninfo a kanl le. U kanl le ye kobiloob nin piloob nin iloob (666) le.