Read Konkomba Tibɔkpiirkaar 22 Bible Online

Tibɔkpiirkaar 22 - Konkomba bible

Tibɔkpiirkaar 22

¹Iyaayoo le malaka nan wɔɔnim nkpen man ye limiɛfol a nyum, ki ween ke niɛnu a maarin, ki puu nyan Uwonbɔr nin Kipeebigin a naangbɔŋin,

²ki jiir kitiŋin a sanjal a sisiigin. Le limiɛfol a siigi nan si ikpengon ilee nmɔn biɛn bu, le isiig nmɔn lon iloon itaa piig nin ilee, uŋmal biɛn ke i lo le. Le isiig nmɔn a far ye kutebug ki sei ibol biɛn.

³Limɔpool kaah ji na li be niin ni, Uwonbɔr nin Kipeebigin a naangbɔŋ na li be kitiŋ nmɔn yaan, le U toontum na li tun tenn u.

⁴Bi na li kan u num paam, le u yinl na li paa bi yutun bu.

⁵Kunyiɛg kaa ji na yin be nin yaan ni. Baa ji na li ban fila a wonweemi, bee nween a wonweemi, nan bu-n Uyudaan Uwonbɔr na li sei bi nwonween. Le bi na li ji nnaam ki li be hali nin iyoo yan kaa jɔɔ ndiɛm.

⁶Le malaka nan beim ke, “Imɔleen nan ye ibamɔn le ki ye gaa jin. Uyudaan wan ye bilinlem a naam a Wonbɔru tun U malakam bin tan wɔɔn U toontumin nan kpaa nin lin tun daandaan nan.”

⁷“Ni lig, n chaan le daandaan nan! Tikaar be ban ŋmag ilinlen leen a mɔboi yan be kugbɔŋ nan yaan nin bu.”

⁸Min, Jɔnn, le ye wan gbir ki kan ni nan biɛn. N-yonn man wee n nan gbir wee ki kan ni-n, le n sɔɔn malaka wan gbaa wɔɔnimin a taatum ki jiɛn u.

⁹Amaa le u beim ke, “Laa ŋa ni! N ye fin nin a nabum ban ye bilinlemin a toontunn kpiɛg le, nin ban biɛn nɔɔ kugbɔŋ nan kaah len man nin. Li jiɛn Uwonbɔr a!”

¹⁰Le u beim ke, “Laa ta tiwann tabin wann ki tabin ilinlen leen a mɔboi yan be kugbɔŋ nan yaan bu, nan bu-n iyoo mala.

¹¹Che wan tun tibir li gbaa tun tibira; che wan tun tijaginn li gbaa tun u jaginn na; che wan tun ibuchin toon li gbaa tun ibuchin toon na; le wan be kasi u li gbaa be kasiu.”

¹²“Ni lig! N chaan le daandaan nan! N nyɔɔr be n ban, le n li ta sei uninfo biɛn nin waah tun nan.

¹³Min le ye Alifa nin Omega, Chinchinn nin Njoorim, Npiinim nin Ndiɛm.

¹⁴“Tikaar be ban ŋunn bi wann yɔɔr bu, bi na li kan nsan limiɛfol a siigin ki nɔɔ itimansanmɔnn nin yaan ki kɔɔ kitiŋ nmɔn yaan.

¹⁵Ban kaa na yin be kitiŋ nmɔn a poolin ye: Ibɔ, nin ban tun inyɔg a toon, nin ban tun iwanchɔgin toon lipiibanl nin lijabanl, nin bininfokub, nin bibawomanib, nin ban jiɛ ki sin tun tibɔkar a toon.

¹⁶“Min, Yisa, le tun n malaka ke u nan sei biwonjiɛm a laginn siɛra nan. N ye Defid a tuŋ le ki ye u yaabil, ki ye kutaayɔg a ŋmabil lan ween.”

¹⁷Le Kinaaŋ nin ki bɔɔnh nin len ke, “Dan!” Wee ki che wan gbir nlen ke, “Dan!” Nnyunyum jɔɔ wan ke, ni che un dan; le wan ban ke ni che un gaam limiɛfol a nyum sei kaam man ye yɔli.

¹⁸N kpaan wan biɛn gbir ilinlen leen a mɔboi yan be kugbɔŋ nan yaan ke: Ni ye uba ta niba ki kpiɛ imɔleen nmɔn bu ke, Uwonbɔr tɔɔl li kpiɛ imag yan a bɔr sɔb be kugbɔŋ nan yaan udaan bu.

¹⁹Le wan mu nyan niba ilinlen leen a mɔboi a gbɔŋ nan yaan ke, Uwonbɔr li nyan udaan a tol lan be limiɛfol a siigin nin kasi a tiŋ kan a bɔr sɔb be kugbɔŋ nan yaan nin.

²⁰Wan jin ni niɛ nan biɛn a siɛra len ke, “Nn, n chaan le daandaan nan.” Ibamɔn. Dan, Uyudaan Yisa.

²¹Uyudaan Yisa a nyunyunbasanl li be nin Uwonbɔr a ninfob. Ibamɔn.