Read Konkomba Tibɔkpiirkaar 20 Bible Online

Tibɔkpiirkaar 20 - Konkomba bible

Tibɔkpiirkaar 20

¹Le n kan malaka kaah nyan paab ki chaa jiirin tum, ki ŋmag libogil lan nyɔɔ kaa jɔɔ tarigin a piim nin tikulor takpen u nɔɔn.

²Le u nan choo kutunwiɛŋ nmɔn, wan nan ye yaaja yoo a waau, ki ye ulinlaril bee Sintani, ki lol u bil ibin turilin.

³Le u ta u ki gab libogil lan nyɔɔ kaa jɔɔ tarigin yaan, le ki loon ki pɔl legin u bu, ke u laa ji fir lar ibolin jigin nin, ki nan kpaa ibin turilin kaah na li diɛ. Ni bɔɔn bu ni kpaa le nin bi nan lor u ki jaa wama.

⁴Iyaayoo le n kan tinaangbann, le bi sei ban ka ti bu-n tininkper a pɔɔm ke bi li ji tibɔr. Le n kan baah nan tugir ban a yuli yin a naam, baah nan jin Yisa a siɛra nin Uwonbɔr a mɔleen n bu. Baa nan jiɛn kuwanbiigin bee ki nunaŋi, kaa gaa ki daagim bi yutun bu bee bi nɔɔi bu. Bi jirin bi miɛfolin le bi ma nin Yisa lagin ŋmag nnaam ibin turil.

⁵(Bitakpiib ban gurin kaa nan jirin bi miɛfolin ni nin ibin turil a tarig kaah nan nan kpaa.)

⁶Tikaar nin kasi be ban kpiɛ wee Uwonbɔr chinn fiin bi nkumin nin bu. Nkum man yin kpiɛ milee-n kaa jɔɔ bi pɔɔmi, amaa bi na yin ye Uwonbɔr nin Yisa a minmanib le, bi ma nin Yisa na li lagin ki ŋmag nnaam ki tan kpaa ibin turil.

⁷Ibin turil nmɔn a tarig nan jon ke, Uwonbɔr li che bin loor Sintani kuloondiigin ki jaa,

⁸le u li nya ki tan lar ibol yan be kutingbɔŋ a logi ina nan biɛn, ubɔr Gog nin u tiŋ Magog nan, u na li lagin bi ki lol bitɔb. Bi kanl na yin nann le ke limɔgil a gbaam a tanbiidilin.

⁹Le bi lagin ki jon ilog biɛn, ki kpa bi tan foo Uwonbɔr a ninfob a laguŋin, le ki gɔɔn bi, kitiŋ kan wee Uwonbɔr jiɛ nin. Amaa le nŋmi nyan paab ki nan gaa bi.

¹⁰Le Sintani wan lar bin, Uwonbɔr ta u ki gab lichibil lan gaan nŋmi-n ni a mɔgilin yaan, nan yaan wee bi nan ta kuwanbiigin nin tibɔkar a linlemin ki gabin. Ni yaan le bi yin ji fala nween nin kunyiɛg hali nin iyoo yan kaa jɔɔ diɛm.

¹¹Le n kan kunaangbɔŋ pɔŋ takpoŋ, nin wan ka ki bu-n. Le kutingbɔŋ nin kitilangbɔŋ nan guun fɔɔr u ban kaa ji jɔɔ binbeboli.

¹²Le n kan bitakpiib, ban gbee bitakpiib nin ban kaa gbee bitakpiib kaah si kunaangbɔŋin a nintogil, le tigbann kpaar. Le kugbɔŋ kuba mu ji kpaar, ki ma ye limiɛfol a gbɔŋ. Le bi jin bi tibɔr baah tun nan wee Uwonbɔr sɔb ŋa tigbann nmɔn yaan nin.

¹³Le limɔgil nan nyan bitakpiib ban be li ni ki jaa, le nkum nin kitakpiin tiŋ nyan bitakpiib ban be bi ni ki jaa. Le bi jin bi biɛn tibɔr baah tun nan bu.

¹⁴Le u ta nkum nin kitakpiin tiŋ ki gab nŋmi a mɔgilin yaan. Nŋmi a mɔgil nmɔn le ye nkum man kpiɛ milee.

¹⁵Ni ye wan a yinl kaa nan sɔb ŋa limiɛfol a gbɔŋin yaan ke, bi nan ti ta u le ki gab nŋmi a mɔgilin yaan.