Read Konkomba Tibɔkpiirkaar 8 Bible Online

Tibɔkpiirkaar 8 - Konkomba bible

Tibɔkpiirkaar 8

¹N-yonn man wee u nan tabir kuwan tabin waŋ kan kpiɛ milile-n, le paab nan ŋmin chii ki tan kpaa minti pita.

²Le n nan kan malakam bilile-n kaah si Uwonbɔr a nintogil, le Uwonbɔr sei bi tinaatunn tilile.

³Le malaka uba nan ŋmag nnyɔgkusim a salima a saŋ ki tan sir kumanug a binbinl ban. Le bi sei u nnyɔgkusim takpem ke un kpiɛ Uwonbɔr a ninfogannkaabin bu bi wonmiɛlin, le u ta paan salima a binbinlin bu kunaangbɔŋin a nintogil.

⁴Le nnyɔgkusimin a kpinnyir, nin Uwonbɔr a ninfogannkaab a miɛm nyan malaka nan a nɔɔn ki don paab.

⁵Le malaka nmɔn yuur kisaŋin, ki mɔɔn nŋmi kumanug a binbinlin ki gbeen kisaŋin, ki kpaar yaal kutingbɔŋ bu; le utaal dun ki tann ki nyagin le kutingbɔŋ dam.

⁶Le malaka bilile ban ŋmag tinaatunn tilile-n ŋa sili ke bin pee bi naatunn nmɔn.

⁷Le chinchinn a malaka pee u naatuŋ, le itanyunbɔl nin nŋmi ŋmarin nin ncham ki lunn kutingbɔŋ nan bu. Le kutingbɔŋ bɔgir nkerim mitaa le nkerim nba gaa nŋmi, le isiig bɔgir nkerim mitaa le nkerim nba gaa nŋmi, le timɔsɔɔn biɛn gaa nŋmi.

⁸Le malaka wan kpiɛ milee mu pee u naatuŋ, le niwann niba nann lijɔɔl takpenl le nŋmi gaan li bu, le bi ta li ki gab limɔgilin. Limɔgil nmɔn a bɔgirim mitaa le nkerim nba nan kpann ncham,

⁹le limɔgil nmɔn a wanfoli a bɔgirim mitaa, le nkerim nba kpo, le tiŋalin a bɔgirim mitaa, le nkerim nba bii.

¹⁰Le malaka wan kpiɛ mitaa-n mu pee u naatuŋ, le liŋmabijal lan yab ki ween ke limumɔl a ŋmiimin nyan kitilangbɔŋ bu ki nan lu ikpen nin nnyunbum a bɔgirim mitaa-n a kerim nba ni,

¹¹liŋmabil nmɔn a yinl le nan ye Kpajarig. Le nnyum nmɔn a bɔgirim mitaa-n a kerim nba kpann kunyuntuntoŋ, le kunyuntuntoŋ nmɔn nan ku bininfob takpem.

¹²Le malaka wan kpiɛ mina-n mu pee u naatuŋ, le bi faa nween nin uŋmal nin iŋmabil biɛn le bi wonweem a bɔgirim nkerim mitataa a kerim nbaba bɔŋ. Lidaal a bɔgirim a kerim mitaa, nkerim nba kaa nan jɔɔ nwonween ni, kunyiɛg mu a bɔgirim a kerim mitaa-n, nkerim nba mu nan ye man le.

¹³Iyaayoo le n lig, ki gbir libaanweenl kaah be paab ki laan ki mɔr nkukɔpɔɔn ki ke: “Ni li bir! Ni li bir! Ni li bir ki sei dulinya, nan bu-n malakam bita ban gur wee ki la yin pee bi naatunn nbu!”