Read Konkomba Tibɔkpiirkaar 21 Bible Online

Tibɔkpiirkaar 21 - Konkomba bible

Tibɔkpiirkaar 21

¹Le n kan paab pɔŋ nin kutingbɔŋ pɔŋ, nan bu-n chinchinn a papaab nin chinchinn a tumin nan fɔɔra, le limɔgil kaa ji be.

²Le n kan kasi a tiŋin, Jerusalam pɔŋin, kaah nyan paab Uwonbɔr ban ki chaa jiirin ki mann uba ke ujakunn nin ki guu u bɔɔnh.

³Le n gbir likukɔl kaah nyan nnaam a gbɔŋin yaan ki len ke, “Daandaan nan Uwonbɔr a binben bol be bininfob ban, le U li be nin bi. Bi li ŋa U ninfob, le Uwonbɔr mu tɔɔl li be nin bi ki ye bi Weem.

⁴Uwonbɔr na li pir bi num a nyinyinn biɛn. Iyaayoo nkum bee tikpemɔr bee timɔr bee nan wu kaa ji na li be, nan bu-n niwann kpegin nin biɛn fɔɔra”

⁵Le wan nan ka kunaangbɔŋ bu-n len ke, “Lig, n ŋaan niwann biɛn niwann pɔnn le!” Le ki ji len ke, “Sɔb ki bila, nan bu-n imɔleen nmɔn ye ibamɔn le ki ye gaa ji.”

⁶Le u beim ke: “Ni ŋau. Min le ye Wan chinn nin Wan joor, Npiinim nin Ndiɛm.[13] Nnyunyum kaah jɔɔ ban nin, n li sei bi limiɛfol a nnyum, man ye nnyunbunkaamin yɔli.

⁷Wan fir ki nyaŋ ke udaan li kan lifaalin biɛn, le N li ye u Wonbɔru le u mu li ye N big.

⁸Amaa ban kaa jɔɔ lipoobil, nin ban kaa jɔɔ yada, nin bipootondam, nin bininfokub, nin ban tun iwanchɔgin toon lipiibanl nin lijabanl, nin ban ye binyɔgdam, nin bibawomanib, nin tibɔkardam biɛn na yin be lichibil a ŋmiim a mɔgilin yaan. Ni niɛ le ye nkum man kpiɛ milee.”

⁹Le malakam bilile ban ŋmag tiyir tilile wee ti gbee nin imag ilile-n yan joorin a ni uba beim ke, “Dan wee n wɔɔniŋ ujakunn nin, wan ye kipeebig nmɔn a bɔɔnh.”

¹⁰Le u nan taam Kinaaŋin ki don lijɔɔl takpenl lan kper a paab, ki tan wɔɔnim Jerusalam kan ye Kasi a Tiŋin, le ki nyan paab Uwonbɔr ban ki chaa jiirin tum.

¹¹Ki nyagin nin Uwonbɔr a pag, ki ŋan ki nyagin ke nliɛm man a daag pɔɔ, ki be ke sataŋin, le ki ji ween ke niɛnu a maarin.

¹²Le kitiŋ nmɔn jɔɔ ligonl takpenl, lan kper ki jɔɔ itimansanmɔn piig nin ilee, le malakam piig nin bilee ka guu itimansanmɔnn piig nin ilee nmɔn. Bi nan sɔb Iziral yaab a boli piig nin ilee-n a yin le ki tabin itimansanmɔn nmɔn bu.

¹³Itimansanmɔnn itaa le nan be liwonpɔɔnl paam, le itaa be nnɔɔjiinpaam, le itaa be nnɔɔgan paam, le itaa mu be liwonlul paam.

¹⁴Kitiŋ nmɔn a gonl nan maa tɔɔn ifiɛ piig nin ilee bu le, le Kipeebigin a tooi piig nin bilee-n a yin nan sɔb ki paa ifiɛ nmɔn bu.

¹⁵Malaka wan nan beim man nin, nan ŋmag salima a jaangbiɛg kan wee u jɔɔ magir tiwann yɔɔr, ke un mag kitiŋ nmɔn nin ki timansanmɔnn nin igon.

¹⁶Kitiŋ nmɔn bi nan loon ki nann kitinmɔg le, le ki fufɔgim nin ki yinyalim ye nba. Le u nan ta u salima a jaangbiɛgin ki mag kitiŋ nmɔn, le ki fufɔgim ye maal turil piig nin turil bilee, ki fufɔgim nin ki yinyalim nin ki kpikperim biɛn nan ye nba.

¹⁷Le malaka nan mag kitiŋ nmɔn a gonl a li ke uninfo kaah magir tiwann man nin, le li pupoligim nan ye itaadann kobig nin pina nin ina.

¹⁸Sataŋ le bi nan ta maa ligonl nmɔn, le kitiŋin baantɔɔl ye salima bamɔn, ki nyagin ke niɛnu a maar.

¹⁹Bi nan ta itangbag yan jɔɔ kudaapɔɔrug le balbal ki mann kitiŋ nmɔn a gon a fiɛl, chinchinn a fiɛl a tangbagilin le nan ye sataŋ, lan kpiɛ ilee nan ye litangbag buginu, le lan paa itaa nan ye litangbag sɔɔn kpiɛ kpiɛ, lan paa ina a tangbag nan nann kisikpinnsiig,

²⁰lan paa iŋmu nan ye litangbag mann, lan paa iloob nan ye lichabil, lan paa ilile nan ye litangbagil lan ye nduuyom sɔɔn, le lan paa iniin nan ye litangbag sɔɔn lan nann buginu, lan paa iwiɛ nan ye litangbagil lan ye nduuyom, lan paa piig nan ye litangbagil lan peen faa, lan paa piig nin liba nan ye litangbagil lan mann ke titoog, le lan kpiɛ piig nin ilee-n nan ye litangbagil lan man ke nduuyom.

²¹Le itimansanmɔn piig nin ilee nmɔn nan ye nliɛm piig nin milee le, le ntimansanmɔn nba biɛn nan ye nliɛm nba le. Kitiŋ nmɔn a sanjal nan ye salima bamɔnl le ki ga ke niɛnu-n.

²²Maa nan kan iwonjiɛn niin kitiŋ nmɔn yaan ni, nan bu-n Uyudaan Uwonbɔr Npɔɔn biɛn daan nin Kipeebigin le ye ki wonjiɛn niin.

²³Kitiŋ nmɔn kaa ban nween bee uŋmal a wonweem li nyagin ki bu, nan bu-n Uwonbɔr a pagin le tenn ki nwonween, le Kipeebigin ye nin yaan a fila.

²⁴Ibol biɛn na li choon kitiŋ nmɔn a wonweemin, le dulinya a bɔrtiib na li ta bi ŋinŋam ki kɔɔ niin.

²⁵Lidaal kaa be wee ki timansanmɔn li loon ni, nan bu-n kunyiɛg kaa na yin be niin ni.

²⁶Le ibol biɛn na li ta bi pag nin jilima ki kɔɔ niin.

²⁷Le niwann nan biɛn jɔɔ tijaginn bee ban biɛn tun ifa bee kularug a toon kaa na li kɔɔ kitiŋ nmɔn yaan ni, amaa ban a yin sɔb be Kipeebigin a miɛfol a gbɔŋin a binba.