Read Kono MATIU 1 Bible Online

MATIU 1 - Kono bible

MATIU 1

¹Chisɔsi bemba n ta bemba n fan nɛ. Chisɔsi bɔ‑a Mansa Defidi 'a dambi an dɔ, min bɛɛ bɔ‑a Ebeami 'a dambi ɔ.

²Ebeami an‑na Aisaki suun, Aisaki an‑na Chekɔpi suun, mbɛ Chekɔpi‑a Chuda suun, ni a suun ma nyɔɛ kaima nu.

³Chuda an‑na Pɛɛsi suun, an fea Sɛya a. An de tɔɛ an nii nɛ Tama. Pɛɛsi an‑na Ɛson suun, mbɛ Ɛson‑na Dami suun.

⁴Dami an‑na Aminadabi suun, Aminadabi‑a Naason suun, mbɛ Naason‑na Samon suun.

⁵Samon an‑na Bowasi suun, min de tɔ ni Daabi. Bowasi an‑na Wobɛdi suun, min de tɔ ni Dutu. Wobɛdi‑a Chɛsi suun.

⁶Mbɛ Chɛsi‑a Mansa Defidi suun. Defidi an‑na Sɔɔmon suun, min de ni Wuyia 'a musu a.

⁷Sɔɔmon an‑na Dɛoboami suun, Dɛoboami an‑na Abicha suun, mbɛ Abicha‑a Asa suun.

⁸Asa an‑na Chɛosafati suun, Chɛosafati an‑na Choyan suun, mbɛ Choyan‑na Wusia suun.

⁹Wusia an‑na Chotan suun, Chotan an‑na Aasi suun, mbɛ Aasi‑a Ɛsɛkia suun.

¹⁰Ɛsɛkia an‑na Manasɛ suun, Manasɛ an‑na Amon suun, mbɛ Amon‑na Chosia suun.

¹¹Chosia an‑na Chɛkɔnia suun, ni a dɔ kaima nu. A na‑a an suun tima chɛ an na, tima min na an na‑a ta an na Babidon chɛnyɛ ɔ.

¹²Mbɛ an 'na yɛenɛ gbakɔ, a ka Babidon, an‑na den chɛ n fan suun. Chɛkɔnia an‑na Sadatiyɛ suun, mbɛ Sadatiyɛ‑a Sɔɔbabɛɛ suun.

¹³Sɔɔbabɛɛ an‑na Abiudi suun, Abiudi an‑na Ɛdiakin suun, mbɛ Ɛdiakin‑na Asɔ suun.

¹⁴Asɔ an‑na Sadoki suun, Sadoki an‑na Akin suun, mbɛ Akin‑na Ɛdiudi suun.

¹⁵Ɛdiudi an‑na Ɛdeasa suun, Ɛdeasa an‑na Matan suun, mbɛ Matan‑na Chekɔpi suun.

¹⁶Chekɔpi an‑na Chosɛfi suun, min 'na musu ni Mɛi a, min na‑a Chisɔsi suun, an mbe min chee, an dɔ, Chasi, kunka mansa.

¹⁷A ka Ebeami ma a ta Mansa Defidi tena, bemba n ta bemba tan kun ma naanin fan suun‑da. A ka Defidi 'a tima ma, a che an ta‑a tima min na Babidon, bemba n ta bemba tan kun ma naanin fan suun‑da. A ka tima chɛ ma to, aan a sɔ Chasi suun tima ma, min ni kunka mansa a, bemba n ta bemba tan kun ma naanin fan suun‑da.

¹⁸Chisɔsi Chasi suun‑da ka wan. Kamin dɔndɔ ni wan nɔ, min tɔ ni Chosɛfi. A na‑a Chisɔsi de Mɛi too ɔ dia wan, a si koe a musu a. Chɛɛ yatina, an mbe e na to si‑a, Yataa Nyina‑a a ma wan Mɛi bu ma‑a.

¹⁹Chosɛfi‑a bu koe chɛ ɔ sɔn kɛn, a na‑a a yii na chii wan, a ni a boo bɔ a ma koe ɔ yɛdɛn. Koe min na mu, mɔ tandenɛ ni a a, a nii ma to ni a ni baa bɔ Mɛi ma fanka ɔ.

²⁰Chɛɛ ɛ kɛn an yiinachii chɛ ɔ, a yen ko, Mansa Yataa 'a maeka na‑a a tena cho ɔ. Mbɛ a ɔ, “Chosɛfi, Mansa Defidi 'a dambi ɔ nyɔɛ, i ma sika Mɛi si koe a i 'a musu a. Koe min na mu, a‑a bu min ya ka, Yataa Nyina an‑na a be a ma.

²¹Ɛ den kainɛ suun‑da wan. A sin, ni a‑a a suun, a tɔɛ si, i ɔ, Chisɔsi. Koe min na mu, ɛ a 'a mɔɛ n bɔ‑a wan an 'na ko yama n dɔ.”

²²Chɛ gbɛɛ ma‑a gbɛ, min mbe a ma, Yataa na‑a min fɔ suun a 'a gbonka chɛ mɔɛ ye, a ni bɔ a a. A na‑a a fɔ wan, a ɔ,

²³“A yen ko, sunkun tɔngbɔɛ, min ma kai koe ɔ sɔn, ɛ na tena bu ma‑a, mbɛ a‑a den kainɛ suun. An mbe an den chɛ chee‑a wan, an dɔ, Imanuɛɛ,” min fasaien mu, Yataa ɛ mmɔ tɛ ɔ.

²⁴Mbɛ Chosɛfi‑a a kɔɔ sɔ kɛn chinɔɛ chɛ ɔ, a‑a Mɛi fuu wan, yɔ Mansa Yataa 'a maeka‑a a fɔ buɛ min dɔ a ye, a ni a ma.

²⁵Chɛɛ a nii ma a sɔn ni a 'a musu a, aan tima chɛ a, tima min na a‑a den kaien chɛ suun. Mbɛ Chosɛfi‑a a tɔɛ si, a ɔ, Chisɔsi.