Read Konkomba Tibɔkpiirkaar 14 Bible Online

Tibɔkpiirkaar 14 - Konkomba bible

Tibɔkpiirkaar 14

¹Le n lig ki kan Kipeebig n nintogil le ki si Zayɔnn a jɔɔl bu, le bininfob turikobig nin turpina nin turina (144,000) kaah si u ban, ban wee bi nan sɔb u yinl nin u Baa a yinl ki tabin bi yutun bu-n.

²Le n nan gbir likukɔl kaah nyan paab, le li fur nann nnyum man puu a fur bee utaal kaah ti tann man ni. Maah nan gbir likukɔl lan nmɔn a fur nan nann ke bibiɛfaab kaah far bi biɛr le-n.

³Le bi nan gaah ilan pɔɔn kunaangbɔŋin nin tiwann naan wan tan fo tina-n nin bininkpeebin a nintogil. Uba kaa nan li fir ki tinn ilan nmɔn ni, see bi ma bininfob turikobigin nin turpina nin turina ban nan kan nŋmarim dulinya nan yaan nin a binba.

⁴Bi ma ye ban kaa bii biba lipiibanlin ni, nan bu-n bi ŋmag biba le chasi. Bi nɔɔ Kipeebigin kaah chaa nan yaan biɛn le. Bi ma ye ban wee Uwonbɔr nan da bininfob a sisiigin, ke bin ŋa chinchinn a ninfob ki sei Uwonbɔr nin Kipeebigin.

⁵Bi mɔɔŋi kaa nan nyi por tibɔkari; baa nan jɔɔ igalin ni.

⁶Le n kan malaka uba kaah be paab ki yugir, ki ŋmag tibɔŋann tan kaa diɛrin ke un pag sei bininfob ban be kutingbɔŋ nan yaan, ibol, nin imaal, nin ileen nin bininfob biɛn.

⁷Le u pag nin nkukɔpɔɔn ke, “Ni li san Uwonbɔr wee ki li tenn U kupaga, nan bu-n U bɔjil a yoon foou. Ni li jiɛn wan nan naan paab, nin kutingbɔŋ, nin limɔgil nin nnyunbuma.”

⁸Le malaka wan kpiɛ milee nɔɔ u bɔɔn ki len ke, “Ki lu! Babilɔnn kan ye kitiŋ takpeŋ wee ki nan mug bininfob a booli biɛn wee bi nyun ndapɔɔrim ke u wanchɔgin toon yin luu.”

⁹Le malaka wan kpiɛ mitaa mu nɔɔ bi bɔɔn ki len ke, “Ni ye uba jiɛn kuwanbiigin nin kuwanbiig nmɔn a nunaŋ wee ki gaa ki daagim u yutunl bu bee u nɔɔ bu ke,

¹⁰udaan mu li nyu Uwonbɔr a ŋuufiiŋ a daam man wee U minn ŋa U ŋuufiiŋ a dapɔɔrim a yiigin. Bi na li ta lichibil a ŋmiim ki mugir udaan malakam ban be kasi nin Kipeebigin a nintogil.

¹¹Le bi fala a jim a ŋmiim a kpinnyir na li dug ki do paab hali nin isaŋ yan kaa jɔɔ ndiɛm. Lifooril kaa na li be nween bee kunyiɛgin ki sei ban jiɛn kuwanbiigin nin kuwanbiig nmɔn a nunaŋin, bee ban ga kuwanbiig nmɔn a yinl a daagimi.

¹²Ni niɛ nan bu ni kpaan nin Uwonbɔr a ninfogannkaab ban chee Uwonbɔr a siim wee ki ŋa Yisa yada-n li ye ban li jɔɔ limɔril nin nnyiginim.

¹³Le n gbir likukɔl nyan paab ki len ke, “Sɔba: Tikaar be bitakpiib ban kpo nin Uyudaan nin, naah nyan daandaan nan ki jɔɔ chaa.” Le Kinaaŋ len ke, “Nn, bi li foor bi baginn nin, bi ŋaar nmɔn li nɔɔ bi.”

¹⁴Le n nan lig ki kan kitalangbɔŋ peŋ, le uba ka niin ki “nann Uninfosaal a bija” ki chig salima a naan yuchigirig, le ki ŋmag gɔrug kaaŋ u nɔɔn.

¹⁵Le malaka uba mu ji nyan iwonjiɛn niin ki tiɛn paab ki yin wan ka kitalangbɔŋin yaan nin ke, “Taam a gɔrug ki chiɛ, nan bu-n nchiɛm a saŋa foo, nan bu-n kutingbɔŋ a dii beer foo nchiɛma.”

¹⁶Le wan nan ka kitilangbɔŋ bun ta u gɔrug ki fiɛn fiɛn kutingbɔŋ bu, le ki chiɛ kutingbɔŋ.

¹⁷Le malaka uba mu ji nyann paab a wonjiɛn niin yin, le ki mu ŋmag gɔrug kaaŋ.

¹⁸Le malaka wan guu nŋmi mu ji nyann libinbinl n-yaan, ki yin nkukɔpɔɔn ki bei malaka wan ŋmag gɔrug kaaŋin ke, “Taam a gɔrug kaaŋin ki lagin igbiin bon yan be kutingbɔŋ nan a gbiinsiig bu-n na, nan bu-n ki gbiin mann na.”

¹⁹Le malaka nmɔn ta u gɔrug ki fiɛn fiɛn kutingbɔŋ bu, le ki lagin kutingbɔŋ a gbiin ki gab baah ŋmaŋ Uwonbɔr a ŋuufiiŋ a silooi a daam nan ban nin.

²⁰Le bi nan nyan kitiŋ nmɔn a gbaam ki kɔɔ baah taan isiloon ki toog ndaam nan yaan nin, le ncham nyan ndaam a toon bolin ki puu, ki do paab ki tan yegin itangalig a tarig maal kobig nin piniin nin (180).